Musanze: Kutamenya igishushanyombonera bikurura amakimbirane n’ubuyobozi

  • Imvaho Nshya
  • Ugushyingo 11, 2023
  • Hashize amezi 4
Image

Bamwe mu basore bo mu Karere ka Musanze, Umurenge wa Shingiro, Akagari ka Gakingo mu Mudugudu wa Burengo, bavuga ko iyo bubatse inzu basenyerwa nyuma bakabwira ko hatagenewe ubwubatsi nyamara nta makuru baba barahawe mbere y’aho, ikibabaje kandi ngo ni uko inzu zubakwa bazireba zagera hagati bakaza kuzisenya.

Aba basore kimwe n’abandi baturage bo mu Kagari ka Gakingo muri Shingiro, bavuga ko ba Mudugudu baba barebera ntibatange amakuru ngo hamenyekane icyo igishushanyombonera kivuga

Nyirurugo Jean de Dieu ni umwe mu basenyewe inzu kandi yari yaragerageje gushaka ibyangombwa, avuga ko yahohotewe asenyerewa inzu yari imaze kuzamuka ubuyobozi bw’umurenge ewa Shingiro burayisenya

Yagize ati: “Kuri ubu twebwe ibibera muri uyu Murenge cyane cyane Akagari kacu, nk’ubu icyangombwa mfite cy’ubutaka mfite kigaragaza ko aha hantu hagenewe guturwa  nagiye kwaka icyangombwa  cyo kubaka nyuze mu nzira zose ntangira Mutwarasibo abireba, kuko nanyuze mu nzira zose zisabwa kugira ngo nubake, ngeze hagati ariko naje gukorerwa akarengane na Gitifu w’Umurenge Hanyurwabake, afatanyije n’umukozi w’Umurenge ushinzwe ubutaka Bimenyimana baraza barayisenya”.

Nyirurugo akomeza avuga ko ibyo bakorerwa kuri bo babifata nk’akarengane kuko ngo mu gihe basenyaga inzu ye bamubwiye ko hatagenewe kubaka, kandi ngo iyo bagiye kwaka ibyangombwa byo kubaka basanga nta cyahindutse kariya gace kagenewe gutura, akaba asaba ko abayobozi bajya bihutira kumenyesha impinduka izo ari zo zose  ngo kuko kutamenya amakuru bidindiza iterambere.

Ati: “Nk’ubu nari maze kubaka inzu imaze gutwara agera kuri miliyoni 2, yose baraje bayikubita hasi, ubwo se ikosa ni iryange cyangwa ni uko nta makuru dufite cyane ko n’ufite inshingano mu bijyanye n’ubutaka ku Murenge aguha uburenganzira bwo gutura, ariko undi muyobozi akaza akabivuguruza ndakwereka amafoto y’inzu yanjye basenyeye aho yari igeze urumirwa”.

Abasore bo mu Kagari ka Gakingo kuri ubu ngo bibaza uburyo bazubaka bagashaka abo bazabana ndetse bakabona aho bahinga nk’uko Maniriho Donat yabitangarije Imvaho Nshya

Yagize ati: “Aha hantu urahabona ni ho ababyeyi bacu batuye ni ho twavukiye urabona ni ho bahinga, ariko ejobundi ni bwo numvise ngo ni ubuhumekero bw’akarere, abandi ngo ni mu gice cyahariwe inganda; none se nka twe tuzabaho dute niba koko ari uko bimeze, ubu rero nta gushaka umugore kuko tubuzwa kubaka kandi mu buryo budasobanutse, rwose ubuyobozi nibudufashe buduhe umwanzuro, tube twahabwa ingurane tumenye ko imiryango yacu yimuwe hano”.

Umwe mu baturage yagize ati: “Rimwe na rimwe hari ubwo baba bishakira akantu (ruswa) kuko n’ubwo yenda igishushanyo mbonera cyahindutse bamwe mu bayobozi baryumyeho banga gutanga amakuru ku mpinduka kugira ngo bakomeze banyunyuze abaturage”.

Nyiraribagiza Dancille ni umwe mu babyeyi bo mu Kagari ka Gakingo nawe ashimangira ko kuri ubu bafite ikibazo cyo gukomeza kubana n’abasore bageze mu gihe cyo kubaka ingo zabo

Yagize ati: “Ubu rwose twaheze mu gihirahiro kuko abana bacu ntituzi uburyo bazubaka turi mu rungabangabo, bamwe batubwira ko hagenewe ibindi bikorwa by’iterambere, bwacya nkabona hari abazamura inzu, niba ariko bimeze nibaduhe ingurane bashyireho ibikorwa remezo, n’aho abana bacu ubu bafite ikibazo cy’ukuntu bazubaka ingo zabo kuko aha hantu imiryango yacu iri hagenewe gutura”.

Umuyobozi w’agateganyo w’Akarere ka Musanze Bizimana Hamiss avuga ko kuba aba baturage bo muri Gakingo bubaka bagasenyerwa inzu ari ikibazo cy’imyumvire ngo kuko igishushanyombonera kivuguruye cy’umugi wa Musanze cyagaragaje ko hariya muri Gakingo ari igice cyahariwe amashyamba.

Yagize ati: “Hariya muri kariya gace ka Gakinga mu Mudugudu wa Buringo muri Shingiro igishushanyombonera cy’umujyi wa Musanze kivuguruye cyagennye hagenewe amashyamba, ibi rero bikaba biterwa no kuba yenda nta makuru bafite cyangwa se babyirengagiza nkana, tugiye kubaganiriza rero ndetse na bo bivugwa ko ari abayobozi babasaba ruswa tubikurikirane, ikindi abashaka kubaka bajye begera ubuyobozi cyane ko nta ngurane bariya baturage bari bahabwa ngo bivuge ko ubutaka butakiri ubwabo”.

NGABOYABAHIZI PROTAIS

  • Imvaho Nshya
  • Ugushyingo 11, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE