Kigali: Abanyeshuri 480 basoje amasomo ya TVET, hari abakoze imodoka

  • NTAWITONDA JEAN CLAUDE
  • Nzeri 12, 2022
  • Hashize imyaka 2
Image

Abanyeshuri 418 barimo n’abakobwa 10 barangirije mu ishuri rya EMVTC-Remera TVET School mu masomo ajyanye n’ubumenyingiro, basabwe kurangwa n’indangagaciro no kubyaza amahirwe igihugu cyabahaye.

Byagarutsweho ku  Cyumweru tariki 11 Nzeri 2022 mu muhango wo guha impamyabumenyi ku nshuro ya gatanu abanyeshuri 418 barangije amasomo y’ubumenyingiro muri EMVTC- Remera.

Rwamasirabo Aimable, Umuyobozi wungirije muri RTB (Rwanda TVET Board) ushinzwe integanyanyigisho zo muri TVET, avuga mu mwaka wa 2024 abanyeshuri biga amasomo y’ubumenyingiro bazaba bageze kuri 60%.

Ahamya ko uyu munsi bageze kuri 31.9%.  Yabwiye abarangirije muri EMVTC – Remera ko batize gusa ahubwo ko banigiye kuba bagira ubushobozi bwo gukora imodoka.

Ati: “Turabigisha ngo ntimukanike gusa ahubwo munagire ubushobozi bwo gukora imodoka. Mufite akazi katoroshye ariko turabafite nk’amaraso y’u Rwanda byose tuzabigeraho”.

Yagaragarije abanyeshuri ko imbaraga bashyizemo biga ko banazikoresha mu kurangwa n’indangagaciro batorejwe muri EMVTC – Remera TVET School.

Nshimiye Jacques, Umuyobozi wa EMVTC-Remera TVET School, ashimira abarangije amasomo abasaba gukomeza kurangwa n’indangagaciro batojwe.

Yakomoje ku cyerekezo cy’ishuri. Ati: “Iri shuri ririfuza kwagura ibikorwa byaryo bitewe nuko bimaze kugaragara ko rihindura ubuzima bw’abahanyuze muri aya masomo twigisha”.

Agaragaza ko mu myigire y’ubumenyingiro n’imyuga muri rusange hakiri imbogamizi zishingiye ku myumvire aho abantu benshi batarayitabira kubera ko bazi ko imyuga yigwa n’abatarashoboye gukomeza amashuri yisumbuye.

Akomeza agira ati: “Iyo bigeze ku bakobwa cyangwa ku gitsina gore usanga ubwitabire ari buke cyane”.

Mu bushakashatsi bwakoze na EMVTC-Remera, bugaragaza ko hejuru ya 87% bari ku isoko ry’umurimo nkuko byashimangiwe na Nshimiye umuyobozi w’ishuri.

Ubuyobozi bw’ishuri buvuga ko bufite gahunda yo kwagura amashami bakajya no mu zindi ntara kugira ngo ubukanishi bw’amamodoka bushobore kugera ku rubyiruko rwinshi.

Rwamuhumba Antoine urerera muri EMVTC-Remera TVET School, asaba ko iri shuri ryaba ikigo ngeragerezwamo bukorikori (Incubation Center) mu Rwanda.

Ashingiye ku modoka abanyeshuri bakoze, avuga ko nta kidashoboka. Ati: “Birerekana ko u Rwanda dushoboye niba dushobora gukora imodoka za Made in Rwanda”.

Ashishikariza ababyeyi bafite abana barangije kwiga kubazana bakiga amasomo y’ubumenyingiro n’ubukorikori.

Ujeneza Joyeuse, umunyeshuri warangije muri Mechanique automobile muri EMVTC –Remera TVET School, avuga ko ahakuye ubumenyi buzamufasha kubaho neza.

Ati: “Mpuye na mugenzi wanjye imodoka ye yagize ikibazo ku bice biyigize, namufasha bitewe n’ikibazo yagize”.

Avuga ko yamaze kubona akazi mu igaraje i Gacuriro. Yakabije inzozi ze kuko ngo yari afite inzozi zo kuzaba umushoferi unakora imodoka agatwara imodoka azi no kuyikora.

Ahamya ko arangije amashuri yisumbuye yahise ajya kwiga muri EMVTC – Remera ahiga umwaka.

Ati “Ubu ndimo gusatira inzozi zanjye kuko sinasaba ababyeyi banjye amavuta yo kwisiga kuko umwuga nize ubimfashamo”.

Ndayikeza Jean Népomscène urangije kwiga ubukanishi bw’imodoka muri EMVTC – Remera, avuga ko muri EMVTC – Remera ahakuye ubumenyi bujyanye no gukanika.

Ati “Ubu ngeze hanze nakora byinshi kuko nzi neza gusukura (Reviser) moteri”. Yongeraho ko ari umwe mu bagize uruhare mu gukora imodoka bamuritse.

Ababyeyi beretswe icyumba abanyeshuri bigishirizwamo ibice bigize ikinyabiziga (Foto Kayitare J.Paul)
Abanyeshuri bagaragaje ubuhanga bafite mu mikorere y’ibyuma bigize ikinyabiziga (Foto Kayitare J.Paul)
Abarangije muri EMVTC – Remera bahawe umukoro (Foto KKayitare J.Paul)
Rwamasirabo Aimable, umuyobozi wungirije muri RTB (Rwanda TVET Board) ushinzwe integanyanyigisho zo muri TVET (Foto Kayitare J.Paul)
  • NTAWITONDA JEAN CLAUDE
  • Nzeri 12, 2022
  • Hashize imyaka 2
TANGA IGITEKEREZO
Ujeneza joyeuse says:
Nzeri 13, 2022 at 3:09 am

Kbx emvtc remera nindashyikirwa mukwes imihigo niyompamv ijor kwisonga

Andika igitekerezo

AMATEGEKO AGENGA IYANDIKA RY'IGITEKEREZO CYAWE