Koga:  Abakinnyi babiri baserukiye u Rwanda muri shampiyona y’Isi  baviriyemo mu majonjora

  • Imvaho Nshya
  • Kamena 26, 2022
  • Hashize imyaka 2
Image

Abakinnyi babiri, Maniraguha Eloi na Irankunda Isihaka “Bebeto” bari baserukiye u Rwanda muri shampiyona y’Isi mu mukino wo Koga ku nshuro ya 19  “FINA World Swimming Championships 2022”  i Budapest muri Hungary bagarutse mu Rwanda aho baviriyemo mu majonjora.

Icyiciro aba bakinnyi bakinnyemo, amarushanwa yatangiye taliki 18 asozwa 25 Kamena 2022 mu gihe shampiyona y’Isi muri rusange  izasozwa taliki 03 Nyakanga 2022.

Uko aba bakinnyi bitwaye

Maniraguha Eloi umaze kwitabira imikino Olempike inshuro ebyiri yasiganwe  muri  “Freestyle” muri metero 50 aho yabaye uwa 72 akoresheje amasegonda 25 n’ibice 26. Muri iki cyiciro hari abakinnyi 90 aho 16  bakomeje 1/8 . Ubusanzwe  Maniraguha Eloi muri metero 50 yakoreshaga amasegonda 25 n’ibice18.

Umukinnyi Ben Proud ukomoka mu Bwongereza ni we wegukanye umudali  wa  zahabu aho yakoresheje amasegonda 21 n’ibice 32, yakurikiwe na Michael Andrew (USA) wakoresheje amasegonda 31 n’ibice 41 naho ku mwanya wa 3 haza Maxime Grousset (France) wakoresheje amasegonda 21 n’ibice 57.

Muri metero 100,  Maniraguha Eloi  yasoreje ku mwanya wa 90 aho yakoresheje amasegonda 57 n’ibice 17. Muri iki cyiciro hari abakinnyi  99, aho 16 ba mbere ari bo bakomeje muri  1/8.

Aha ubusanzwe muri metero 100,  Maniraguha yakoreshaga   amasegonda 56 n’ibice 70.

Maniraguha Eloi

Umukinnyi David Popovici ukomoka muri Romania ni we wabaye uwa mbere aho yakoresheje amasegonda 47 n’ibice 58 akurikirwa na Maxime Grousset (France) wakoresheje amasegonda 47.64 naho ku mwanya wa 3 haza Joshua Liendo (Canada) wakoresheje  amasegonda 47 n’ibice 71.

Irankunda Isihaka wasiganwe muri “Butterfly”  muri metero 50 yabaye uwa 60 akoresheje amasegonda 27 n’ibice 07.  Ubusanzwe Irankunda  yakoreshaga amasegonda 26 n’ibice 37.

Muri iki cyiciro hitabiriye abakinnyi 70 aho 16 bakomeje muri 1/8 maze Caeleb Dressel (USA) yegukana  umwanya wa mbere akoresheje amasegonda 22 n’ibice 57 akurikirwa na Nicholas Santos (Brazil) wakoresheje amasegonda 22 n’ibice 78 naho ku mwanya wa 3 haza Micheal Andrew (USA) wakoresheje amasegonda 22 n’ibice 79.

Muri metero 100, Irankunda yabaye uwa 61 aho yakoresheje umunota 1, amasegonda 02 n’ibice 25. Aha akaba yari asanzwe akoresha amasegonda 58 n’ibice 63.

Irankunda Isihaka

Muri iki cyiciro hari abakinnyi 65 aho 16 bakomeje muri 1/8 nyuma  Kristóf Milák (Hungary) yegukana umwanya wa mbere akoresheje amasegonda 50 n’ibice 14, akurikirwa na Naoki Mizunuma (Japan) wakoresheje amasegonda 50 n’ibice 94 naho ku mwanya wa 3 haza Joshua Liendo (Canada) wakoresheje amasegonda 50 n’ibice 97.

Nyuma yo kugaruka mu Rwanda, aba bakinnyi bombi bakaba bagomba gukomeza imyitozo bari kumwe n’umutoza w’ikipe y’igihugu, Rukundo Jean Baptiste  kuko  bazaserukira u Rwanda  mu mikino ihuza ibihugu byibumbiye mu Muryango  w’Ibihugu bikoresha Ururimi rw’Icyongereza  “Commonwealth Games 2022″, izabera i Birmingham mu Bwongereza kuva taliki 28 Nyakanga kugeza 08 Kanama 2022.

  • Imvaho Nshya
  • Kamena 26, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE