Kubaka aho gucumbikira abahuye n’ibiza ntibizarenza amezi 6 – Dr Ngirente

  • NTAWITONDA JEAN CLAUDE
  • Nyakanga 3, 2023
  • Hashize amezi 11
Image

Minisitiri w’Intebe, Dr Edouard Ngirente, mu kiganiro yagejeje ku Nteko Ishinga Amategeko ku wa Gatanu taliki 30 Kamena 2023, kirebana na gahunda yo guhangana n’ibiza, yavuze ko Guverinoma yafashe gahunda yo kubaka muri buri Karere site yo gucumbikira by’igihe gito abaturage bahuye n’ibiza, bikaba biteganyijwe ko iyi gahunda itazarenza amezi atandatu.

Dr Ngirente yabigarutseho ubwo yagezaga ku Nteko Ishinga Amategeko imitwe yombi, bimwe mu byo Guverinoma yakoze n’ibiteganywa gukorwa mu gucunga no guhangana n’ibiza.

Yongeyeho ati: “Ubu twafashe gahunda y’uko muri buri Karere tugiye gukoramo site imwe nziza, ifite ibikorwa remezo by’ibanze bikenerwa mu buzima bwa buri munsi, iyo site ikaba izwi. Igihe cyose dukeneye guhungisha abantu bikaba bizwi ko hari ahantu tubatwara”.

Mu guhangana ndetse no kugabanya ingaruka z’ibiza ku baturage, Minisitiri w’Intebe, Dr Ngirente yasabye abagituye mu manegeka kuhava, bagatuzwa ahatateza ingorane ubuzima bwabo.

Yakomeje asobanura ko mu ijoro yo ku italiki ya 02 rishyira iya 03 Gicurasi 2023, ibiza byahitanye abantu 135 mu Ntara y’Amajyaruguru, iy’Uburengerazuba n’iy’Amajyepfo,  Leta ishyiraho site 93 zagenewe kuba zicumbikiye abarokotse ibiza.

Muri rusange icyegeranyo cy’ibyangijwe n’ibiza byabaye muri Gicurasi 2023, kigaragaza ko bifite agaciro k’amafaranga y’u Rwanda asaga miliyari 222. 

Ibyo byatumye Leta itekereza ko hakwiye gushyirwaho ahantu hahoraho hashobora kwifashishwa mu gucumbikira abagerwaho n’ibiza kuko bidateguza.

  • NTAWITONDA JEAN CLAUDE
  • Nyakanga 3, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE