Kicukiro: Ubuyobozi bushaka ko nta mwana wo mu Karere ugwingira  

  • NTAWITONDA JEAN CLAUDE
  • Nzeri 8, 2022
  • Hashize imyaka 2
Image

Ubuyobozi bw’Akarere ka Kicukiro mu Mujyi wa Kigali buratangaza ko butifuza kubona abana bagwingiye. Akarere ka Kicukiro gasanzwe kari ku isonga mu kugira umubare muto w’abana bagwingiye mu Mujyi wa Kigali kuko gafite abana 10% bagwingiye.

Ubushakashatsi bw’Ikigo cy’Igihugu cy’Ibarurishamibare mu Rwanda (NISR) bwo mu 2019/2020, bwagaragaje ko abana bagwingiye bagera kuri 33%.

Iyi mibare yari kuri 38% nk’uko byagaragajwe n’ubushakashatsi ku buzima n’imiturire bwa 2014-15.  Ni mu gihe gahunda ya Guverinoma y’u Rwanda ari uko mu 2024 bazaba ari 19% gusa.

Umutesi Solange, Umuyobozi Nshingwabikorwa w’akarere ka Kicukiro, asobanura ko igikorwa cyo kwiyubakira amarerero mu murenge wa masaka byerekanye ubudasa.

Yabigarutseho ku mugoroba wo ku wa Gatatu taliki 07 Nzeri 2022, mu gikorwa cyo gushyira ibuye ry’ifatizo ahagiye kubakwa Irerero.

Avuga ko bari bamenyereye kubona amarerero yubatswe na Leta n’ayubatswe n’abafatanyabikorwa 100% cyangwa umuturage akigomwa inzu ye cyangwa urugo rwe rukagirwa irerero ry’umudugudu.

Ati: “Ni byiza kuba abaturage bateye intambwe bakavuga ngo reka twubake irerero ryujuje ubuziranenge turishyire ku kagari”.

Ahamya ko akarere ka Kicukiro kaza ku mwanya wa mbere mu kugira umubare muto w’abana bagwingiye mu Mujyi wa Kigali.

Ati: “Uko imibare yose ingana, ubu turi ku 10% ariko n’iryo cumi ntiturishaka, turashaka ko nta mwana wo mu karere ka Kicukiro ugwingira, turashaka ko nk’akarere k’Umujyi gatuwe n’abaturage basobanutse tunagira abana bari mu mirire myiza.

N’iryo 10% ntiturishaka nubwo ari ko karere ka mbere ariko turashaka kutagira umwana ugwingiye”.

Umutesi avuga ko uruhare rw’umuturage ruherwa kuri uru rwo gushyigikira gahunda z’uburezi n’uburere by’umwana ndetse no kwita ku muryango, kuboneza urubyaro no gukomeza kujyana abana mu ishuri.

Ati: “Rwa ruhare ruhuza umuturage n’ubuyobozi, umuturage arasabwa kurwumva neza akita ku rugo rwe, akita kuri abo bana ariko na gahunda z’inyungu rusange zituma abana bitabwaho na zo umuturage akazigiramo uruhare”.

Ubuyobozi bw’Akarere ka Kicukiro buvuga ko umwihariko w’umurenge wa Masaka ko ari umurenge urimo guturwa cyane ugasanga buri mwaka hari imiryango myinshi ihimukira ku buryo guteganya ibikorwaremezo byakira abana barimo bahimukira na byo ari bimwe mu bihindura ubuzima bw’abatuye uyu murenge.

Ati: “Mbere na mbere ni umusaruro w’ubukangurambaga no kuba bamaze kumva akamaro k’amarerero”.

Mukabutera Epiphanie utuye mu kagari ka Cyimo mu murenge wa Masaka yishimira ko bagiye kubona Irerero hafi yabo bityo ko yizeye ko abana bo muri ako gace batazagira ikibazo k’indwara ziterwa n’imirire mibi.

Ati: “Biradushimishije kubona Irerero hafi yacu, abana bagwingiye n’abafite imirire mibi twizeye ko iri rerero ari igisubizo ku miryango yabo”.

Umwe mu Bajyanama b’Ubuzima muri uyu murenge, yahamirije Imvaho Nshya ko gahunda y’Irerero iwacu ari igisubizo ku batuye umurenge wa Masaka ndetse no ku miryango ifite abana bari mu mirire mibi.

  • NTAWITONDA JEAN CLAUDE
  • Nzeri 8, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE