Koga: Niyibizi agiye kwerekeza mu kigo cy’imyitozo muri Thailand

  • Imvaho Nshya
  • Mata 26, 2022
  • Hashize imyaka 2
Image

Nk’uko tubikesha ishyirahamwe ry’umukino wo Koga mu Rwanda “RSF”, Niyibizi Cedric usanzwe akinira ikipe ya Vision JN y’i Rubavu ndetse n’ikipe y’Igihugu, taliki 01 Gicurasi 2022 ni bwo azahaguruka mu Rwanda yerekeje i Phuket muri Thailand mu kigo cy’imyitozo “FINA Training Centre” kiri  mu rwego rwo kuzamura imikinire ye akazagaruka mu Rwanda umwaka utaha wa 2023.

Iyi gahunda yo gufasha abakinnyi kuzamura urwego rwabo ikorwa na RSF ku bufatanye n’ishyirahamwe ry’umukino wo Koga ku Isi “FINA”. Niyibizi akaba abaye umukinnyi wa 3 w’Umunyarwanda ugiye kongera ubumenyi hanze y’u Rwanda muri iyi gahunda nyuma ya Maniraguha Eroi na Isihaka Iradukunda nabo bagiye kwitoreza hariya. 

Muri rusange iyi gahunda “FINA Scholarship” ifasha abakinnyi kujya kwitoreza mu bigo by’imyitozo “Training Center” hashize imyaka 8 u Rwanda ruyitabira, aho rwatangiye kohereza abakinnyi guhera muri 2015.

Uretse kongerera abakinnyi ubumenyi mu mukino wo Koga, iyi gahunda inifashishwa mu gutegura abakinnyi bitabira  imikino Olempike ndetse na shampiyona y’Isi.

Muri 2016, Maniraguha Eroi akaba yaraserukiye u Rwanda mu mikino Olempike avuye muri Thailand. Maniraguha kandi yitabiriye imikino Olempike 2020 yabaye umwaka ushize wa 2021 avuye mu kigo cy’imyitozo cya Kazan mu Burusiya.

Gutoranya abakinnyi bitabira iyi gahunda, RSF igendera ku bahagaze neza mu gihugu hashingiwe ku marushanwa bitabiriye. 

Umuyobozi wa Tekinike muri RSF, Rukundo Patrick atangaza ko kujya kwitoreza muri kiriya kigo bigirira akamaro gakomeye abakinnyi b’Abanyarwanda, kuko bitozanya n’abandi bakomeye ku rwego rw’Isi bigatuma  bazamura urwego rw’imikinire.

Akomeza avuga ko urwego umukinnyi ariho rurazamuka bitewe n’uko aba afashwe ndetse n’ibikorwa remezo bimufasha kwitoza birimo nka Pisine ijyanye n’igihe kuko bibafasha kugabanya ibihe yari asanzwe akoresha haba hano mu Rwanda ndetse no ku rwego mpuzamahanga.

  • Imvaho Nshya
  • Mata 26, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE