Muhanga: Abataramenyekana batemye uwari uvuye kwiga imodoka bamuca urutoki

  • Imvaho Nshya
  • Ugushyingo 18, 2023
  • Hashize amezi 6
Image

Umugabo witwa Tuyisenge Emmanuel w’imyaka 37 ukomoka mu Karere ka Kamonyi, mu Murenge wa Nyarubaka mu Kagali ka Nyagishubi mu Mudugudu wa Nombe wari uvuye kwiga imodoka kuri sitade ya Muhanga yatemaguwe mu mutwe no ku maboko bamuca urutoki n’abataramenyekana akaba arembeye mu bitaro bya Kabgayi.

Gutemwa k’uyu mugabo w’abana babiri byabaye mu ijoro ryakeye rya tariki ya 17 Ugushyingo 2023 ahagana saa tatu n’igice z’ijoro mu Murenge wa Nyamabuye, mu Kagali ka Gitarama, mu Mudugudu wa Kavumu.

Uwabibonye urara izamu avuga ko guhera saa moya z’ijoro yakomeje kubona abantu 2 bicaye ariko bagumya kurunguruka ndetse anavuga ko uyu mugabo yari yateze ipikipiki igeze mu ishuri rya Sainte Marie Reine iramusiga.

Ati: “Nakomeje kubona abantu bakerakera hano nka saa moya z’ijoro bakajya barunguruka mbona umugabo abaguyemo batangira kumutemagura banamukubita amahwa ikigaragara ni uko hari ipikipiki yamuzanye imuta hafi y’ishuri rya Marie Reine bigaragara ko yamuzanye iri ku isiri n’aba bamutemaguye”.

Umugore we Mukarugwiza Annonciata wakiriye inkuru mbi ari i Huye ku kazi yabwiye umunyamakuru wa Imvaho Nshya ko umugabo we ntawe yakura, akavuga ko akwiye guhabwa ubutabera anavuga ko abaganga bamubwiye ko umugabo we yakuweho agatoki ariko n’ikiganza bagitemye ariko bagatema inshuro nyinshi ku mutwe.

Umunyamabanga Nshingwabikorwa w’Umurenge wa Nyamabuye, Nshimiyimana Jean Claude yemeje ko uyu mugabo yatemwe saa tatu n’igice n’abantu batazwi.

Yagize ati: Uwo mugabo yatemwe saa tatu n’igice z’ijoro atabarwa n’umuzamu wari uri hafi ariko abaturage bakwiye kuba maso kandi bagashishoza cyane kuko nk’uyu mugabo yatubwiye ko yateze moto iramuzana imugeza hafi yaho bamukomerekeje, umuturage wari hafi aho yavuze ko aba bamukomerekeje bari bamaze umwanya aho bisa naho bari babiziranyeho n’uwo mumotari wamuzanye”.

Gitifu yongeyeho ko abamutemye batamusatse kuko ntacyo bamwambuye bivuze ko bashakaga kumugirira nabi gusa nubwo hataramenywa impamvu, ariko bisa n’aho ari abantu bamuzi kuko si bimwe by’abajura batega umuntu bashaka kumwambura.

Akomeza avuga ko ababonye uyu mugabo watemwe bavuga ko abamutemye ntacyo bamutwaye kijyanye n’amafaranga cyangwa telefoni, bigaragara ko bashakaga kumwica kuko uburyo bamutemye batifuzaga ko akomeza kubaho maze atabarwa n’umuzamu wari hafi aho wavugije induru.

Ubu uyu mugabo ari ku bitaro bya Kabgayi yitabwaho n’abaganga.

AKIMANA JEAN DE DIEU

  • Imvaho Nshya
  • Ugushyingo 18, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE