IRMCT igiye guhinduka ikigo mu gihe isoza imanza z’u Rwanda

  • NTAWITONDA JEAN CLAUDE
  • Ukwakira 20, 2022
  • Hashize umwaka 1
Image

Ubuyobozi bw’Urukiko rw’Urwego Mpuzamahanga rwashyiriweho Imanza z’Insigarira z’Inkiko (IRMCT) bwatangaje ko uru rwego rugiye guhinduka ikigo cyihariye nyuma y’imyaka 12 rumaze rukurikirana imanza mpuzamahanga zasizwe n’Urukiko Mpuzamahanga Mpanabyaha rwashyiriweho u Rwanda (ICTR).

Ayo makuru mashya yatangajwe na Perezida wa IRMCT Madamu Graciela Gatti Santana, ubwo yagezaga ijambo ku bitabiriye Inteko Rusange y’Akanama gashinzwe Umutekano k’Umuryango w’Abibumbye ku wa Gatatu, aho yagaragazaga imirimo y’urwo rukiko mu mwaka ushize.

Madamu Graciela Gatti Santana yatangarije abitabiriye Inteko Rusange y’Akanama ka Loni gashinzwe umutekano ku Isi ko IRMCT yiteguye kuva ku rwego rwo kuba urukiko rukora byuzuye igahinduka urwego rukurikirana imanza z’insigarira nk’uko biri mu nshingano zayo.  

Yashimangiye ko uretse urubanza rumwe rusigaye rurebana n’u Rwanda, IRMCT yamaze kugaragaza imanza zose z’Abanyarwanda zigomba kuburanishwa, ndetse imanza mpuzamahanga hafi ya zose zasizwe n’Urukiko Mpuzamahanga rwashyiriweho u Rwanda (ICTR) ndetse n’urwa Yugoslavia zamaze gushyirwa ku iherezo.

Yavuze ko mu gihe ibiro byo mu Rwanda bizaba bifunzwe bidasobanuye ko imirimo yose y’uru rukiko izaba ihagaze, ku buryo imanza ziri mu rukiko zirebana n’u Rwanda zahita zihagarara.

Yagize ati: “Inshingano zacu zizakomeza mu nzego zirimo kurinda abatangabuhamya, gukurikirana imiburanishirize y’imanza zoherejwe kuburanishwa n’inkiko zo mu bihugu, kubungabunga neza ishyinguranyandiko no kunganira ubutabera w’ibihugu dukorana.”

Madamu Santana yagaragaje uburyo urukiko rwiyemeje gutanga ubutabera bushyitse ku rubanza rwa Kabuga Félicien rurimo kuburanishwa i La Haye, ndetse no mu manza zose z’ubujurire zishobora kuboneka nyuma no mu gihe urwo rukiko ruzaba rwamaze guhinduka Ikigo kigize amashami ya Loni.  

Yakomeje agaragaza ko hazakomeza ibikorwa byo guhuza ibyagezweho n’amashami ya IRMCT ari na ko himakazwa imikoranire myiza kandi inoze. Yasabye ibihugu byose kumva ko ari inshingano bifite zo gutanga inkunga ihoraho mu gushyigikira ubushobozi bw’uru rwego n’imikoranire myiza.

Yasabye ibihugu byose gusangira na IRMCT umuzigo w’ubutabera yikoreye kandi bigashyira mu bikorwa ibihano byakatiwe abafunzwe n’uru rukiko ndetse n’urwa ICTR. Kuri ubu abantu 46 ni bo bakatiwe bakaba bakirimo kurangiriza ibihano bahawe mu bihugu 13.

Abitabiriye iyo Nteko Rusange bashimiye IRMCT uruhare yagize mu kwimakaza ubutabera no gushyigikira inzego z’ubutabera ari na ko iharanira ko abahamwa n’ibyaha mpuzamahanga bakoreye mu Rwanda na Yugoslavia babiryozwa.

Intumwa y’u Rwanda yashimye umuhate wa IRMCT mu gukurikirana abakekwaho ibyaha bya Jenoside yakorewe Abatutsi mu 1994

Abafashe ijambo kandi bashimye intambwe imaze guterwa mu kuburanisha urubanza rw’umuherwe Félicien Kabuga kuko ari umusingi ukomeye uganisha ku butabera busesuye buhabwa abazize ibikorwa yateye inkunga muri Jenoside yakorewe Abatutsi mu 1994.

Umwe mu bari bahagarariye Albania yagize ati: “Bitanga ubutumwa bukomeye bw’icyizere n’ukwiyubaka ku bahuye n’ihutazwa rikabije ry’uburenganzira bwa muntu mu Rwanda.”

Uwari ahagarariye Tanzania aho urukiko rwatangiye gukorera mu mwaka wa 2012 i Arusha, yavuze ko ubutabera mpuzamahanga budashobora kugerwaho mu gihe hatabayeho ubufatanye n’ubutwererane bw’ibihugu byose.

Yasabye ibihugu byose kubahiriza Ingingo ya 28 (2) y’Amasezerano y’i Roma  bigatanga abahunze ubutabera bagishakishwa.  Yijeje Inteko Rusange ko Repubulika ya Tanzania yiteguye gutanga ubufasha n’inyunganizi byose bikenewe mu iburanishwa ry’imanza zinyuranye zirimo n’urwa Kabuga Félicien.

Yasabye Umuryango w’Abibumbye gushyira Ingoro Ndangamateka ya IRMCT muri Arusha, kugira ngo izafashe mu burezi no kuba isoko y’ubushakashatsi mu birebana n’ubuyobozi ndetse n’ubutabera mpuzamahanga.

Uwahagarariye u Rwanda muri iyo Nteko, yavuze ko bimwe mu bihugu bigize Umuryango w’Abibumbye byanze gukorana na Leta y’u Rwanda ndetse na IRMCT, mu kugeza imbere y’ubutabera abakurikiranyweho ibyaha mpuzamahanga bya Jenoside, bityo bikaba bibonwa nk’inkunga biha abanyabyaha mu buryo butaziguye ngo bihishe ubutabera.

Yagize ati: “Imvugo zitomoye zishyigikira itegeko mpuzamahanga n’ubutabera ntizihagije ubwazo keretse igihe ziherekejwe n’ibikorwa byihuse.” Yaboneyeho gushima ibihugu birimo Leta Zunze Ubumwe z’Amerika ziherutse kohereza Beatrice Munyenyezi kuburanishirizwa mu Rwanda.

Yavuze ko ibikomere by’abarokotse Jenoside yakorwe Abatutsi mu 1994 bidateze gukira mu gihe hakiri ibihugu bigikomeje gucumbikira no guhishira abayibakoreye kandi bizwi aho batuye n’ibyo bakora bidegembya.

Nubwo u Rwanda rumaze kohereza mu mahanga impapuro 1,145 zo gufata abakekwaho ibyaha bya Jenoside banyanyagiye mu bice bitandukanye by’Isi, kuri ubu ibihugu bike ni byo bimaze gusubiza.

U Rwanda rwashimye imbaraga IRMCT yashyize mu guharanira ko abarokotse Jenoside yakorewe Abatutsi babona ubutabera, runashimangira ko rushyigikiye ibikorwa by’urwo rwego ari na ko rushima imbaraga zashyizwe mu guhiga abakekwaho ibyaha bya Jenoside. U Rwanda kandi rwashimye ko urubanza rwa Kabuga Félicien rwatangiye kuburanishwa

Inteko Rusange yakomeje guterana kuri uyu wa Kane taliki ya 20 aho ikurikirana ibikorwa bitandukanye by’Umuryango w’Abibumbye cyane cyane inama n’ibikorwa bihuza ibihugu bigize uyu muryango.  

  • NTAWITONDA JEAN CLAUDE
  • Ukwakira 20, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE