Umunyamabanga Nshingwabikorwa w’Intara y’Iburasirazuba Dr. Nyirahabimana Jeanne yasabye imiryango 120 yashyikirijwe inzu nshya zo guturamo kuzitaho kuko ari izabo.
Ubu ni ubutumwa yatanze mu muhango wabaye kuri uyu wa Gatandatu taliki ya 15 Nyakanga 2023 mu Mudugudu w’Akayange, mu Kagari ka Ndama, mu Murenge wa Karangazi, mu Karere ka Nyagatare, ubwo yagezaga kuri iyo miryango inzu nshya zo guturamo nyuma yo kwimurwa ahazakorerwa n’umushinga Gabiro Agribusiness Hub(GAH).
Ati: “Abahawe izi nzu icyo musabwa ni ukubungabunga izi nyubako, izi nzu mwahawe, mwazihawe ngo muzituremo, muziteho ni izanyu, ikirahure nikimeneka mugisubizeho, ariko ntituzumve muvuga ngo muze murebe ya nzu yanyu, oya ni iyacu namwe.”
Yakomeje ababwira ko izo nzu n’ibikorwa remezo bihubatse ari ibyerekana abayobozi beza bazirikana umuturage bakamuhoza ku isonga.
Bamwe mu batujwe muri izo nzu bashimira ubuyobozi bubitaho cyane ko bamwe muri bo batangarije itangazamakuru ko batakekaga kuba baba mu nzu nziza nk’izo, bakabishimira Perezida wa Repubulika ubatuje neza.
Umwe muri bo yagize ati: ”Kuba tugiye gutura muri izi nzu nziza zirimo amazi n’umuriro ni ikimenyetso ko ubuyobozi butwitayeho, nta kindi kinini twabasha kuvuga uretse gushimira Umukuru w’Igihugu we wabatumye ngo mudutuze heza gutya, ni ubwa mbere njyewe na bagenzi banjye benshi tubaye ahantu heza nk’aha”.
Gutuza abantu ahantu heza ni igikorwa cyatangiye kandi kigikomeza kuko Akarere ka Nyagatare mu mezi abiri ashize katashye izindi nzu nk’izi 70 mu Mudugudu wa Shimwa Paul, mu mpera z’uku kwezi kandi bakazongera gutuza indi miryango 120 i Rwabiharamba nanone mu Mudugudu ugiye kuzura muri aka Kagari ka Ndama.
Yanditswe NYIRANEZA Judith
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE