Kwibohora 29: Umujyi wa Kigali watashye ibikorwa by’iterambere urubyiruko rurahanurwa (Amafoto)

  • NTAWITONDA JEAN CLAUDE
  • Nyakanga 5, 2023
  • Hashize amezi 11
Image

Hirya no hino mu Mujyi wa Kigali hatashywe ibikorwa by’iterambere mu rwego rwo kwizihiza Umunsi Mukuru wo Kwibohora ku nshuro ya 29. Ubuyobozi bw’Umujyi wa Kigali bwasabye urubyiruko kugira umutima w’Inkotanyi.

Byagarutsweho n’Umuyobozi w’Umujyi wa Kigali Pudence Rubingisa, ku wa Kabiri taliki 04 Nyakanga 2023 ubwo hatahagwa ibikorwa by’iterambere byagizwemo uruhare n’abaturage mu Karere ka Kicukiro.

Bimwe mu bikorwa byatashywe harimo Inzu Mberabyombi y’Umurenge wa Kanombe yuzuye itwaye amafaranga angana na 61,700,000. 

Hatashywe kandi inzu y’ubucuruzi igezweho mu Murenge wa Nyarugunga n’imihanda ya Kaburimbo mu Murenge wa Niboye ireshya na Kilometero 3.25 yuzuye itwaye miliyoni 222 z’amafaranga y’u Rwanda.

Pudence Rubingisa, Meya w’Umujyi wa Kigali, yifatanije n’abaturage b’Akarere ka Kicukiro mu gutaha ibi bikorwa bitandukanye by’iterambere byagezweho ku bufatanye n’abafatanyabikorwa batandukanye ndetse n’abaturage.

Rubingisa yashimye Ingabo za RPA zabohoye u Rwanda, yibutsa urubyiruko kugira umutima w’Inkotanyi wo gukunda Igihugu no kucyitangira.

Yatangaje ko ibikorwa byatashywe, byakozwe mu Mirenge yo muri Kicukiro ndetse no hirya no hino mu Mirenge igize Umujyi wa Kigali, biragaragaza ubwitange n’ubushake abaturage bakomeje kugaragaza mu iterambere ry’Umujyi wabo.

Akomeza agira ati: “Turasabwa ko icyerekezo gishya turimo cyo kubaka iterambere rirambye kandi rizira guheza uwo ari we wese tugomba kukigendanamo n’urubyiruko kugira ngo rugire imyumvire myiza no kwitanga nk’ukwaranze Ingabo zari iza RPA zabohoye igihugu cyacu”.

Rubingisa yashimye Akarere ka Kicukiro katangije gahunda yo kwiyubakira imihanda bikozwe n’abaturage bakunganirwa n’Umujyi wa Kigali.

Iyi gahunda imaze gutanga umusaruro ku rwego rw’Umujyi wa Kigali.

Dr. Mpabwanamaguru Merard, Umuyobozi w’Umujyi Wungirije ushinzwe Imiturire n’Ibikorwa remezo, yifatanyije n’abaturage b’Umurenge wa Jabana mu Karere ka Gasabo gutaha Isoko rya Nyacyonga ryubatswe ku buryo bugezweho, aho ryuzuye ritwaye amafaranga y’u Rwanda asaga miliyoni 500.

Yanifatanyije n’abaturage bo mu Murenge wa Kinyinya na wo uherereye mu Karere ka Gasabo mu gutaha isoko rizafasha urubyiruko rwavuye mu bigo ngororamuco n’isoko rya koperative ‘Twiteze Mbere Batsinda’.

Urujeni Martine, Umuyobozi w’Umujyi wa Kigali wungirije ushinzwe imibereho myiza n’ubukungu, yifatanyije n’abaturage b’Umudugudu wa Rugarama mu Kagari ka Rugarama mu Murenge wa Nyamirambo, Akarere ka Nyarugenge, ahatashywe inzu yubakiwe ababyeyi.

  • NTAWITONDA JEAN CLAUDE
  • Nyakanga 5, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE