Kigali: Yatangije umuryango uhuza abagore batandukanye n’abagabo

  • Imvaho Nshya
  • Nyakanga 10, 2023
  • Hashize amezi 11
Image

Barahira Annick, ni umubyeyi watangije umuryango witwa ‘XOcare’ wita ku bagore bibana by’umwihariko abatandatukanye n’abo bashakanye.

XOcare ikorera mu Karere ka Kicukiro mu Mujyi wa Kigali. Uyu muryango watangiye gukora mu 2021 babona ubuzima gatozi uyu mwaka mu kwezi kwa Gashyantare.

Bihira yabwiye Imvaho Nshya ko ubunararibonye afite, yabonye, yanabayemo mu buryo butandukanye, yasanze hari abantu Umuryango Nyarwanda washyize ku ruhande akaba ari abantu batigeze bibukwa.

Hari abana babyariye iwabo, hakabaho abantu b’abapfakazi ariko abo bantu bari hagati, nta muntu wigeze abavuga.

Yagize ati: “Nkavuga nti uyu munsi nkurikije ibyo nabayemo (Inararibonye mfite) ndavuga ngo ni iki nafasha abo bantu, njyewe nabibayemo ariko uyu munsi hari aho ngeze. Ese uburyo nabashije guhagarara nubwo byari bigoye ni iki nafasha abandi kugira ngo babashe kubaho, bahagarare bemye noneho barebe icyerekezo kiri imbere dufatanye twubakane iki gihugu”.

Avuga ko hari igihe abantu baha akato abantu batandukanye n’abo bashakanye.

Ati: “Ngo uri umuntu wananiranye mu muryango, asebeje umuryango, umuryango wacu arawusebeje, ejo hakaza aho yashatse, twashatse nabi, umuryango (Societé) na wo ubwawo uti, umugore wananiranye.

Iyo bajya kuvuga ntibavuga umugore, bavuga umukobwa wo kwa kanaka. Baravuga ngo wa mukobwa wananiranywe n’umugabo wo kwa kanaka, kwa kanaka bikaza nyuma.

Ugasanga ni ibintu bikomeretsa mu muryango. Usanga akenshi ibyo ari byo byatumye mvuga nti uyu munsi ni iki nakora kugira ngo mfashe uyu muryango (Societé)”.

Ahamya ko afite gahunda ndende yo kugera mu miryango ibanye mu makimbirane ku buryo n’umuntu ashobora kwirinda gutandukana n’umugabo.

Ati : “Ese ku byo nabayemo, ubuzima ndimo ni iki nafasha ba bandi bari mu bibazo nk’ibyo nari ndimo bataratandukana ku buryo hazabaho gutanga inama tukagerageza kubumva no kubatega amatwi”.

Umuryango abereye Umuyobozi ugira abajyanama b’umwuga (Pyschologues) bafasha abatandukanye n’abo bashakanye. Ni mu rwego rwo kugira inama abahuye n’ibibazo bikomoka ku kuba baratandukanye n’abo bashakanye.

Ati: “Ubwo buzima bwose butwica, ni ukumva umuntu ari wenyine ariko iyo yagiye hamwe n’abandi bimutera imbaraga”.

Avuga ko amaze kubona umusaruro ngo iyo umuntu abashije kukwegera mukavugana, agafunguka arakira. Ati: “Abahanga mu mitekerereze ya muntu bavuga ko hari indwara nyinshi ziterwa no kutavuga”.

Akomeza agira ati: “Ngo abantu bazi ko abagore dukunda kuvuga ariko si ko biri kuko hari ibyo tutavuga, bya bindi byo mu nzu imbere, twatojwe wa muco wo kutavuga no kutasama burya hari ibyo tutavuga”.

Abamaze kubohoka bahamya ko ngo batajyaga bitekerezaho.

Murerwa Fabiola (Izina ryahinduwe) utuye mu Karere ka Kicukiro mu Mujyi wa Kigali yemereye Imvaho Nshya ko yatandukanye n’uwo bashakanye bikamugiraho ingaruka mu mitekerereze.

Avuga ko iwabo aho avuka bamubwira ko urushako rwamunaniye n’aho yashatse bakavuga ko umuhungu yashatse nabi.

Kumva ibyo, ngo bimugiraho ingaruka n’abana be bamubaza ibibazo akabura icyo ababwira. Ati: “Gutandukana n’uwo mwashakanye ni cyo kintu kigorana mu buzima kuko uhuriramo n’ibibazo byinshi birimo ibigukomeretsa umutima. Nk’ubu sinshobora gusubira aho mvuka kuko nabanje kujya njyayo abaturanyi cyangwa n’abanzi bakandyanirana inzara ngo nananiwe urugo, ibyo bikankomeretsa.

Icyakoze maze kwiyakira n’abana banjye ntibakimbaza ngo Papa ari he ko batakimubona, icyihutirwa kuri njye ni ugukora nkiteza imbere kandi abana banjye bakiga neza”.

Barahira avuga ko hari abantu bakeneye ubujyanama ariko bishoboye, umuntu utishoboye ntiwamubwira ngo akeneye ubujyanama kandi yaburaye.

Byatumye batangira kwishyurira Mituweli abatishoboye, bishyurira abantu babuze amafaranga bishyura kwa muganga nka Kibagabaga n’ahandi.

Baritegura kwishyurira imiryango 30, ku rundi ruhande ngo ubushobozi babwishakamo kugira ngo bashobore gufasha abagore batishoboye batandukanye n’abo bashakanye.

Ati: “Twahereye ku bagore bakoze divorce (batandukanye n’abo bashakanye) kuko ni bo benshi bagendana abana. Yizirika kuri wa mwana ariko akenshi abapapa bahita bishumbusha, ugasanga yahuye n’ibibazo pe! Ariko kwihangana ngo amare umwaka bikaba ikibazo agahitamo kugira uko yigenza”.

Mu muryango Oxcare, Barahira Annick ahamya ko bagira abanyamategeko bafasha wa mugore bigaragara ko yaryamiwe mu gihe cyo kwaka gatanya bityo bakabunganira.

Kwaka gatanya ngo bigira ingaruka no ku bana kuko ngo Se ashaka undi mugore, nyina agahita ashaka umugabo, umwana yajya kwa Se umugore we akavuga ati uyu si uwanjye.

Yajya kwa nyina, umugabo we ati “ntawe nshaka, bigatuma wa mwana ahitamo kujya mu muhanda.”

Yanditswe na KAYITARE Jean Paul

  • Imvaho Nshya
  • Nyakanga 10, 2023
  • Hashize amezi 11
TANGA IGITEKEREZO
Rusine Rosine valentine says:
Nyakanga 10, 2023 at 8:23 pm

Iyi nkuru iranshimishije nifuzaga ko bazategura umunsi ngaruka mwaka bajya bahura bakaganira bagatanga ubuhamyabagatinyuka kandi bakumva ko gutandukana bitatuma wiyubaka cg ngo wubake abandi mu kumenya keihangana mu buzima bea wenyine.

Muzadufashe kubona contact yuwo muyobozi w’umuryango kuko addresses yatanze ntihagije kandi mukeneye byu mwihariko.

Murakoze.

Andika igitekerezo

AMATEGEKO AGENGA IYANDIKA RY'IGITEKEREZO CYAWE