Inzozi z’Umujyi w’akataraboneka ku nkengero z’Ikiyaga cya Kivu

  • NTAWITONDA JEAN CLAUDE
  • Nyakanga 10, 2023
  • Hashize amezi 11
Image

Perezida wa Repubulika y’u Rwanda Paul Kagame yagize icyo asaba urubyiruko agira ati: “Igihugu cyacu gishobora kuba ari gito ariko ibitekerezo by’abaturage bacu ni binini. Ntimukagire inzozi nini gusa mugomba no gutekereza ibinini kandi mukareba kure. Imipaka yacu ntihagarika ibitekerezo byacu…”

Hari ku wa 11 Nzeri 2016 ubwo Perezida Kagame yaganirizaga urubyiruko rusaga 2000, arwibutsa ko igikorwa cyose gihebuje gihera mu nzozi zijya mu ntekerezo ari na ho hashingira igenamigambi rijyana n’ibikorwa. 

Kugira inzozi zagutse ni kimwe mu bigize ahazaza h’Isi by’umwihariko mu rwego rw’ubukerarugendo, ari na yo mpamvu u Rwanda rudakwiye gutezuka ku gutera intambwe zishingiye ku byemezo bikomeye rufata.

Mu myaka iri imbere, ibyari inzozi bishobora kuba impamo, Umujyi w’Altantis bivugwa ko waburiye irengero mu mazi yo mu Burengerazuba bw’Isi mu myaka ibihumbi n’ibihumbi ishize, ushobora kuvuka uhanzwe ku nkengero z’Ikiyaga cya Kivu.

Uwo Mujyi w’ubukerarugendo uteye amabengeza waba uw’Ubuhungiro muri iyi Si ihanganye n’ibinaniza abantu bitandukanye bituma abenshi bifuza kubona ahantu hatuje kandi hatanga umutekano n’amahirwe ashoboka yo kwidagadura no kuruhuka.

Mu gitekerezo cya “Facts On Rwanda”, uwo mujyi wahawe izina rya “Lake Kivu Oasis”, kubera agaciro waba ufite mu guhindura ahazaza h’ubukerarugendo bw’u Rwanda n’ubukungu bwarwo muri rusange. 

Kuba igicumbi cy’ubukerarugendo ni kimwe mu bisubizo u Rwanda ruhanze amaso bikajyana no kubaka imijyi y’ikoranabuhanga (Smart Cities) aho imipaka y’aho iterambere abantu biteze isenywa no guhanga udushya ndetse no gukoresha ikoranabuhanga rigezweho.

Ariko si ibyo gusa kuko Umujyi wo ku mazi y’Ikiyaga cya Kivu waba utandukanye by’ihabya n’imijyi y’imyidagaduro n’ubukerarugendo imenyerewe ku Isi nka Las Vegas n’iyindi.

Icyiza cy’uwo mujyi mushya ukora ku Kiyaga cya Kivu ni uko abaharuhukira batazigera bahura n’amafi arya abantu (sharks), nta byaha byawurangwamo hashingiwe ku mateka u Rwanda rwubatse ndetse nta n’impungenge ku bibazo ibyo ari byo byose kubera umutekano wahogoje amahanga. 

Uyu mushinga ubwawo ufite ubushobozi bwo kugaragaza mu buryo bwihariye u Rwanda mu ruhando mpuzamahanga, ugakurura ba mukerarugendo, abashoramari mpuzamahanga, ubucuruzi bushya n’izindi nyungu z’uburyo bwose.

Uwo mushinga kandi uramutse ushyizwe mu bikorwa wahindura u Rwanda icyicaro gikuru cyo guhanga udushya, ubucuruzi bugezweho ndetse n’icyerekezo cy’ubukerarugendo udashobora kwihanganira kubura ku rutonde rw’aho wifuza ko utazaba mu buzima utahakandagiye. 

Ibagirwa imbeho y’ubutita mu gihe cy’urugaryi cyangwa itumba by’ibwotamasimbi.  Umujyi wo ku Kivu waba ari agahebuzo kuko harangwa n’ikirere cyiza gihorana amafu mu gihe cy’umwaka wose, aho kwidagadura no kuruhuka bitajya mu kiruhuko kubera imihindagurikire y’ibihe.

Imiterere y’ikiyaga cya Kivu n’ibinyabuzima bikibamo bitanga umutekano usesuye kuko nta “sharks” cyangwa imvubu biharangwa. Ibyo byafasha abantu gukora siporo zitandukanye zo mu mazi, kuyatemberamo mu twato duto, n’ubwaro bunini ndetse hakiyongeraho hoteli zo mu mazi zunganira “Mantis Kivu Queen uBuranga”.

Uyu mujyi uramutse uteguwe ugashyirirwaho amahirwe yihariye yo koroshya ishoramari mu guhanga udushya no mu bikorwa by’imyidagaduro, nta kabuza u Rwanda rwakwisanga rutunze Umujyi ukomeye w’ubukerarugendo ushobora gukurura impano mpuzamahanga zitandukanye zitanga umusaruro udasanzwe mu nyungu z’abaturage.

Guhuza iterambere ry’ikoranabuhanga, ibikorwa by’imyidagaduro by’akataraboneka ndetse n’ibyiza  nyaburanga  ku Kiyaga cya Kivu, byatuma iki cyerekezo cy’ubukerarugendo kiba amahitamo ya benshi mu gihe cy’umwaka wose. 

Uyu mujyi utangiza ibidukikije waba ubaye uwa mbere w’Ikoranabuhanga kandi uhangana n’imihindagurikire uri kure ya Kigali; si umushinga ureba kure gusa abubwo waba ari n’intambwe ikomeye mu rugendo rw’u Rwanda rwo kuba icyicaro mpuzamahanga cy’ubucuruzi n’ubukerarugendo.

Ruramutse rugeze ku ntego yo kubaka uyu mujyi ruhereye kuri zero, u Rwanda rushobora kwigaragaza nk’intangarugero mu iterambere rigezweho, guhanga udushya no mu gusigasira umunezero w’abatuye Isi.

Nanone kandi u Rwanda rushobora gufungura imiryango itagira imipaka y’amahirwe arenze ayo rutekereza, binyuze mu igenamigambi rihamye, ishoramari, icyerekezo gisobanutse no kudakura mu ruge biba muri kamere y’Abanyarwanda. 

  • NTAWITONDA JEAN CLAUDE
  • Nyakanga 10, 2023
  • Hashize amezi 11
TANGA IGITEKEREZO
hope jean claude says:
Nyakanga 13, 2023 at 10:18 am

Byiza cyane

Andika igitekerezo

AMATEGEKO AGENGA IYANDIKA RY'IGITEKEREZO CYAWE