Minisitiri Musabyimana yakomoje ku cyafasha abaturage guhindura imyumvire

  • NTAWITONDA JEAN CLAUDE
  • Kamena 23, 2023
  • Hashize amezi 11
Image

Minisitiri w’Ubutegetsi bw’Igihugu, Musabyimana Jean Claude, yasobanuye imikorere ya Minisiteri y’Ubutegetsi bw’Igihugu (MINALOC) ndetse akomoza ku cyo itangazamakuru ryafasha mu guhindura imyumvire y’umuturage n’uruhare rwaryo mu iterambere ry’Igihugu.

Yabigarutseho ku wa Kane taliki 22 Gicurasi 2023 mu cyumba cy’inama cy’Umujyi wa Kigali, ubwo abayobozi ba MINALOC n’ibigo biyishamikiyeho birimo NEC, NRS, RDRC ndetse na LODA baganiraga n’abanyamakuru kuri gahunda, ibikorwa na politiki bashinzwe.

Minisitiri Musabyimana agaragaza ko kugira ngo Politiki zigamije kwimakaza imiyoborere myiza zigerweho, Minisiteri y’Ubutegetsi bw’Igihugu ibifashwamo n’ibigo biyishamikiyeho.

Minisiteri y’Ubutegetsi bw’Igihugu ifatanyije n’izindi nzego zigira uruhare mu guhuza ibikorwa bigamije kwegereza politiki za guverinoma y’u Rwanda abaturage binyuze mu Nzego z’ibanze.

Gahunda z’ubuhinzi, ubworozi, uburezi, ubuzima, ibikorwa remezo, kwimakaza umuco w’isuku no gukemura ibibazo bibangamira imibereho myiza y’abaturage, ubucuruzi, iterambere ry’umuryango, kubungabunga umutekano, ibidukikije, kurwanya isuri, ibiza n’ibindi.

Ati: “Ibi byose ni gahunda mu by’ukuri zituruka ku zindi Minisiteri n’ibigo ariko dushinzwe nka MINALOC gukurikirana ko bikorwa nk’uko byateganyijwe.

Ibi ntitwabigeraho tudafatanyije n’izindi nzego harimo n’urwego rw’itangazamakuru.

Umusanzu wanyu dushaka, ni ukuzamura imyumvire ndetse n’uruhare rw’abaturage mu bikorwa kugira ngo na bo bakore cyane, biteze imbere aho guhora bifuza buri gihe gufashwa na Leta.

Kubera ko izo porogaramu ntabwo zoroshye, ni porogaramu bisaba ko Leta ishyiramo imbaraga nyinshi ariko tutabonye uruhare rw’abaturage nta n’imwe yagira icyo igeraho.

Birasaba ko dufatanya kugira ngo urwo ruhare ruzamuke cyane ko mu nzego za Leta ho imirongo abantu bakoreramo iba izwi”.

MINALOC igaragaza ko abantu bose bakorera ku mihigo kandi bakagenzurwa ariko ko urwego rw’abaturage icyo bisaba ari ugusobanurirwa kugira ngo bumve neza uruhare rwabo bityo bashobore kurukora ku buryo bufatika.

Minisitiri Musabyimana yagize ati: “Twifuza kubaka Umunyarwanda ushoboye kandi ushobora gufasha abandi kuzamuka bava mu ntera imwe bajya mu yindi, ibi rero ntabwo twabyishoboza tutari kumwe namwe (Itangazamakuru).

Muzi ko Guverinoma y’u Rwanda yemera ko itangazamakuru rifite uruhare runini cyane mu iterambere ry’Igihugu ari na yo mpamvu twabatumiye. 

Ubutumwa bunyujijwe mu itangazamakuru bugera kuri benshi kandi mu gihe gito, kandi icyo abaturage bumvise mu itangazamakuru akenshi tumenyereye ko bagiha agaciro.

Ni yo mpamvu twumva ko MINALOC idashobora kuzuza inshingano zayo mu gufasha abaturage gutera imbere mutabigizemo uruhare cyane cyane mu kwigisha abaturage no kubafasha guhindura imyumvire”.

Hari gahunda za Leta zikomeye zifite uruhare mu guhindura abaturage MINALOC yifuza kujyanamo n’itangazamakuru, harimo cyane cyane gukangura no kwigisha abaturage kwivana mu bukene no kurushaho kwigira.

Ati: “Umuturage ntiyumve ko ubukene ari umurage cyangwa ngo yumve ko ubukene budashira.

Mu mateka twanyuzemo nk’Igihugu, yatwigishije ko ubukene buhera mu mitekerereze, umuntu akumva ko ari umukene kandi ko agomba kubaho bikarangira bibaye imibereho isanzwe.

Turifuza ko ibyo bintu bihinduka kugira ngo imyumvire y’abantu cyane cyane ihinduke, ikindi ni umuco wo kumva ko abantu buri gihe ari uko bafashwa”.

MINALOC itangaza ko kimwe mu byatumye u Rwanda rushobora kuva aho ruri ari uko rwihaye gahunda yo kwigira, yo kutisuzugura kuko ngo ari igihugu gito. 

MINALOC iragaza ko abantu batifuza gutera imbere nk’igihugu ngo kandi kigire umuturage wasigaye inyuma.

Minisitiri Musabyimana avuga ko MINALOC yifuza ko itangazamakuru riyifasha kwimakaza umuco w’isuku kandi ko hari intambwe irimo kugenda iterwa buri gihe ariko ngo n’urugendo ruracyari rurerure urebye ibiba hirya no hino.

Ati: “Dufite isuku ikunda kuboneka ahantu dushyira imbaraga cyane, ahantu hagaragara mu Mujyi n’ahandi ariko iyo ugiye mu rugo rw’umunyarwanda aho atuye, turifuza ko yaba imyumvire ku isuku, yaba imyitwarire ku isuku, uburyo isuku ikorwa biba umuco w’Umunyarwanda”.

Ahamya ko isuku idahura n’ubukire cyangwa ubukene ahubwo ko isuku ari ikibazo cy’imyumvire.

Isuku ishobora gufasha kurwanya byinshi mu mibazo bibangamiye abanyarwanda, harimo indwara zimwe na zimwe ubona zitagakwiye kuba zikiboneka mu gihugu ndetse n’indwara ziterwa n’umwanda.

Yakomoje ku ivugurura mu buhinzi n’ubworozi

Minisitiri Musabyimana yerekana ko hari ukuvugurura uburyo Abanyarwanda bahinga cyangwa borora cyane ko bizwi ko ubukungu bwabo, hejuru ya 70%, bushingiye ku bikorwa by’ubuhinzi n’ubworozi.

Avuga ko uburyo bikorwamo bidatanga icyizere ku buryo Umunyarwanda yivana mu bukene kandi bizwi ko bishoboka ko byahinduka bikaba byaba umwuga utunze ababikora.

Indi gahunda MNINALOC ifite, ngo ni uguca ubuzererezi bijyanye no kubaka umuryango ubayeho neza kandi utekanye ndetse no gukemura ibibazo bibangamiye imibereho y’abaturage.

Yakomoje ku kibazo cy’ubuzererezi, agaragaza ko ari ikibazo abantu bashobora gufatanya hakagenzurwa uburyo imiryango ikurikiranwa, uburyo abantu bashyira abana mu ishuri bityo bikabarinda kujya mu buzererezi.

MINALOC itangaza ko ku bijyanye no gucunga umutekano w’abaturage n’ibyabo, yifuza ko yafatanya n’itangazamakuru cyane bityo bakarushaho kurwanya igwingira ry’abana, kwimakaza umuco wo kwizigamira kubera ko ni byo bishobora gufasha umuturage kuva mu bukene kurusha uko bimeze.

Mu zindi gahunda nka EjoHeza n’izindi gahunda nziza Leta igenda ishyiraho, MINALOC yifuza ko yabifatanyamo n’itangazamakuru kugira ngo zimenyekane ndetse bafashe n’abantu kuzikoresha neza.

Minisitiri Musabyimana, ashimira uruhare rw’abanyamakuru mu iterambere ry’Igihugu cyane cyane uruhare rukomeye rwo gukangurira Abanyarwanda kwiteza imbere no kugira uruhare mu ishyirwa mu bikorwa bya gahunda za Leta n’abafatanyabikorwa bayo bigamije guhindura imibereho myiza. 

Yanashimye kandi  uburyo abanyamakuru  bafasha iyo Minisiteri kumenya ahari ibibazo bigakurikiranwa mu maguru mashya.

  • NTAWITONDA JEAN CLAUDE
  • Kamena 23, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE