Manchester City yabonye umutoza mushya

Manchester City yo mu Bwongereza yamaze gusinyisha Enzo Maresca nk’Umutoza mushya usimbuye Pep Guardiola wari umaze imyaka isaga 10 ayitoza, aho yasinye amasezerano y’imyaka itatu azamugeza mu mwaka wa 2029. Enzo Maresca wavukiye mu Mujyi wa Pontecagnano mu Butaliyani, ku wa 10 Gashyantare 1980, yatangiye umwuga wo gukina umupira w’amaguru mu ikipe ya Bromwich Albion mu Bwongereza akina mu kibuga hagati.

Nyuma y’aho yakiniye amakipe nka Juventus yo mu Butaliyani ndetse na Sevilla FC yo muri Esipanye yanatwaranye na yo igikombe cya shampiyona y’u Burayi (Europa Leauge). Yasoje urugendo rwe nk’umukinnyi mu mwaka wa 2017 ubwo yakinaga mu ikipe ya Hellas Verona.

Umwuga wo gutoza yawutangiye mu 2017 yungirije mu ikipe ya Ascoli Calcio, yungiriza muri Sevilla FC ndetse na West Ham United. Mu 2020-2021 yatoje Manchester City y’abatarengeje imyaka 23, atwara Premier League ebyiri. Mu 2021 yabaye Umutoza Mukuru wa Parma Calcio.

Mu 2022-2023 yabaye Umutoza Wungirije wa Man City yatozwaga na Pep Guardiola. Mu 2023-2024 yabaye Umutoza Mukuru wa Liecter City ndetse anatwarana na yo igikombe cya shampiyona yo mu cyiciro cya kabiri. Kuva mu 2024 kugera mu 2026 yabaye Umutoza wikipe ya Chelsea FC.

Nyuma y’uru rugendo rwose, Enzo yatekerejweho n’ubuyobozi bw’Ikipe ya Manchester City nyuma yuko Pep Guardiola wigaruriye imitima ya benshi asezeye. Ubuyobozi bwa Manchester City bwatangaje ko bwiteze kuri Enzo gukora nk’ibyo Guardiola yakoraga, cyane ko bamaranye umwaka wose amwungirije, amwigiraho, bityo akaba ashobora kugera ikirenge mu cye.