Iterabwoba n’ubuhezanguni bibangamiye umutekano w’Afurika- Brig. Gen. Rwivanga

  • NTAWITONDA JEAN CLAUDE
  • Kamena 16, 2023
  • Hashize amezi 10
Image

Umuvugizi w’Ingabo z’u Rwanda Brig. Gen. Ronald Rwivanga, yagaragaje ko iterabwoba n’ibikorwa ndengakamere by’ubuhezanguni bikiri umutwaro ukomeye ku mutekano w’Afurika kandi ari wo musingi w’iterambere ry’ibihugu.

Brig. Gen. Rwivanga yabigarutseho kuri uyu wa Gatanu taliki ya 16 Kamena, mu butumwa yagejeje ku bitabiriye ibiganiro nyunguranabitekerezo bibaye ku nshuro ya 10 byiga ku butabera, amahoro n’umutekano birambye.

Ibyo biganiro by’iminsi ibiri byatangiye ejo, bikaba bihuje impuguke zinyuranye mu bya Politiki n’umutekano, abashakashatsi n’abayobozi mu nzego zitandukanye, barimo kuganira ku guteza imbere ubutabera buharanira amahoro n’umutekano birambye ku mugabane w’Afurika. 

Brig. Gen. Rwivanga yagize ati: “Iterabwoba n’ubuhezanguni biracyari imbogamizi zikomeye ku mutekano w’Afurika, biragira ingaruka ku Karere ka Sahel, Amajyaruguru n’Uburengerazuba bw’Afurika, muri Somalia na Mozambique.”

Yakomeje ashimangira ko imitwe y’iterabwoba n’ubuhezanguni yose iterwa imbaraga n’Ibyihebe bya Islamic States, Istitute Sharia Law n’indi mitwe, bikajyana no gushaka kwigarurira uduce n’ibihugu cyangwa ubutunzi,  kandi iyo mitwe ikaba yibumbira mu matsinda ashingiye ku iyobokamana n’amoko. 

Brig. Gen. Rwivanga akomeza agira ati: “Umusaruro wabyo ni ugutsindwa kw’imiyoborere no gutakaza ubushobozi bwo gusigasira ubusugire bw’ibihugu.”

Ibyo biganiro bikubiye mu ngengabihe y’amasomo ahabwa ba Ofisiye Bakuru bongererwa ubumenyi mu gihe kingana n’umwaka, mu Ishuri Rikuru rya Polisi riherereye mu Karere ka Musanze.

Uyu munsi, hagarutswe ku ngingo zinyuranye zirimo gukemura ibibazo bibangamiye abaturage no guhangana n’ibyaha bikorwa hifashishijwe ikoranabuhanga, akarengane mu miryango n’ibindi. 

Ikoranabuhanga rikomeje kuba igikoresho cy’abakora ibyaha binyuranye, ari yo mpamvu hifuzwa ko imikoreshereze yaryo yarushaho kwitabwaho no kugenzurwa, guhugura abaturage ku buryo bwiza bwo kurikoresha, no kongera ubumenyi bukenewe mu guhangana n’abanyabyaha bihisha inyuma yaryo. 

Umunyamabanga Mukuru w’Urwego rw’Igihugu rw’Ubugenzacyaha (RIB) Col. (Rtd) Jeannot Ruhunga, asanga bumwe mu buryo bwo kwirinda ibyaha ari uguharanira iterambere n’imibereho myiza by’abaturage, kuko iyo badatekanye mu mibereho ibyaha na byo byiyongera.

Aha yatanze urugero rw’uburyo Ingabo z’u Rwanda na Polisi bishyira imbere ishoramari mu kubaka iterambere n’imibereho myiza y’abaturage bashinzwe gucungira umutekano.

Uwo muco wimakajwe mu gihugu kmbere ndetse no mu bindi bihugu Ingabo na Polisi by’u Rwanda boherezwamo mu butumwa bwo kubungabunga amahoro, bwaba ubwa Loni cyangwa ubushingiye ku  masezerano y’ibihugu. 

  • NTAWITONDA JEAN CLAUDE
  • Kamena 16, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE