Mushikiwabo yavuze ku muzi w’ubushyamirane bw’u Rwanda na RDC

  • NTAWITONDA JEAN CLAUDE
  • Ugushyingo 20, 2022
  • Hashize umwaka 1
Image

Madamu Louise Mushikiwabo, watorewe manda ya kabiri yo kuyobora Umuryango w’ibihugu bikoresha ururimi rw’igifaransa (OIF), yavuze ko impamvu muzi y’ibibazo bishyamiranyije u Rwanda na Repubulika Iharanira Demokarasi  ya Congo (RDC) ikwiye gukemurwa byihuse kugira ngo Akarere kagire amahoro n’umutekano birambye.

Madamu Mushikiwabo yavuze ko icy’ingenzi kibura ngo ibyo bibazo bikemuke, n’umutekano wo mu Karere k’Ibiyaga Bigari ukongera gusagamba, ari ubushake bwa Politiki bwabaye buke mu gushaka umuti urambye w’ikibazo.

Yabigarutsho mu kiganiro cyihariye yagiranye na TV5 Monde ubwo habaga Inama ya 18 y’Abakuru b’Ibihugu na Guverinoma ba OIF yateraniye i Djerba muri Tunisia ku wa Gatandatu no kuri iki Cyumweru.

Mushikiwabo, akomoza ku mutwe w’iterabwoba wa FDLR washinzwe n’abiganjemo abasize bahekuye u Rwanda muri Jenoside yakorewe Abatutsi mu 1994, yagize ati: “Hari imitwe yitwaje intwato muri RDC, by’umwihariko hafi y’umupaka w’u Rwanda, ikomeje guteza inkeke umutekano w’u Rwanda.”

Yakomeje ashimangira ko hari igihe byageze u Rwanda, u Burundi RDC na Uganda bikemeza ubufatanye mu guhangana n’imitwe yitwaje intwaro ikabakaba 130 ibarizwa mu Burasirazuba bwa RDC, irimo n’iyaturutse muri ibyo bihugu ikaba ihora ishaka guhungabanya umutekano wabyo.

Ati: “Byageze aho u Rwanda, RDC, Uganda n’u Burundi ndetse n’ibindi bihugu byo mu Karere bifata umwanzuro ko hakenewe ubufatanye mu guhashya iyo mitwe yitwaje intwaro. Abadashaka kumanika amaboko no gushyira intwaro hasi bagombaga kuzamburwa ku gahato. Kubera iki ibyo bitakozwe? Dukwiye gusubira ku masezerano yasinywe amaze igihe kirenga imyaka 10, agashyirwa mu bikorwa. Ni ikibazo cy’ubushake bwa Politiki gusa.”

Abajijwe niba Umuryango ayoboye ushobora gutangaza ubutumwa bugamije guhangana n’ibibazo bya Congo, Mushikiwabo yibajije niba ibyo byaba ari ngombwa, agira ati: “Hari gahunda nyinshi dufite kuri ibyo bibazo [bya RDC]”

Umwuka mubi hagati ya RDC n’u Rwanda wongeye gututumba guhera muri Werurwe 2022 ubwo inyeshyamba za M23 zuburaga intwaro zivuga ko Guverinoma ya RDC itubahirije ibyo yemeye gukorera Abanyekongo bahohoterwa bazira uko bavutse, n’abashinjwa kuba Abanyarwanda kandi bari muri gakondo ya ba sekuru.

Nyuma y’igihe iyo mirwano irimbanyije, Leta ya RDC yirukanye Ambasaderi w’u Rwanda muri icyo Gihugu, nyuma yo guhagarika imishinga y’iterambere ibihugu byombi byari bifitanye hashingiwe ku masezerano byasinyanye.

Leta ya Congo ishinja u Rwanda rutera inkunga inyeshyamba za M23, ariko Leta y’u Rwanda yo igashimangira ko ibyo birego nta shingiro bifite yamagana ubushotoranyi buhoraho bw’icyo gihugu bukorwa mu buryo butandukanye, no kuba FARDC yarinjije FDLR mu kazi ikanayifasha mu bikorwa bihungabanya umutekano w’u Rwanda.

Mu gihe imirwano ikomeje hagati y’Ingabo za Leta (FARDC) M23, kuri ubu ibice bitandukanye bya Teritwari ya Rutchuru n’iya Nyiragongo biri mu maboko y’izo nyeshyamba zikomeje guharanira ko abaturage bakiri mu byabo babona umutekano usesuye.

Kuri ubu, hari gahunda ebyiri zo ku rwego rw’Akarere zashyiriweho guhagarika ibibazo by’umutekano muke mu Burasirazub bwa RDC. Imwe ni iy’ibiganiro bya Luanda by’ubuhuza hagati y’u Rwanda na RDC, ndetse n’ibiganiro by’i Nairobi bigamije guhuza Leta ya RDC n’imitwe yitwaje intwaro.

Muri iki cyumweru kigiye gutangira, bitenganyijwe ko ibiganiro by’i Nairobi bizasubukurwa, ndetse hakazakorwa n’icyiciro cya kabiri cy’ibiganiro bya Angola kizafatirwamo umwanzuro w’uburyo bwo gusaba M23 kurekura ibice byose imaze kwigarurira.

Ku rundi ruhande, Leta y’u Rwanda yashimishijwe no kuba Mushikiwabo yatorewe manda ya kabiri nk’Umunyamabanga Mukuru wa OIF.

Minisitiri w’Ububanyi n’Amahanga n’Ubutwererane Dr. Biruta Vincent, yavuze ko Mushikiwabo ari we wari umukandida wenyine kandi ngo yatowe amaze gushimwa n’Abakuru b’Ibihugu na Guverinoma bahagarariye ibihugu 88 bigize uyu muryango.

Ati: “Yashimiwe imiyoborere myiza yazanye muri uyu muryango, ashimirwa icyerekezo yawuhaye, ndetse ashimirwa n’amavugurura yakozwe muri uriya muryango ku buryo byashimishije ibihugu bitandukanye biwugize. Ikindi ni icyerekezo, gahunda zitandukanye ari izijyanye n’ikoranabuhanga, ari ibijyanye na gahunda z’uburezi nko kwigisha Igifaransa ndetse no guha amahirwe urubyiruko n’abagore yo kugira ubumenyi no kwiteza imbere.”

Yakomeje avuga ko Leta y’u Rwanda na yo yashimishijwe n’uko Umunyarwandakazi Mushikiwabo avugwa imyato, ati: “Ni ibintu bihesha ishema Igihugu cyacu ariko kandi bikaba binadusaba kugira ngo uyu muryango turusheho kuwumenyekanisha, n’amahirwe Abanyarwanda bashobora kuwukuramo bayafate yose.”

Guverinoma y’u Rwanda yiyemeje gukomeza gushyigikira Mushikiwabo kugira ngo arusheho kugeza ku bihugu bigize uyu muryango udushya twinshi kandi dufitiye akamaro abaturage mu nzego zinyuranye.

  • NTAWITONDA JEAN CLAUDE
  • Ugushyingo 20, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE