Maj. Gen Murasira yagiranye ibiganiro na Minisitiri w’Ingabo w’u Buhinde

  • NTAWITONDA JEAN CLAUDE
  • Ukwakira 18, 2022
  • Hashize umwaka 1
Image

Minisitiri w’Ingabo w’u Rwanda Maj. Gen. Murasira Albert, ari mu ruzinduko mu Gihugu cy’u Buhinde aho ari mu bayobozi bakuru b’Inzego za Gisirikare bitabiriye Imurikabikorwa rya Gisirikare ry’u Buhinde (DefExpo 2022) ririmo kubera ahitwa Gandhinagar, Gurajat, mu Buhinde.

Kuri uyu wa Kabiri, Minisitiri Maj. Gen. Murasira yahuye na Minisitiri w’Ingabo w’u Buhinde Raksha Mantri Shri Rajnath Singh, bagirana ibiganiro byibanze ku mubano w’u Rwanda n’u Buhinde n’amahirwe ahari y’ubutwererane mu bya gisirikare afitiye inyungu ibihugu byombi.

Minisitiri Rajnath Singh yagize ati: “Nishimiye kuganira na Minisitiei w’Ingabo mu Rwanda  Maj. Gen. Albert Murasira mu gihe harimo kuba imurikabikorwa rya gisirikare (DefenceExpo2022) i Gandhinagar.”

Abandi bayobozi bahuye na Rajnath Singh barimo Minisitiri w’Ingabo w’Armenia Suren Papikyan na Minisitiri w’Ingabo w’Ibirwa bya Maldives Mariya Ahmed Didi, bose bakaba baganiriye ku butwererane mu bya gisirikare hagati y’u Buhinde n’ibihugu baje bahagarariye.

Iri murikabikorwa ribaye ku nshuro ya 12 ririmo kugaragarizwamo akamaro k’inganda zitunganya ibikoresho bya gisirikare hanze y’i Burayi, Leta Zunze Ubumwe z’Amerika n’u Burusiya.

Urugero rutangwa ni urw’uburyo Turikiya ikomeje kongera ibikoresho byayo bya gisirikare ku masoko y’Afurika no mu Burasirazuba bwo Hagati.

Iri murikabikorwa ryitezweho kumara iminsi itanu ririmo kwerekanirwamo ikoranabuhanga rigezweho ryakorewe mu bindi bihugu, nyuma y’aho u Buhinde kimwe n’ibindi bihugu bitandukanye bibonye ko ari ngombwa gushaka ubundi buryo bwo kubona ibikoresho by’umutekano akenshi byakuraga mu Burusiya.

U Buhinde kimwe n’ibindi bihugu, bwamaze igihe kinini bushingiye ubushobozi bwabyo mu bya gisirikare ku bikoresho byavaga mu Burusiya, ariko bitewe n’ibihe icyo gihugu kirimo nyuma yo kugaba ibitero kuri Ukraine, ibikoresho bya gisirikare byoherezwaga hanze byaragabanyutse.

Byatumye Minisiteri y’Ingabo y’u Buhinde itangira gutekereza ku buryo bwo kubaka uruhererekane rushya rwo kugura intwaro n’ibikoresho bya gisirikare rudashingiye ku mbaraga z’u Burusiya.

Kuri ubu u Buhinde bwatangiye kwishakamo ibisubizo birimo no gushinga inganda zikora zimwe mu ntwaro n’ibikoresho bya gisirikare no kwifashisha ubushobozi bw’ibihugu biherereye mu Karere k’Inyanja y’u Buhinde.

Abamurika ibikorwa byabo muri DefExpo 2022 barabarirwa mu 1028, iryo murikabikorwa rikaba ryitabiriwe n’abasaga 3000 baturutse mu bihugu 75.

Indege za gisirikare ni bKimwe mu bikoresho bya gisirikare birimo kumurikwa mu Buhinde
  • NTAWITONDA JEAN CLAUDE
  • Ukwakira 18, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE