Kicukiro: Abanyamuryango ba FPR bishimiye aho bavuye bakomoza ku matora ya 2024

  • NTAWITONDA JEAN CLAUDE
  • Nyakanga 4, 2023
  • Hashize amezi 11
Image

Abanyamuryango ba FPR Inkotanyi mu Murenge wa Masaka mu Karere ka Kicukiro mu Mujyi wa Kigali, baravuga ko hari byinshi bamaze kugeraho kandi ko bazakomeza kubisigasira. 

Intero yabo ni uko ngo umwaka utaha bazakomeza kugaragaza amahitamo ababereye nk’Abanyarwanda mu matora,  kuko bakeneye gukomeza gusigasira ibyo bagezeho kandi bakesha imiyoborere myiza, 

Babigarutseho ku wa Mbere taliki 03 Nyakanga 2023 mu Nteko Rusange y’Umuryango FPR Inkotanyi yabereye hirya no hino mu Tugari tugize Umurenge wa Masaka.

Mwananawe Jean Marie Vianney, Umuyobozi w’Umuryango FPR Inkotanyi mu Kagari ka Cyimo mu Murenge wa Masaka, yatangaje ko abanyamuryango ba Cyimo biyemeje kuzubaka ibikorwa remezo by’agaciro k’amafaranga y’u Rwanda asaga miliyoni 20.

Bashoboye kwisanira umuhanda watwaye amafaranga y’u Rwanda asaga miliyoni 6. Mu gihe cy’ukwezi batanze umusanzu w’asaga miliyoni 5.

Abanyamuryango bo mu Murenge wa Masaka biyemeje gukora ubukangurambaga mu rubyiruko kugira ngo amatora ateganyijwe umwaka utaha azagende neza. 

Ku rundi ruhande abanyamuryango ba FPR Inkotanyi mu Kagari ka Cyimo ngo bazakomeza kwishyurira abatishoboye Mituweli kandi Mituweli igomba kwishyurwa 100%. 

Biyemeje kandi kurandura ubuzererezi burundu, hakorwa ubukangurambaga mu bangavu batewe inda.

Abanyamuryango bakomoje ku matora y’Umukuru w’Igihugu ateganyijwe umwaka utaha wa 2024, bavuga ko bazi amahitamo n’ibibabereye.

Umwe nuri bo yagize ati: “Icyo dushaka ni uko amatora yacu tuzayategura kandi akagenda neza. Twifuza gukomeza gusigasira ibyo twagezeho ariko na nanone amahitamo yacu turayazi nk’Abanyarwanda”.

Mugema Serge, umunyamuryango wa FPR Inkotanyi mu Kagari ka Mbabe, avuga ko ibyo kuratwa ari byinshi ari na byo bibukiranyije mu Nteko Rusange mu Kagari ka Mbabe gaherereye mu Murenge wa Masaka.

Mu gihe cyashize nta mashanyarazi bagiraga bakishimira ko bayafite ikindi ngo amavuriro yarabegereye.

Ati: “Mbere hano ibintu byari bigoranye ku buryo no kubona ikoranabuhanga ntibyari byoroshye kuko telefoni ntizafataga umurongo (network) ariko ubu dufite umunara dushobora kuvugana n’abari kure”.

Akomeza avuga ko amashuri ari hafi yabo ndetse ubu ngo bafite amashanyarazi by’umwihariko bakaba barijejwe umuhanda wa kaburimbo.

Ibi bishimangirwa na Gashagaza Augustin, Umuyobozi w’Umuryango FPR Inkotanyi mu Kagari ka Mbabe, kandi ngo aho bageze barahishimira.

Ati: “Akagari ka Mbabe ntikagiraga imihanda ubu turayifite, dufite amashanyarazi, amazi ibyo byose ni byo twungutse mu myaka 29 ishize”.

Biyemeje kubaka ibiro by’Akagari kajyanye n’igihe kakimurwa kakava ku ruhande kakajya hagati mu Kagari aho abanyamuryango bose n’abatari abanyamuryango bizaborohera gusaba serivisi batavunitse. 

Gashagaza avuga ko bifuza amatora meza kugira ngo abanyamuryango bakomeze bave mu bwigunge, noneho ngo na bya bikorwa byose barimo bavuga bizabe 100%.

Ati: “Ni yo mpamvu twashishikarije abanyamuryango amatora ari imbere azagenda neza kandi nk’ibisanzwe barabyumva, barabisobanukiwe igisigaye ni ukujya mu ngamba tugakora”.

Ingabire Louise utuye mu Murenge wa Masaka avuga ko gutera imbere kwe abikesha Umuryango FPR Inkotanyi.

Mu buzima busanzwe arikorera. Yabwiye Imvaho Nshya ko yahereye ku buzima buri hasi cyane buciriritse.

Yatangiye acuruza umufuka umwe wa karoti n’undi w’ibitunguru, ubu ngo ageze ku rwego rwo gutumiza imodoka wenyine akayicuruza kandi ikarangira.

Ingabire agaragaza itandukaniro ry’umugore wa mbere ya FPR Inkotanyi n’uwa nyuma y’aho FPR itangiriye kuyobora Igihugu.

Ati: “Aho batandukaniye, mbere umugore yaritinyaga nta bushobozi yari afite kugira ngo akore ariko nta n’ijambo yagiraga.

Icyo gihe ikintu cyose yagisabaga umugabo ariko aho Umuryango FPR Inkotanyi utangiriye kuyobora Igihugu, umugore wa mbere atandukanye n’uw’ubu kuko ubungubu arashoboye ; haba kubaka, haba no gutwara imodoka n’ibindi.

Ubu twabaye imbaraga z’Igihugu kuko turabishoboye. Muri make twaribohoye kuko ntituri rwa rwego ruvuga ngo rusuzugura abagabo ahubwo turi abagore bashoboye”.

Uwimana Jean Pierre, utuye mu Kagari ka Gako mu Murenge wa Masaka, yishimira ko bafite ubuyobozi bwiza bituma abaturage bizamura mu bukungu.

Ashimira Umuyobozi Mukuru w’Umuryango FPR Inkotanyi, Perezida wa Repubulika Paul Kagame, iterambere amaze kugeza ku Banyarwanda bose. 

Yagize ati: “Turamushimira ku buyobozi bwiza yatugejejeho kandi turifuza ko rwose yanakomeza akayobora kino Gihugu kubera ibigwi n’ibikorwa twishimira atugezaho umunsi ku wundi”.

  • NTAWITONDA JEAN CLAUDE
  • Nyakanga 4, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE