Leta yijeje abafite ubumuga koroherezwa kubona insimburangingo n’inyunganirangingo

  • NTAWITONDA JEAN CLAUDE
  • Kamena 15, 2023
  • Hashize amezi 10
Image

Abantu bafite ubumuga mu Rwanda bagaragaza ko bahura n’inzitizi zikomeye zo kugera ku bitaro by’icyitegererezo bafatiraho inyunganirangingo n’insimburangingo kuko  usanga biri kure kandi bikabasaba kubanza kunyura ku bigo nderabuzima n’Ibitaro by’Uturere.

Minisiteri y’Ubutegetsi bw’Igihugu (MINALOC), yijeje abafite ibyo bibazo ko hari gahunda yo kuborohereza kubona izo nsimburangingo n’inyunganirangingo bitabasabye gusiragira. 

Umwe mu bafite ubumuga witwa Kayitesi Marie Laetitia ushinzwe Komisiyo y’Imibereho Myiza mu Nama y’Igihugu y’Abantu bafite ubumuga mu Mujyi wa Kigali, yagize ati: “Umuntu ufite ubumuga kugeza ubungubu afite inzitizi zikomeye cyane kubera urugendo rurerure dukora kugira ngo tuzagere kuri cya kigo cy’icyitegererezo duhabwe inyunganirangingo n’insimburangingo; guhera ku Kigo Nderabuzima nkagera ku bitaro by’Akarere nkazagera kuri cya Kigo cy’icyitegererezo ni ikibazo gikomeye”.

Yunzemo ati: “Niba inyunganirangingo yanjye ipfuye kuki ngomba guca aho hasi hose ntabasha no kugenda bizansaba uza kumperekeza kandi na we ataboneka”.

Kayitesi yanagaragaje ko hari n’ikibazo cyo kubona Inkoni yera yifashishwa n’abafite ubumuga bwo kutabona n’utwuma two mu matwi dukoreshwa n’abafite ubumuga bwo kutumva. Ati: “Kuri ibyo bigo by’icyitegererezo ko tutabibona, ubwo  bazamera bate?”

Mbabazi Olivia Perezida w’Inama y’Igihugu y’Abantu bafite Ubumuga (NCPD)na we yagaragaje ko hakiri imbogamizi mu kubona inyunganirangingo n’insimburangingo kuko bidashobora kuboneka mu Gihugu hose.

 Ati: “Ni ibitaro 4 gusa mu Gihugu hose, usanga hari umuntu uturuka kure bigora kubigeraho, iyo ashatse kujya ku bindi bitaro ataribukoreshe Mituweli biramuhenda cyane. Iyo ni imbogamizi ariko Leta y’u Rwanda ntihwema gushakira abafite ubumuga icyabateza imbere, hari gahunda nziza y’uko bizongerwa bikagera mu gihugu hose”.

Nubwo hari imbogamizi zikigaragara, Ingabire Assumpta Umunyamabanga wa Leta  muri Minisiteri y’Ubutegetsi bw’Igihugu (MINALOC) ushinzwe Imibereho Myiza, mu kiganiro n’itangazamakuru yavuze  ko hari byinshi byakozwe kuva aho hagiriyeho Inama y’Igihugu y’Abantu bafite ubumuga. 

Ku kibazo cy’uko  ibitaro by’icyitegererezo abafite ubumuga bafatiraho insimburangingo n’inyunganirangingo biri kure, yavuze ko hari gahunda yo kubyongera bikagera mu turere twose tw’Igihugu.

Ati: “Ubu abantu bafite ubumuga serivisi nyinshi z’ubuzima, iz’uburezi budaheza zibageraho. Mvuze nko mu rwego rw’ubuzima; ku bafite ibibazo by’ingingo, hari ibitaro  bikuru bigeze kuri 4 bitanga iyo serivisi bikishyurwa binyuze muri Mituweli;  aho tutaragera ni uko bitarakwira hose mu gihugu, hagiye hari ibitaro by’uturere twifuza ko bigera ahongaho, kuko ni serivisi zihenze cyane ni yo mpamvu birimo gufata igihe kugira ngo bigerweho ariko tuzi neza ko muri buri gace k’Igihugu hari aho abakeneye insimburangingo n’inyunganirangingo bazibona”.

Yavuze ko hari ibindi bitaro bitanga ziriya serivisi ariko ntizishyurwe hakoreshejwe Mituweli, yijeje ko hari ibiganiro birimo gukorwa kugira ngo no kuri ibyo bitaro ikoreshwe bityo serivisi zirusheho kwegera abantu bafite ubumuga.

Ingabire Assumpta yakomeje agira ati: “ Icyo turimo gusaba RSSB ( Urwego rw’Igihugu rw’Ubwiteganyirize mu Rwanda) ni uko  muri uyu mwaka w’ingengo y’imari tugiye gutangira no kuri ibyo bitaro izo serivisi zajya kuri Mituweli kugira ngo tworohereze abantu bafite ubumuga”.

Kugeza ubu ibyo bitaro bitanga insimburangingo n’inyunganirangingo  kuri Mituweli ni HVP Gatagara, Ibitaro bya Kaminuza bya Butare (CHUB), Ibitaro bya Rilima n’ibya Musanze.

  • NTAWITONDA JEAN CLAUDE
  • Kamena 15, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE