Kubonera amagare abafite ubumuga bw’ingingo mu Rwanda ntibikiri ikibazo- NCPD

  • NTAWITONDA JEAN CLAUDE
  • Ukwakira 21, 2022
  • Hashize imyaka 2
Image

Inama y’Igihugu y’Abantu bafite Ubumuga (NCPD) iravuga ko ikibazo cy’abafite ubumuga  bw’ingingo bakeneye amagare cyabonewe igisubizo; binyuze mu bufatanye n’abafatanyabikorwa aya magare yatangiye gutangwa.

Ndayisaba Emmanuel Umunyamabanga Nshingwabikorwa wa NCPD yagize ati: “ Icyo nagira ngo mbwire abafite ubumuga bw’ingingo bakeneye amagare ni uko icyo kibazo kuri twebwe cyabonewe igisubizo. Si na cyo gusa ubu noneho batangiye no kuduha n’ibindi birimo imbago kuko na zo ziba zikenewe n’abantu benshi cyane”.

Yabigarutseho ku wa 20 Ukwakira 2022, ubwo i Kigali hasozwaga amahugurwa y’abakora kwa muganga  bashinzwe ibikorwa by’ubugororangingo n’abashinzwe ibikoresho bikoreshwa kwa muganga(physiotherapists, biomedical technicians) bo mu bitaro binyuranye  mu Gihugu. Yateguwe ku bufatanye bw’Ikigo cy’Igihugu gishinzwe Ubuzima (RBC) na NCPD.

Ni mu gihe hatangiye gutangwa amagare 500 agiye gufasha abafite ubumuga hirya no hino mu Gihugu, imbago zigeze kuri 500 , Inkoni zera zigeze ku 1000,  binyuze mu bufatanye n’Itorero “The Church  of Jesus Christ Of Latter Day Saints”.   

Ndayisaba yavuze ko iri torero ryabijeje ko amagare yakenerwa yose yaboneka.

Nubwo hagitegerejwe imibare mishya izava mu ibarura ry’abantu bafite ubumuga riri hafi gukorwa, yifashishije imibare yo mu  mwaka wa 2015, ubwo abafite ubumuga bagera ku bihumbi 154 bashyirwaga mu byiciro, yavuze ko basanze abakeneye amagare bari ibihumbi 17, abakeneye imbago bari hafi ibihumbi 42.

Ati: “…abakeneye imbago bari ibihumbi  42 tukaba tumaze guha abantu bageze ku bihumbi 3 urumva ko hari hagikenewe nyinshi cyane na zo rero batangiye kuzizana, kandi turizera ko ubwo inzira zamaze gufunguka kuko kuva mu  Bushinwa uza mu Rwanda zari zigoye mu minsi yashize (kubera COVID-19), bizashoboka”. 

Abahawe inyunganirangingo ku ikubitiro, akanyamuneza ni kose. Niyonsaba Françoise Sawuda wo mu Murenge wa Mageragere mu Karere ka Nyarugenge afite ubumuga bwo kutabona, yishimiye ko yahawe Inkoni yera isimbura iyo yari afite yashaje. 

Ati: “Iyi nkoni ituma mbasha kumenya aho ngenda uko hameze, uko hareshya, ku buryo ntasitara cyangwa ngo mbe nagonga ikintu. Abayimpaye bakoze!”

Nahimana Enatha yahawe igare, na we ati: “Igare narihawe ni uko ntararishyikira babuze irinkwira, ariko bazarinzanira. 

Nabyakiriye neza, nzabasha kujya ngera aho abandi bari, nko ku rusengero, nanjye nzajya ngira uruhare mu bikorwa bya Leta kuko nari naraheranwe no gukambakamba mu rugo kuko nta gare nari mfite”. 

Kuba iyi gahunda igendana no guhugura abakozi b’ibitaro batanga inyunganirangingo bigamije gukumira ko hari abahabwa izidahuye n’ibipimo bafite zikabagiraho  ingaruka.

Bagahirwa Irène umukozi wa RBC ushinzwe ibikomere byo ku mubiri n’ubumuga, yagarutse by’umwihariko ku magare, ati: “Amagare ni kimwe mu bintu twifuza ko byatangwa mu buryo bwa kinyamwuga kugira ngo wa  muntu wari ufite ubumuga asanganywe  igare ritaza  ritamukwira cyangwa rifite ikindi kibazo rikaba ryamutera ubundi bumuga bwiyongereyeho, ni yo mpamvu dushyiraho amahugurwa”.

Nahimana Enatha wahawe igare

Abahuguwe bavuga ko ubumenyi bahawe ku magare y’abafite ubumuga kuyatanga no kuyakora, imikoreshereze y’imbago n’Inkoni yera,  bugiye kuziba icyuho cyari mu gutanga inyunganirangingo. 

Umwe muri bo ati: Twarishimye tumaze kumva ko hateguwe aya mahugurwa, aziye igihe, tugiye gukora umurimo utoroshye wo kugeza ibi bikoresho ku bagenerwabikorwa tubafasha kubibungabunga, gutanga amagare no kuyakurikirana bizagenda neza”. 

Steven Hunter umuganga mu bijyanye n’ubugororangingo uhagarariye iki gikorwa cyo gutanga inyunganirangingo muri ririya torero, yavuze ko hashize imyaka 10 bazitanga  mu Rwanda ku buntu ndetse bakanahugura abakozi bo kwa muganga bashinzwe kuzitanga, yashimye ubufatanye bagirana n’inzego bireba mu Gihugu butuma bigenda neza.

Kugeza ubu abakozi bamaze guhugurwa ni 100 mu gihugu hose, RBC ikaba ivuga ko hakiri ubuke bw’abakozi ariko bazakomeza kongerwa.

  • NTAWITONDA JEAN CLAUDE
  • Ukwakira 21, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE