Jeannette Kagame yatumiwe mu Nama yitezwe muri Zimbabwe 

  • NTAWITONDA JEAN CLAUDE
  • Kamena 15, 2023
  • Hashize amezi 10
Image

Madamu wa Perezida wa Zimbabwe akaba n’Ambasaderi w’Ubuzima Dr. Amai Auxillia Mnangagwa, yagaragaje uburyo yishimiye kuba Madamu Jeannette Kagame yakiriye neza ubutumire bwo kuzitabira Inama Mpuzamahanga yiga kuri SIDA n’izindi ndwara zandurira mu mibonano mpuzabitsina muri Afurika (ICASA).

Iyo nama izaba ku nshuro ya 22 yitezwe kubera i Harare muri Zimbabwe hagati y’italiki ya 4 n’iya 9 Ukuboza 2023, by’umwihariko Abafasha b’Abakuru b’Ibihugu by’Afurika bakazanagira umwanya uhagije wo kungurana ibitekerezo ku ku buvuzi bw’indwara zitandura (NCDs) hamwe n’indwara zititaweho uko bikwiye (NTDs. 

Madamu Dr. Amai Auxillia Mnangagwa yabigarutseho nyuma yo kwakirwa na Madamu Jeannette Kagame muri iki cyumweru, aho baganiriye ku ngingo zitandukanye by’umwihariko ibirebana n’ibikorwa by’ubugiraneza no kwimakaza iterambere ry’umugore n’umukobwa.

Dr. Mnangagwa yaje mu ruzinduko mu Rwanda, aho yitabiriye Ibiganiro Mpuzamahanga bya Kigali (Kigali Global Dialogue) byabaye ku nshuro ya 3 muri iki cyumweru. 

Inama yatumiyemo mugenzi we yitezweho guhuriza hamwe abayobozi, abafatanyabikorwa bo mu Gihugu ndetse n’abandi bo ku rwego mpuzamahanga hamwe n’impuguke, bose bakazabona amahirwe yo gusangira ubumenyi n’ubunararibonye bafite mu guhangana n’izo ndwara. 

Ati: “Namutumiye ngo azaze mu nama ya ICASA dufite mu kwezi k’Ukuboza izaba igenewe Abafasha b’Abakuru b’Ibihugu, aho bazahugurwa n’impuguke mu rwego rw’ubuzima by’umwihariko mu buvuzi bwa NCDs ndetse na NTDs. Nishimiye ko yemeye ubutumire bwanjye.” 

Byitezwe ko muri iyo nama Abakuru b’Ibihugu by’Afurika, abafasha babo n’abahagarariye imiryango mpuzamahanga bazarushaho kugaragaza ukwiyemeza bashyira mu guhangana na Virusi Itera SIDA n’izindi ndwara zandurira mu mibonano mpuzabitsina muri Afurika 

Dr. Amai Mnangagwa ayoboye Umuryango Angel of Hope Foundation washinzwe mu mwaka wa 2018, mu gihe Madamu Jeannette Kagame ayoboye  Umuryango Imbuto Foundation washinzwe guhera mu 2001. 

Abo bafasha b’Abakuru b’Ibihugu byombi bahuriye ku bwitange bagaragaza mu kwita ku banyantege nke by’umwihariko imfubyi n’abapfakazi, ndetse no guharanira iterambere ry’abagore n’abakobwa. 

Mu biganiro bagiranye, Madamu Jeannette Kagame yagaragarije mugenzi we wa Zimbabwe amateka y’Umuryango Imbuto Foundation n’ibikorwa bitandukanye wakoze mu myaka ikabakaba icya kane cy’ikinyejana umaze ubonye izuba.

Madamu Dr. Amai Mnangagwa na we yasobanuye ibikorwa bya Angel of Hope, n’umusaruro byatanze ku bantu batishoboye n’abanyantege nke mu myaka irenga itanu ishize uwo Muryango umaze ushinzwe. 

Bombi baganiriye ku masomo buri wese yigiye kuri mugenzi we. Madam Dr. Mnangagwa yavuze ko ibiganiro yagiranye na Madamu Jeannette Kagame byari byiza kandi byatanze umusaruro wamunyuze.

Ati: “Twagiranye ikiganiro cyihariye cyarushijeho kuduhuza kurenza uko byahoze. Twaganiriye ndetse tunungurana ibitekerezo ku myaka yamaze mu bikorwa by’ubugiraneza maze tubasha gukomezanya.”

Madamu Dr. Amai Mnangagwa yanagaragaje ko hakenewe ubufatanye bw’u Rwanda na Zimbabwe mu birebana n’umuco, mu gusigasira ibinyejana by’ahazaza birimo n’abana bashyingiranwa hagati y’ibihugu byombi.

Mu ruzinduko rwe mu Rwanda Madamu Dr. Amai Manangagwa yanahuye na bamwe mu banyamuryango ba Unity Club ihuriza hamwe abarimo abafasha b’abayobozi Bakuru b’Igihugu na ba Minisitiri b’abagore, aho batanga ibisubizo ku bibazo binyuranye bibangamiye sosiyete. 

Abo bayobozi b’abagore bahuye na we bamushimiye ibikorwa bigamije kwimakaza gukura benshi mu byago no kwimakaza iterambere ry’abari n’abategarugori nk’uko bishimangirwa n’Ikinyamakuru Herald cyo muri Zimbabwe. 

Madamu Jeannette Kagame na Madamu Dr. Amai Mnangagwa i Kigali
  • NTAWITONDA JEAN CLAUDE
  • Kamena 15, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE