Koga: Ikipe y’u Rwanda yegukanye imidali 4 mu irushanwa ry’Akarere ka 3

  • Imvaho Nshya
  • Ugushyingo 22, 2022
  • Hashize umwaka 1
Image

Kuva taliki 17 kugeza 20 Ugushyingo 2022 i Dar es Salaam muri Tanzania habereye irushanwa mpuzamahanga ry’Akarere ka 3 “CANA Zone 3 Swimming Championship 2022”.

Muri iri rushanwa, u Rwanda rwari rwaserukiwe n’abakinnyi 5 aho muri rusange rwegukanye imidali 4 harimo ibiri ya Zahabu n’indi ibiri ya Feza.

Aba bakinnyi b’u Rwanda bahatanye muri Pisine ndetse no mu mazi magari “Open Water”.

Uko ikipe y’u Rwanda yitwaye

Abakinnyi bari baserukiye u Rwanda ni Ishimwe Claudette (CS Karongi), Maniraguha Eloi (Mako Sharks SC), Iradukunda Eric (CS Karongi), Dusabe Claude (CS Karongi) na Nyirabyenda Neema Clementine (CS Karongi). Umutoza wajyanye n’ikipe ni Niyomugabo Jackson.

Ku munsi wa mbere, taliki 17 Ugushyingo 2022,  Ishimwe Claudette, Dusabe Claude na  Eric Iradukunda bahatanye muri metero 800 muri “Freestyle” naho Maniraguha Eloi ahatana muri metero 50 muri “Breaststroke”. Aba bakinnyi bakaba nta mudali begukanye.

Taliki 18 Ugushyingo 2020,  Ishimwe Claudette, Dusabe Claude na  Eric Iradukunda bahatanye muri metero 400 ariko ntihagira uwegukana umudali.  Maniraguha Eloi yahatanye muri metero 50 muri “Butterfly” yegukana umudali wa Zahabu.

Umutoza w’ikipe y’igihugu, Niyomugabo Jackson na we wakiniye ikipe y’igihugu yahatanye mu bakanyujijeho “Masters Swimmers”  aho yegukanye umudali wa Feza muri metero 50 muri “Butterfly”.

Ku munsi wa gatatu, taliki 19 Ugushyingo 2022, Maniraguha Eloi yahatanye muri metero 50 muri “Freestyle” ntiyabasha kwegukana umudali. Mu bakanyujijeho, umutoza  Niyomugabo Jackson  yegukanye umudali wa Zahabu muri metero 50 muri “Freestyle”.

Ku munsi wa nyuma w’iri rushanwa, taliki 20 Ugushyingo 2022, habayeho guhatana mu mazi magari “Open Water” mu ntera ya kilometero 4 aho abakinnyi 4 b’u Rwanda bakinnye bakuranwa “Relay”. Iyi kipe y’u Rwanda yegukanye umwanya wa kabiri ikoresheje iminota 54, amasegonda 27 n’ibice 12. Ku mwanya wa mbere haje Sudani naho Kenya iza ku mwanya wa gatatu.

Abakinnyi bahatanye ni Dusabe Claude, Maniraguha Eloi, Iradukunda Eric  na Nyirabyenda Neema Clementine.

Nyuma y’iri rushanwa,  Tanzania ni yo yasoje ku mwanya wa mbere n’amanota 3,061 ikurikirwa na Kenya n’amanota 2768 naho ku mwanya wa 3 haza Uganda n’amanota 2521.

Muri rusange irushanwa ry’uyu mwaka  “CANA Zone 3 Swimming Championship 2022” ryari ryitabiriwe n’ibihugu 10 harimo 7 byo mu Karere ka 3 (Rwanda, Burundi, Uganda, Sudan Djibouti, Ethiopia, Tanzania  na Kenya) n’ibindi 2 byo mu Karere ka 4 (Afurika y’Epfo na Zambia).

  • Imvaho Nshya
  • Ugushyingo 22, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE