Gusoma, kwandika no kubara ni umusingi w’ubundi bumenyi- MINEDUC

  • Imvaho Nshya
  • Nyakanga 6, 2023
  • Hashize amezi 11
Image

Minisiteri y’Uburezi n’abafatanyabikorwa bahuriye mu nama ya 4 yiga ku bumenyi bw’ibanze ku banyeshuri biga mu cyiciro cya mbere cy’amashuri abanza   biga kwandika, gusoma no kubara, bikaba ari umusingi w’ubundi bumenyi.

Umunyamabanga wa Leta ushinzwe amashuri Abanza n’A yisumbuye Twagirayezu Gaspard, yatangaje ko iyo umwana ahawe ubumenyi bw’ibanze mu kwandika, gusoma no kubara aba abonye umusingi mwiza mu bujyanye n’ubundi bumenyi.

Ati: “Iyi nama yahuriwemo n’Inzego z’uburezi, abarezi, abanyeshuri n’abafatanyabikorwa batandukanye hagamijwe kuganira no kungurana ibitekerezo ku kurushaho guteza imbere urwo rwego kuko bigira uruhare mu myigire yo mu bindi byiciro”.

Yakomeje asobanura ko inama nk’iyo iba igamije kureba ishyirwa mu bikorwa ry’ingamba zigamije guteza imbere ubumenyi bw’ibanze mu myaka itatu y’amashuri abanza.

Ati: “Inama dukora igamije kurebera hamwe uko duhagaze mu gutanga ubumenyi bw’ibanze hibandwa ku myaka 3 ya mbere y’amashuri abanza by’umwihariko cyane cyane mu kwandika, gusoma no kubara.

Impamvu y’iki kiganiro ni uko ubumenyi bw’ibanze mu gusoma, kwandika no kubara ni uko ari ikibazo ku rwego rw’Isi kandi bigaragara ko iyo umwana atahawe ubufasha akeneye muri iyo myaka itatu ya mbere n’ubundi agira n’ibindi bibazo byishi cyane mu yindi myaka ikurikiraho”.

Yanagarutse ku ngamba zashyizweho zo guteza imbere ubwo bumenyi bw’ibanze, yavuze ko harimo inkingi 5 zibandwaho harimo guha ubumenyi abarimu no kubafasha kugira ngo babe bashobora kwigisha neza muri iyo myaka 3 ya mbere.

Gutegura neza imfashanyigisho, byaba ibitabo n’ibikoresho byifashishwa, harimo gutegura integanyanyigisho zanditse neza kandi zifasha abana cyane cyane muri iyo myaka itatu ya mbere.

Uruhare rw’ababyeyi mu guteza imbere uburezi kuko uburezi n’uburere bidakorwa gusa mu ishuri n’abafatanyabikorwa badufasha mu guteza imbere ubumenyi bw’ibanze.

Yavuze kandi ko inama eshatu za mbere zatanze umusaruro, ibyaganiriweho bigatangira guhita bishyirwa mu bikorwa, kandi hakabaho gukorera hamwe ari inzego z’uburezi n’abafatanyabikorwa.

Hari amahugurwa, ibitabo byinshi bigiye gutangwa mu minsi iri imbere, imfashanyigisho zirimo kuvugururwa n’ibindi.

Dr. Tihtina Gebre wo muri Banki y’Isi yashimiye Minisiteri y’Uburezi yateguye  inama ku bumenyi bw’ibanze ku kwandika, gusoma no kubara  kuko ifasha mu rwego rw’uburezi igatanga ubushobozi mu gufasha mu mishinga muri urwo rwego hagamijwe kuzamura ireme ry’uburezi. 

Yakomeje avuga ko Banki y’Isi ifasha mu gutanga ubushobozi ndetse na tekinike hagamijwe gushyira mu ngiro  ingamba zateguwe haba mu gutanga amahugurwa, inyubako z’amashuri, gufasha mu bya tekinike byatwaye ibihumbi 340 by’amadolari y’Amerika.

Umunyeshuri wiga mu mwaka wa kabiri ku Rwunge rw’Amashuri Remera Catholique Ineza Mico L., yatangarije Imvaho Nshya ko yiga neza ariko ko hari bagenzi be baba bafite ibibazo, anasobanura uko abafasha ngo nabo batsinde.

Yagize ati: “Njye niga mu wa gatatu, ndatsinda ibanga ni uko ugukurikira neza mwarimu iyo yigisha kandi ababyeyi badufasha gukora imyitozo mwarimu yaduhaye. Hari abatazi gusoma, kwandika no kubara usanga mu miryango yabo harimo ibibazo bigatuma batiga neza. Icyo tubafasha ni ukubasobanurira.”

Umurezi wo mu Karere ka Rwamagana Nyirahabumuremyi Providense wigisha ku Rwunge rw’Amashuri Sasabirago wigisha mu mwaka wa mbere yavuze ko biteze byinshi ku nama.

Ati: “Ni uburezi bw’ibanze, umwana atagize ubwo bumenyi ntiyazamuka ngo abe uwo twifuza. Biradufaha gusobanukirwe  ndetseturusheho kunguka uko twafasha wa mwana ukiri hasi kuvamo umunyarwanda mwiza kuko azaba yagize intangirio nziza bikazabafasha no kugera hejuru neza”.

Iyi nama nyunguranabitekerezo ku guteza imbere ubumenyi bwo kwandika, gusoma no kubara yateguwe na Minisiteri y’Uburezi MINEDUC na Banki y’Isi iteganyijwe kumara iminsi ibiri kuva 6 kugeza 7 Nyakanga 2023.

Minisitiri w’Uburezi Dr Uwamariya Valentine atangiza inama
Abana n’ababyeyi bafite uruhare ntagereranywa mu myigire

Yanditswe na NYIRANEZA Judith

  • Imvaho Nshya
  • Nyakanga 6, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE