Kigali:  Ibigo by’itumanaho biriga uko   haboneka “interineti” ihendutse

  • NTAWITONDA JEAN CLAUDE
  • Kanama 25, 2022
  • Hashize imyaka 2
Image

Mu Mujyi wa Kigali hateraniye inama y’iminsi 3 yiga ku guteza imbere serivisi za “Internet” muri Afurika no kongera ishoramari kugira ngo  irusheho kugera kuri benshi kandi bayibone ihendutse.

Iyi nama ngarukamwaka y’Ihuriro Nyafurika rigamije iterambere rya interineti (AfPIF) muri Afurika binyuze mu guhuza imiyoboro, ibaye ku nshuro ya 11, ihuje abahagarariye ibigo bitandukanye byo kuri uyu mugabane no hirya no hino ku isi  bikora bijyanye n’ikoranabuhanga no gukwirakwiza interineti birimo Meta, Google, Microsoft, Liquid Intelligent Technologies, Africa Data Centers n’ibindi.

Mu kiganiro n’Itangazamakuru, Umunyamabanga Uhoraho muri Minisiteri y’Ikoranabuhanga na Inovasiyo Iradukunda Yves yatangaje ko kuba u Rwanda rwakiriye iyi nama ari amahirwe ku kubera ko hari kompanyi nyinshi zayitabiriye, akaba ari umwanya mwiza wo kuganira  ku ishoramari ryakorwa kugira ngo igiciro cya interineti kigabanuke. 

Yakomeje avuga ko haganirwa no ku kongera ubumenyi, guhugura ndetse no gufasha ibihugu bitandukanye bikabasha kwakira interineti no kuyikoresha mu buryo bufatika.

Yagaragaje ko iyi nama ibaye hari intambwe ifatika u Rwanda  rumaze gutera mu guteza imbere ikoranabuhanga no gukwirakwiza interineti hirya no hino mu Gihugu.

Ati: “Hashize igihe kinini kirenga imyaka 20 turi muri gahunda zitandukanye kugira ngo Umunyarwanda abashe gukoresha ikoranabuhanga mu buzima bwa buri munsi. Iyo tubirebye igiciro cya interineti cyagiye kigabanuka, ni na byo twaganiriyeho muri iyi nama, kigenda kigabanuka uko hagenda haboneka kompanyi zishora imari mu bikorwa remezo   bifasha abaturage kubona interineti”.

Yongeyeho ati: “Duhagaze neza, urebye no mu bindi bihugu aho bigeze ariko haracyari akazi kenshi ko gukora  by’umwihariko kugira ngo igiciro cya interineti kigabanuke n’uburyo yarushaho gusakara mu Gihugu”.

Iradukunda Yves  yavuze ko u Rwanda rufite intego y’uko muri 2024 serivisi zose zizaba zitangwa hakoreshejwe ikoranabuhanga, bikazagerwaho binyuze mu kongera iminara kugira ngo interineti iboneke ari nziza kurushaho.

Ati: “Mu by’ukuri iyo urebye interineti igera hose mu Rwanda,  kuyikoresho bisaba ko abantu baba bafite telefoni, mudasobwa cyangwa ibindi bikoresho[…]. Icyo turimo gukora kugira ngo abantu barusheho kuyikoresha ni ubukangurambaga, kugeza telefoni cyangwa  mudasobwa ku baturage  ikindi ni ukongera ubumenyi kugira ngo babashe gukoresha interineti”.

Nk’uko yabigarutseho, mu gihe cya Covid-19 byagaragaye ko hari benshi batakoreshaga ikoranabuhanga ariko ubu barikoresha mu bucuruzi, kwishyura serivivisi zinyuranye, mu mashuri n’ahandi kandi hagenda hiyongera uburyo butuma abaturage barikoresha.

Iyi ntambwe yatewe kandi ishimangirwa na Kabeja Alexis Umuyobozi Mukuru w’Ikigo gitanga serivisi z’ikoranabuhanga  “Liquid Intelligent Technologies”, aho yavuze ko hari urugendo bakoze kugira ngo interineti igere mu Rwanda ihagije bitandukanye no mu myaka yashize wasangaga ari nkeya, idahoraho kandi kuyigeza mu Gihugu bihenze  cyane.

Ati: “Urwo rugendo rwakozwe rurimo kongera ishoramari ikindi ni ubwumvikane hagati y’ibihugu cyangwa ibigo by’itumanaho kugira ngo hahuzwe imiyoboro”.

Ingabire Grace  Umuyobozi Mukuru w’Ikigo  (RICTA) giharanira inyungu z’abakoresha interineti mu Rwanda n’urubuga “.rw”, yavuze ko hari byinshi bungukiye muri uku guhura kwa kompanyi zinyuranye;  harimo ibirebana  n’ishoramari mu ikoranabuhanga no guhanahana ubumenyi bujyanye  na ryo kuko risaba ko umuntu ahora yihugura bitewe n’uko  rigenda rihinduka. 

Inzobere mu bijyanye n’ikoranabuhanga Michuki Mwangi, yagarutse ku rwego rw’Afurika, avuga ko hari intambwe yatewe n’ubwo hakiri imbogamizi zishingiye ku kiguzi cya interineti kikiri hejuru hakiri n’urugendo mu kubaka ibikorwa remezo byaryo.

Asanga hakenewe  impinduka zikomeye kugira ngo  interineti izajye ihererekanywa mu bihugu 35 muri Afurika,  binyuze mu kongera umubare w’imiyoboro mu gihugu, mu karere no ku isi,  guteza imbere ubufatanye hagati y’abatanga serivisi za interineti, abakora itumanaho rya telefoni, abatanga amakuru, ibigo binini by’itumanaho  n’abanyapolitike.

AfPIF yashinzwe kugira ngo ikemure ikibazo cy’uko ihererekanya ry’imiyoboro ya murandasi muri Afurika yari  hanze yayo. Uyu mwaka iri Huriro  riribanda ku ihererekanya rya interineti, isakazwa ry’amakuru n’imbongambizi z’imiyoboro mu gihugu no mu Karere.

  • NTAWITONDA JEAN CLAUDE
  • Kanama 25, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE