Kicukiro: Abanyamuryango ba FPR Inkotanyi bashimye ko babonye inkingo

  • NTAWITONDA JEAN CLAUDE
  • Ukwakira 11, 2022
  • Hashize imyaka 2
Image

Abanyamuryango ba FPR Inkotanyi mu Kagari ka Rwimbogo mu Murenge wa Nyarugunga mu Karere ka Kicukiro, barishimira ko ubuyobozi bukuru bw’Igihugu bwashoboye kubonera Abanyarwanda inkingo za COVID-19.

Babigarutseho mu Nteko Rusange y’Umuryango FPR Inkotanyi yabaye ku cyumweru taliki 09 Ukwakira 2022.

Mujiji Peter, Chairman w’Umuryango FPR Inkotanyi mu Kagari ka Rwimbogo mu Murenge wa Nyarugunga, avuga ko bishimira ko ubuyobozi bukuru bw’Igihugu bwafashije Abanyarwanda kugira ngo inkingo za COVID-19 ziboneke.

Ati: “Turishimira ubuyobozi bwabigizemo uruhare kugira ngo ziriya nkingo ziboneke, tukazibona vuba abantu tukaba twaravuye mu rugo tukaba tutacyambara agapfukamunwa”.

Avuga ko mu Kagari ka Rwimbogo bashoboye gufatanya nk’abanyamuryango bagafasha bagenzi babo n’abandi muri rusange bagashobora kubonera abaturage ibibatunga mu gihe cya guma mu rugo.

Ikindi bishimira, ni abanyamuryango basaga 10 bungutse batera intambwe idasubira inyuma.

Mujiji yagize ati: “Iki ni ikimenyetso cyo kuba hari abantu bagifite inyota yo kuza mu muryango. Iyo barahiye rero twebwe biba bidushimije”.

Muri iyi Nteko, abanyamuryango ba FPR Inkotanyi bashoboye kuremera imiryango itishoboye isaga 60 yishyurirwa mituweli.

Mu kiganiro cyatanzwe na Tite Rutaremara umunyamuryango wa FPR Inkotanyi mu Kagari ka Rwimbogo, yakomoje ku ndahiro y’Umuryango FPR Inkotanyi.

Asobanura ko abinjiraga mu muryango bigishwaga ko bagomba kumenya umutekano wabo bikajyana n’igihano cyagaragara mu ndahiro ya mbere.

Avuga ko kuva mu 2017 kugeza ubu hari byinshi bimaze kugerwaho ariko hakaba hari ibyadindiye kubera icyorezo cya COVID-19.

Abanyamuryango basabwa gukora cyane kugira ngo bihutishe ibyo bavuze muri manifesito y’Umuryango FPR Inkotanyi.

Yagize ati: “Hari ibintu byinshi byagiye bikorwa harimo wenda ibyagiye bihagarikwa kubera ko twagize COVID-19 […] bitewe n’ibyo basabwa kugira ngo babyihutishe nk’ibyo bikorwa byagiye bidindira kubera ibyo bibazo, naho ubundi nibyo basabwa kugira ngo bihutishe ibyo twavuze muri manifesito”.

Manzi Dickson, utuye mu kagari ka Rwimbogo mu mudugudu wa Rwinyana warahiye mu Muryango FPR Inkotanyi, avuga ko yari asanzwe akora ibikorwa by’umuryango mu kagari ariko ngo igihe cyari kigeze ngo atere intambwe yo kurahira.

Ati: “Igihe cyari kigeze ngo dutere intambwe yo kurahira twinjire mu muryango neza dutangire kuwukorera twaranarahiye”.

Avuga ko gahunda ari iyo gukorera umuryango akawukorera ibyo umusaba anahesha ishema igihugu.

Chairperson w’Umuryango FPR Inkotanyi mu Murenge wa Nyarugunga, Tumukunde Monica, avuga ko hari byinshi bungukiye mu Nteko Rusange, by’umwihariko urubyiruko rubyiruka rukaba rwaboneyeho kumenya amavu n’amavuko y’Umuryango.

  • NTAWITONDA JEAN CLAUDE
  • Ukwakira 11, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE