Menya ibizabera mu gitaramo cy’umuraperi Kendrick Lamar i Kigali

  • Imvaho Nshya
  • Ugushyingo 4, 2023
  • Hashize amezi 4
Image

Urwego rw’Igihugu rw’Iterambere (RDB) rwatangaje ko i Kigali mu Rwanda hagiye kubera igitaramo ‘Move Afrika: Rwanda’ kizitabirwa n’umuraperi wo muri Leta Zunze Ubumwe za Amerika Kendrick Lamar Duckworth.

Iki gitaramo cyateguwe na RDB ifatanyije na TimesLive ndetse na PgLang, cyizabera muri BK Arena ku itariki ya 6 Ukuboza 2023.

Nk’uko byatangajwe kandi iki gitaramo kizitabirwa n’abandi bahanzi barimo n’abazaturuka mu karere gusa amazina yabo azatangazwa mu bihe biri imbere.

Ni igitaramo kandi kigamije gushishikariza abayobozi kwihatira gufata ibyemezo byihuse, bashaka ibisubizo by’ibazo  bibangamiye  abaturage b’Umugabane wa Afurika.

Mu bibazo bizagarukwaho hari ugushaka inkunga zigenewe ab’igitsana gore batishoboye, guhangana n’ibibazo by’imihandagurikire y’ibihe, gushaka uko Umugabane wa Afurika wakwihaza mu biribwa, ikibazo cy’uko ababyiruka badahabwa umwanya mu nzego zifata ibyemezo mu by’ubukungu no gushishakariza abaturage kugira umwanya mu bibakorerwa.

Icyo gitaramo Move Afrika kandi cyigamije guhangana n’ibibazo biri mu busumbane mu guhanga imirimo mu batuye Isi ndetse no gushishikariza abakiri bato kwihangira imirimo bakazavamo ba rwiyemezamiro b’ahazaza bakomeye by’umwihariko ku mugabane wa Afurika.

Iki gitaramo kandi abagiteguye bavuga ko kinagamije kumurika Umugabane wa Afurika ko ufite ibyiza byinshi utasanga ahandi ku Isi.

Ni n’umwanya wo guhuza abashoramari mu ngeri zitandukanye kuri uyu mugabane barimo abahanzi,  abacurizi,ibigo ndetse n’abakozi muri gahunda yo kuzamura ubumenyi no kugira uburyo bwo kubona amahugurwa azatuma batera imbere.

Ku bufatanye n’Urwego rw’Igihugu rw’Iterambere RDB ibi bitaramo bya ‘Move Afrika: Rwanda’ biteganyijwe ko bizajya bibera i Kigali buri mwaka mu gihe cy’imyaka itanu iri imbere. Biteganyijwe ko ibi bikorwa ngarukamwaka bizajyana no kongera umubare w’ibihugu bizajya biberamo.

Usibye mu Rwanda Move Afurika yagiye ibera mu bindi bihugu bya Afurika birimo iyabaye muri 2018 mu mujyi wa Johannesburg, muri Afurika y’Epfo yitabirwa n’abahanzi bakomeye barimo Beyoncé, Jay-Z, Ed Sheeran, Usher, Eddie Vedder n’abandi.

Hari icyabereye muri Nigeria mu mujyi wa Lagos mu mwaka wa 2021 cyitabirwa n’abahanzi  nka Davido, Femi Kuti, Tiwa Savage n’abandi, ndetse n’icyo muri Gahna mu mujyi wa Accra cyahurije hamwe abahanzi Usher, SZA, Stormzy, na TEMS cyo muri  2022.

ZIGAMA THEONESTE

  • Imvaho Nshya
  • Ugushyingo 4, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE