MINEDUC yagaragaje ingamba zo kuzamura ubumenyi bw’ibanze ku bana bato

  • Imvaho Nshya
  • Nyakanga 8, 2023
  • Hashize amezi 11
Image

Minisitiri w’Uburezi Dr Uwamariya Valentine yagaragaje zimwe mu ngamba zatangiye gushyirwa mu bikorwa hagamijwe guteza imbere ubumenyi bw’ibanze mu gusoma, kwandika no kubara.

Yabigarutseho mu nama nyunguranabitekerezo ya kane yateranye ku wa Kane isozwa ejo hashize ku wa Gatanu yigaga ku kuzamura ireme ry’uburezi by’umwihariko kuva mu mwaka wa mbere kugera mu wa Gatatu mu mashuri abanza, hibandwa ku kongera ubumenyi mu kwigisha gusoma, kwandika no kubara.

Izo ngamba harimo guhugura abarezi, kwita ku bana bafite Ibibazo, kongera imfashanyigisho zijyanye n’igihe no kongera isuzumabumenyi ku banyeshuri no gukangurira ababyeyi  gukurikirana imyigire y’abana babo.

Minisitiri Dr. Uwamariya yagize ati: “Tugomba gushyiraho ingamba zihamye zinoza umurimo, ari uguhugura abarimu  mu birebana n’imyigishirize, ari ugusuzuma imyigire y’abana binyuze mu masuzuma ategurwa ku rwego rw’igihugu hagamijwe kureba urwego umunyeshuri ariho.

Dukeneye ko abana bose biga ndetse n’abo mu miryango itishoboye n’abandi baba bafite Ibibazo bakitabwaho kandi n’ababyeyi bakangurirwa kwita no gukurikirana imyigire y’abana babo”.

Buri mwaka abarezi  bahugurwa mu nyigisho zitandukanye, mu cyongereza, mu ikoranabuhanga kandi ibitabo byo kwigiramo bigenda binozwa bikanongerwa bikagezwa ku bigo by’amashuri, integanyagisho ziravugururwa n’ibindi.

Hahuguwe abarezi basaga 40 000, ndetse umubare w’abana bigaga mu mashuri abanza ugenda wiyongera , bari 2 729 116 mu mwaka w’amashuri wa 2020/2021 bagera kuri 2 742 551 mu mwaka w’amashuri wa 2021/2022, bitewe n’ingamba Leta igenda ishyiraho zoroshya imyigire n’imyigishirize, abana bagaburirwa saa sita ku ishuri, abarezi  bongererwa ubumenyi, ababyeyi bagakungirirwa kugira uruhare mu burere n’uburezi bw’abana.

Umurezi  Nyirahabumuremyi Providence wigisha mu mwaka wa mbere w’amashuri abanza, mu Karere ka Rwamagana ku Rwunge rw’amashuri Sasabirago yavuze ko ubumenyi bw’ibanze mu gusoma, kwandika no kubara ari umusingi w’izindi nyigisho umwana ahabwa mu yindi myaka yo hejuru, ashishikariza ababyeyi gushyigikira abana babo babaha ibikoresho by’ishuri ndetse bakabasura ku ishuri ngo bakurikirane imyigire yabo.

Umunyeshuri Ineza wiga ku Rwunge rw’amashuri Remera Catholique mu Karere ka Gasabo yavuze ko imyigire ye yoroshye, atsinda kuko  ababyeyi be bamufasha gusubira mu masomo, ariko ko hari bagenzi be baba bafite ibibazo bishingiye ku muryango bikagira ingaruka ku myigire yabo.

Umubyeyi wari witabiriye iyo nama yavuze ko nk’uba muri komite y’ababyeyi ku ishuri arereraho mu Karere ka Nyagatare bakora ubukangurambaga, inama bagakangurira ababyeyi kwita ku myigire y’abana kuko bifasha umwana mu myigire ye.

Abanyeshuri bo mu cyiciro cya mbere bari bahagarariye bagenzi babo mu nama, bashimye  uko biga ariko banasaba ko ibyumba by’amashuri byakomeza kongerwa ndetse ko bahabwa mudasobwa nabo bakabasha kwiga ari nako binjira mu ikoranabuhanga.

Ireme ry’uburezi kandi rigirwamo uruhare n’abafatanyabikorwa batandukanye harimo Banki y’Isi, Inzego z’uburezi zitandukanye, abanyeshuri n’ababyeyi bikaba bisaba ko bose bafatanya ngo ireme ry’uburezi ryifuzwa rigerweho.

Umurezi Providence

Yanditswe na NYIRANEZA Judith

  • Imvaho Nshya
  • Nyakanga 8, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE