Kicukiro: Abanyamuryango ba FPR Inkotanyi baravuga imyato ibyo bagezeho

  • NTAWITONDA JEAN CLAUDE
  • Ugushyingo 13, 2022
  • Hashize umwaka 1
Image

Abanyamuryango ba FPR Inkotanyi mu murenge wa Gahanga mu karere ka Kicukiro mu Mujyi wa Kigali, barishimira ibyo bamaze kugeraho. Babigarutseho mu nteko rusange y’Umuryango FPR Inkotanyi kuri uyu wa Gatandatu tariki 12 Ugushyingo 2022.

Rwigema Jacques, Umuyobozi w’Umuryango FPR Inkotanyi mu murenge wa Gahanga, avuga ko abanyamuryango bashoboye kuzuza inzego z’Umuryango kuva ku mudugudu kugeza ku murenge, ubu zikaba zuzuye.

Mu baturage ibihumbi 44, bamaze kwandika mu ikoranabuhanga abaturage ibihumbi 18 muri gahunda y’Intore Solution, aho akagari ka Kagasa kashoboye kwandika abasaga 4,000. Ku rundi ruhanze, umwaka ushize abanyamuryango bakusanyije miliyoni 6.

Rwigema, Chairman w’Umuryango FPR Inkotanyi mu murenge wa Gahanga, agaragaza ko abanyamuryango bose bahuguwe ku mateka y’Umuryango.

Uwimbabazi Florence, umunyamuryango wa FPR Inkotanyi witeje imbere, avuga ko abagore muri Gahanga bafite imirimo bakora.

Ati: “Nk’umugore wo mu murenge wa Gahanga ngereranije nuko kera byari bimeze twarasigajwe inyuma twumva ko nta jambo twagira, ariko aho umuryango tugenda tuwusobanukirwa natwe twarasobanukiwe turakora, tukumva ko twagira inshingano nk’abagore”.

Avuga ko yashoboye kubaka inzu yo kubamo kandi arakora. Ahamya ko nubwo umugabo atagira icyo yinjiza ariko na we ngo yagira icyo amarira umuryango we nko kwishyurira abana amafaranga y’ishuri n’ibindi.

Rutayisire Emmanuel, ashimangira ko uruhare rwabo ari ugukorana n’Umuryango FPR Inkotanyi. Ashingiye ku bucuruzi akora, avuga ko afatanya n’ubuyobozi bwite bwa Leta aho bagira uruhare mu guca ubushomeri nko guha akazi abasore n’abagore. Byose agahamya ko abikesha Umuryango FPR Inkotanyi.

Ati: “Nk’iwanjye nkoresha abakozi bagera kuri 70 kandi bose nabahawe n’ubuyobozi bw’umurenge wa Gahanga ariko hagendewe ku bafite ubushobozi badafite imibereho”.

Abanyamuryango ba FPR muri Gahanga bashoboye kubaka amavuriro y’ingoboka 4 (Postes de Santé). Ubu bari kuri 83% mu kwishyura ubwisungane mu kwivuza.

Bizeye kandi ko mu kwezi kwa Mutarama 2023, bazaba bari ku 100%. Bashoboye kandi kubakira imiryango itishoboye inzu 9 n’ibyumba by’amashuri 6.

Abatishoboye 183 bahawe inkunga y’ingoboka mu gihe 181 bo bahawe imirimo ibinjiriza.

Abanyamuryango ba FPR Inkotanyi mu murenge wa Gahanga by’umwihariko mu kagari ka Kagasa, bashoboye kwiyubakira umuyoboro w’amazi wa Kirometero 2.

Bishimira kandi ko basubije abana 90 mu ishuri, kuri ubu bakaba biga kandi ngo batsinda neza.

Muri gahunda ya EjoHeza, abanyamuryango ba Gahanga bari kuri 51%.

Muri Gahanga bamaze kubaka site 4 kandi bafite icyanya cyahariwe inganda. Abanyamuryango bahamya bafite ibikorwa remezo birimo imihanda, amavuriro, amashanyarazi, amazi n’ibindi.

Imiryango 36 yabanaga mu makimbirane yarahujwe. Abacitse ku icumu bubakiwe inzu 15. Abaturage bagize uruhare mu ikusanyamakuru mu gihe cya Gacaca, abanyamuryango ba FPR Inkotanyi babagabiye inka 2.

Kugeza ubu ikindi abanyamuryango ba Gahanga bishimira, ni ibikombe 3 bahawe muri gahunda y’ubumwe n’ubwiyunge.

  • NTAWITONDA JEAN CLAUDE
  • Ugushyingo 13, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE