Ngororero: Abakora ubucukuzi bw’amabuye y’agaciro butemewe bitege ibihano

  • Imvaho Nshya
  • Ukwakira 30, 2023
  • Hashize amezi 7
Image

Ubucukuzi bw’amabuye y’agaciro budakurikije amategeko buteza akaga karimo guhitana ubuzima bw’ababwishoramo, bukanangiza ibidukikije, bityo ubuyobozi bukaba buvuga ko ubwo bucukuzi bukwiye kuba igisubizo aho kuba ikibazo kandi amategeko ahana ubukora nta burenganzira.

Ni ubutumwa bwatangiwe mu Murenge wa Gatumba ku cyicaro cya Ngororero Mining Company (NMC) hagamijwe kurwanya ubucukuzi bw’amabuye y’agaciro bunyuranyije n’amategeko.

Umuyobozi wa Polisi ku rwego rw’Intara y’Iburengerazuba CP Emmanuel Hatari, yavuze ko abacukura badakurikije amategeko batazihanganirwa, bazajya bahanwa.

Yagize ati: “Gukora ubucukuzi bw’amabuye y’agaciro umuntu atabifitiye uburenganzira, akabukora mu buryo budakurikije amategeko bihanwa, bityo ko uzayarengaho azajya abihanirwa”.

Yongeyeho ko amabuye y’agaciro yagombye kuba hari ibyo akemura akaba igisubizo aho kuba umutwaro, bukaba igisubizo aho guteza ibibazo ngo  biteze ikibazo.

Ati: “Ntabwo bizihanganirwa ko ubucukuzi butemewe n’amategeko bwashyira ubuzima bw’abantu mu kaga ari nako bwangiza ibidukikije”. 

Umuyobozi wa Polisi ku rwego rw’Intara y’Iburengerazuba CP Emmanuel Hatari yibukije ko abakora ubucukuzi butemewe bazabihanirwa

Abaturage bahawe umwanya wo kubaza no gutanga ibitekerezo ku bucukuzi bukorwa binyuranyije n’amategeko.

Bamagana ubucukuzi butemewe kuko buhitana ubuzima bw’abantu, bukangiza ibidukikije n’imirima yabo kandi bugatuma habaho gucuruza amabuye ku buryo bwa magendu.

Umuyobozi w’Akarere ka Ngororero Nkusi Christophe yasabye ba nyiri amakampani guha akazi abaturage begereye ibirombe byabo by’umwihariko urubyiruko.

Kampani zimwe ziranengwa imikorere

Mu nama yihariye amakampani yanenzwe ko amwe muri yo atiza umurindi ubucukuzi bunyuranyije n’amategeko igihe agura amabuye ku buryo bwa magendu.

Ikindi yanenzwe ni ugucukura mu kajagari aho usanga bagura amabuye yacukuwe mu mirima y’abaturage itari mu mbago zayo.

Hanezwe kandi abayobozi ba kampani batitabiriye inama ifatirwamo ibyemezo bakohereza abahagarariye badashobora gufata ibyemezo.

CP Hatari yavuze ko RMB, Ubuyobozi bw’Akarere na Polisi bakomeza guhuza imbaraga kugira ngo ubu bucukuzi butemewe bucike burundu.

Kampani zizongera gufatirwa muri magendu (Fraude) zizafatirwa ibyemezo bikomeye birimo no guhagarikwa.

Yagarutse ku kubahiriza ibidukikije avuga ko ari politiki y’Igihugu yo kubirengera ko ubyangiza wese agomba kubihanirwa uko amategeko abiteganya.

Umuyobozi wa Ngororero Mining Campany NMC, Pro. Dr Tombola Gusatave yasabye bagenzi be ko bashyiraho koperative y’abacukuzi bityo uburiganya buba muri uyu mwuga bukavaho, bakanasangira amakuru ku biciro by’amabuye y’agaciro.

Ba nyiri kampani z’ubucukuzi bw’amabuye y’agaciro biyemereye ko ibibazo biboneka mu bucukuzi bitakwitirirwa abaturage ko ahubwo umuti wabyo uri mu bacukuzi banini.

Ubucukuzi bukozwe kinyamwuga butanga umusaruro kandi ntibubangamire abaturage n’ibidukikije

Biyemeje gukora neza mu nyungu zabo batirengagije iz’abaturage bakoresha, bakababera igisubizo aho kubaremerera.

Umuyobozi wa NMC yahamije ko abacukuzi bashyize hamwe bakemura ibibazo biremereye Akarere birimo ibibangamiye imibereho myiza y’abaturage.

Hashyizweho urubuga rwo guhanahana amakuru ku gihe ruzanafasha kurwanya magendu n’ibindi biharabika umwuga w’ubucukuzi.

Mu Karere ka Ngororero hacukurwa amabuye y’agaciro arimo Coltan, Gasegereti na Wolfram.

Aba ni bamwe mu bari mu nama ku bucukuzi

Inzego zitandukanye ziyemeje guhuza imbaraga ubucukuzi butemewe bugacika

NYIRANEZA JUDITH

  • Imvaho Nshya
  • Ukwakira 30, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE