Kongera umusaruro bisaba uruhare rwa buri wese – Perezida Kagame

  • NTAWITONDA JEAN CLAUDE
  • Nyakanga 5, 2023
  • Hashize amezi 11
Image

Perezida wa Repubulika y’u Rwanda Paul Kagame, yasobanuye ko iterambere ry’igihugu muri rusange risaba uruhare rwa buri wese, by’umwihariko abantu bagakora cyane, bakongera umusaruro bakihaza mu biribwa, bityo n’ibiciro by’ibiribwa ntibikomeze kuzamuka.

Yabigarutseho ejo hashize ubwo hizihizwaga Kwibohora ku nshuro ya 29, mu kiganiro cyatambutse kuri Televiziyo y’u Rwanda, ubwo yabazwaga igikorwa  kugira ngo ibiribwa bibe bihagije n’ibiciro ntibikomeze kuzamuka. 

Yagize ati: “Kongera umusaruro muri buri kintu cyose dukora, ari abahinzi, ari aborozi, ari abashoramari mu gihugu, bigomba kwiyongera, igihe umusaruro utazamuka ndetse ku muvuduko wo hejuru tuzahora dufite icyo tubuze, kuko ibiciro bizamurwa n’uko ibikenewe ku isoko bidahari”.

Yatanze urugero ku gihingwa cy’ibigori asobanura ko iyo umusaruro ari muke ibiciro bizamuka.

Ati: “Nk’abahinzi b’ibigori, igihe umusaruro utari hejuru Ibigori bizabura ku isoko, tuzakenera kubivana hanze, igiciro  ni nako kizamuka. Ariko twese nidukomeza gushyira hamwe umusaruro ukazamuka, uzazamuka ari uko twashyizemo imbaraga, ari ku ruhande rwa Leta, gushyiramo ishoramari, ariko noneho ari abikorera, ari abaturage bose bashyiramo imbaraga kugira ngo umusaruro uzamuke. Ntabwo umusaruro ushobora kuva ku ruhande rumwe gusa”.

Hari impande ebyiri, Leta Ku bijyanye  no gukemura ibibazo yavuze ko hari uruhande rwa Leta ikora ibishoboka, nko mu gutwara abantu, hari bisi nyinshi zatangiye kuhagera ngo bizafashe kunoza ingendo.

Amafaranga yagiye ahabwa bantu ku buryo bworoshye bw’inguzanyo idahenze kugira ngo bashobore kongera kuzamura umusaruro wazahajwe na Covid-19.

Hari ibikorwa byashyizweho byunganira mu buhinzi, nko kuhira kugira ngo igihe imvura yabuze abantu bazakomeze imirimo.

Ku  ruhande rumwe yavuze ko hari abantu babishinzwe mu nzego za Leta banabifitiye ubushobozi ariko batuzuza ibya ngombwa, badakora ibyo  bakwiye kuba bakora nk’uko Leta yifuza ko bikorwa. 

Ku rundi ruhande yavuze ko abakwiye kuba babikoresha bikabunganira nabo hari benshi badakora ibyangombwa.

Umukuru w’Igihugu Yagize ati: “Urugamba ruriho ni uguhora tugerageza kubihuza ariko n’abantu bakabazwa ibyo bakwiye kuba bakora. Ni ukongera imbaraga, ni ukongera kubaza abantu,ni ukongera gukangurira abantu gukora ibyo bakwiye kuba bakora ,Leta mu bushobozi ifite ikunganira abatishoboye ariko bashaka gukora.Ni uguhozaho abantu bagerageza gukora ibishoboka”.

Yavuze kandi ko ubukungu bwazamutse ku kigero kiri hejuru mu gihembwe cya mbere cy’umwaka, bikaba bisobanuye ko hari igikorwa.

  • NTAWITONDA JEAN CLAUDE
  • Nyakanga 5, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE