Kwibohora 29: Muri Ngororero barashimira Perezida Kagame iterambere yabagejejeho

Mu kwizihiza Isabukuru y’imyaka 29 ishize u Rwanda rubohowe n’Ingabo za FPR, mu Karere ka Ngororero barashimira Perezida wa Repubulika Paul Kagame ibikorwa by’iterambere bitandukanye yabagejejeho.

Ni ibirori byabereye kuri Sitade y’Akarere mu Murenge wa Ngororero, ku nsanganyamatsiko igira iti ‘Kwibohora 29 isoko yo Kwigira’.

Bimwe muri ibyo bikorwa bakesha imiyoborere myiza irangajwe imbere na Nyakubahwa Perezida Paul Kagame harimo inzu zubatswe ku bufatanye bwa Leta, Akarere, abafatanyabikorwa n’abaturage bakora umuganda.

Hatashywe inzu 28 zubakiwe abarokotse Jenoside yakorewe Abatutsi mu 1994, inzu 32 zasanwe nyuma y’uko zari zangijwe n’ibiza, ibyumba by’amashuri 12 n’izindi nyubako zubatswe ku bigo by’amashuri, ndetse hamuritswe bimwe mu bikorwa by’abafatanyabikorwa.

Umuyobozi w’Akarere ka Ngororero, Nkusi yashimiye Ubuyobozi bw’Igihugu ndetse na buri wese wagize uruhare mu iyubakwa ry’azo, asaba abagenerwabikorwa kuyafata neza bakomeza kwiteza imbere.

Ati: “Ndashimira Ubuyobozi Bukuru w’Igihugu bwagizeuruhare mu iyubakwa ry’izi  nzu ndetse na  wese wagize uruhare mu iyubakwa ry’inzu zatashywe. Mboneyeho no gusaba abagenerwabikorwa kuzazifata neza”.

Yibukije abitabiriye umunsi wo kwizihiza Isabukuru y’imyaka 29 ishize u Rwanda rubohowe ko nyuma y’uko Jenoside ihagaritswe na FPR, hashyizweho gahunda zigamije kuzamura Imibereho myiza y’abaturage, abasaba kugira icyerekezo kigamije iterambere u Rwanda rwifuza, kwita ku bikorwa biteza imbere imibereho y’umuturage, gukomeza gutanga umusanzu wabo mu kubaka ubumwe bw’Abanyarwanda, gukomeza kugira uruhare mu miyoborere myiza y’Igihugu no kwitabira gahunda za Leta.

Umwe mu bagenerwabikorwa washyikirijwe inzu yashimye Ubuyobozi bwiza bubatekerezaho, ashima umutekano igihugu gifite n’ibindi, maze ashimangira ko inzu ahawe azayifata neza.

Nyuma yo gutaha inzu habayeho kumurika ibikorwa byagezweho bigaragaza ko abaturage bibohoye, indirimbo n’imivugo, n’ikiganiro kijyanye n’umunsi wo kwibohora.

Ibirori byitabiriwe n’inzego z’abayobozi zitandukanye na Komite Nyobozi y’Akarere, visi Perezida w’Inama Njyanama y’Akarere, abayobozi b’Inzego z’umutekano zikorera mu Karere, abafatanyabikorwa b’Akarere n’imbaga y’abaturage bagaragaje aho bageze mu iterambere bakesha kuba u Rwanda rwaribohoye.

Ibirori byasojwe n’umupira w’amaguru, wahuje ikipe y’inzego z’umutekano zikorera mu Karere n’urubyiruko rw’Umurenge wa Ngororero, wasoje urubyiruko rutsinze 2-0.