M23 yarahiriye gusubiza FARDC yishe abayobozi bayo 2

  • NTAWITONDA JEAN CLAUDE
  • Mutarama 18, 2024
  • Hashize ukwezi 1
Image

Inyeshyamba za M23 zarahiriye gusubiza ingabo za Repubulika Iharanira Demokarasi ya Congo (FARDC) zarenze ku mabwiriza yo guhagarika imirwano by’agateganyo zikabagabaho ibitero by’indege nto zitagira abapilote (drones).

Ibyo bitero byagabwe ku wa Kabiri tariki ya 16 Mutarama 2024, bikaba byarahitanye abasirikare babiri mu bayobozi b’izo nyeshyamba.

Umuvugizi wa M23 Lawrence Kanyuka, ntiyatangaje amazina y’abayobozi biciwe muri ibyo bitero bya drone byareshwe ku birindiro bya M23 biherereye i Kitchanga mu Ntara ya Kivu y’Amajyaruguru.

Amakuru agera ku Imvaho Nshya ataragenzurwa neza avuga ko abasirikare bakuru ba M23 bashobora kuba baguye muri icyo gitero cya drones ari Col Castro Elise Mberabagabo wari ushinzwe ubutasi n’ububanyi n’amahanga, hamwe na Col Erasto Bahati.

Kanyuka, mu itangazo yashyize ahagaragara, yagize ati: “Leta ya Kinshasa yarenze kuri gahunda yo guhagarika imirwano igaba ibitero ku ngabo zacu, ikora ubwicanyi aho ducungira umutekano, bwahitanye babiri mu bayobozi bacu.”

Yakomeje agira ati: “M23 yumvise ubutumwa yohererejwe na Leta ya Kinshasa kandi igiye kubusubiza uko bwaje.”

Yakomeje avuga ko M23 yubahirije gahunda yo guhagarika imirwano yari yasabwe na Leta Zunze Ubumwe z’Amerika mu kwezi k’Ukuboza 2023.

Nubwo Leta Zunze Ubumwe z’Amerika zari zavuze ko impande zombi zemeranyijwe guhagarika imirwano, M23 yakomeje gushinja Guverinoma ya Congo kurenga kuri ayo mabwiriza imisha ibisasu bikomeye mu bice bituwe cyane mu Ntara ya Kivu y’Amajyaruguru.  

Ingabo za FARDC zakomeje gushinjwa imikoranire n’imitwe y’iterabwoba nka FDLR yashinzwe n’abasize bahekuye u Rwanda muri Jenoside yakorewe Abatutsi, ndetse n’indi mitwe yitwaje intwaro nka Mai Mai, Wazalendo n’iyindi.

Kanyuka yavuze ko M23 ishima imbaraga abayobozi bo mu Karere ndetse n’abo ku rwego mpuzamahanga bakomeje gushyira mu guharanira ko amakimbirane muri icyo gihugu yakemurwa binyuze mu nzira y’amahoro.

Guverinoma ya Kinshaka kugeza n’uyu munsi yaratsimbaraye ivuga ko idashobora kugirana ibiganiro na M23, umutwe w’inyeshyamba ifata nk’uw’iterabwoba.

Hagati aho, amakuru yakomeje gukwirakwira mu bitangazamakuru agaragaza ko ku wa Kabiri habaye imirwano mu bice bitandukanye bya Masisi.

Nubwo Umuryango Mpuzamahanga wakomeje guhamagarira Leta ya RDC guhitamo inzira y’amahoro, Ingabo za FARDC ndetse n’izoherejwe n’Umuryango w’Ubukungu w’Ibihugu by’Afurika y‘Amajyepfo (SADC) batangaje ko bagiye kugaba ibitero simusiga kuri izo nyeshyamba.

Bivugwa kandi ko ingabo zoherejwe n’uwo Muryango uhuriwemo n’ibihugu 10 umaze iminsi wohereza ingabo zawo mu Burasirazuba bwa RDC, guhera mu kwezi k’Ukuboza 2023.

Uburasirazuba bwa RDC bubarirwamo imitwe yitwaje intwaro isaga 130 yateje umutekano muke muri kano Karere kuva mu myaka 30 ishize.

Hagiye hoherezwa ubutabazi butandukanye burimo n’Ingabo zoherejwe n’Umuryango w’Abibumbye mu butumwa bw’amahoro (MONUSCO), ariko ubwo butabazi bwose bwagiye bunanirwa.

Inyeshyamba za M23 zo zavutse mu kwirwanaho nyuma yo kubona ko hari imiryango y’Abanyekongo baburiye amahoro ku butaka bwabo, bitewe n’iyo mitwe y’urudaca yigamje n’iyasaritswe n’ingengabitekerezo ya Jenoside.

  • NTAWITONDA JEAN CLAUDE
  • Mutarama 18, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE