Inyubako yo ku Rwibutso rwa Kamonyi igiye kuvugururwa – MINUBUMWE 

  • NTAWITONDA JEAN CLAUDE
  • Gicurasi 15, 2023
  • Hashize amezi 9
Image

Inyubako iri mu mbago z’urwibutso rw’Akarere ka Kamonyi ruherereye mu Kibuga cya Nkongi mu Murenge wa Gacurabwenge mu Ntara y’Amajyepfo, igiye kuvugururwa nkuko byatangajwe na Minisiteri y’Ubumwe bw’Abanyarwanda n’Inshingano Mboneragihugu (MINUBUMWE).

Iyi nyubako kugeza ubu nta kintu kiyikorerwamo nubwo unayirebeye inyuma bigaraga ko yangiritse.

Amakuru Imvaho Nshya yashoboye kumenya ni uko iyi nzu yubatswe n’Umuyango SAFU (Genocide Surviors Fund) ikaba yaruzuye itwaye miliyoni 120.

Minisitiri Dr Bizimana J. Damascène yahamirije itangazamakuru ko iyi nzu igiye kuvugururwa izatwara miliyari ebyiri mu gihe cy’imyaka ibiri.

Ati: “Icyo tuzakora umwaka utaha, ni ukuzatangira icyiciro cya mbere cyo kuyivugurura. Mu by’ukuri nubwo mubibona hari inyubako nini ariko hari ibintu byinshi cyane ibura.

Ntabwo ifite imirindankuba, ntabwo ifite imiyoboro y’ikoranabuhanga mbega birasaba kuyijyanisha n’inyubako z’iki gihe, hazasabwa imirimo myinshi cyane”.

Avuga ko ibyo ari byo bizaba bikozwe mu cyiciro cya mbere, kuyisana, gushyiramo ibikenewe hanyuma umwaka uzakurikiraho hakabaho kuyirangiza.

Yagize ati: “Navuga ko mu myaka ibiri ari bwo inyubako izaba irangiye igashobora gukoreshwa. Twifuza ko izakoreshwa mu kubika ibimenyetso by’amateka, gushyiramo inyandiko zitandukanye, igakorwamo ikigo cy’ubushakshatsi, abashaka kuzasoma amateka bakaba babona aho bayasomera”.

Inyubako kandi izashyirwamo n’ibyangombwa by’uburyo bw’ikoranabuhanga ku buryo n’abantu bashobora kubirebera aho ngaho.

Inyubako igizwe n’ibyumba bitatu binini bizajya biberamo inama mpuzamahanga, inama zibera mu gihugu, aho abantu bashobora kuganira ku iterambere, ku bukungu, amateka n’ibindi muri make hagakora uko bikwiye.

Ni mu rwego rwo ngo kugira ngo ibintu byose bye kujya bibera i Kigali gusa, kuko Kamonyi atari kure ahubwo ari hafi ya Kigali.

Ingengo y’imari yose ibikorwa bizatwara ni hafi miliyari ebyiri (2,000,000,000frs).

Yagize ati: “Birasaba kuyisubiramo kuko yarangiritse bihagije kandi ntabwo yari ifite ibyangombwa, ubwo rero tuzaba dukoze icyiciro cya mbere hanyuma ikindi tuzagikora umwaka utaha”.

Umuryango Uharanira inyungu z’Abacitse ku Icumu (IBUKA), utangaza ko inyigo z’inyubako zishobora kuba zitaraganiriweho.

Inzibutso nyinshi z’abazize Jenoside yakorewe Abatutsi, IBUKA ivuga ko akenshi imiryango y’abarokotse itanga ibitekerezo usanga ari byo bishobora kugena ingano y’inzu bitewe n’ibizajyamo ndetse n’icyo bifuza kuri urwo rwibutso.

Kabanda Callixite, umwe mu bagize inama y’ubutegetsi y’Umuryango uharanira inyungu z’abacitse ku icumu (IBUKA) yagize ati: “Iyi nzu bigaragara ko yababanye nini cyane, bari bataritegura gushyiramo amateka no kuyatunganya ngo bayashyiremo.

Mu byo twasaba ni uko yavugururwa hanyuma bagakorana n’abarokotse muri kano gace kugira ngo iyi nzu ishyirwemo ibigomba kuyijyamo”.

IBUKA igaragaza ko inyubako iri mu mbago z’urwibutso ndetse iruhande rw’imva, bityo ko itari ikwiriye kuba ibiro nk’ibisanzwe ahubwo ikwiye kugenerwa amateka ya Kenoside yakorewe Abatutsi.

Kabanda ati: “Ni muri urwo rwego inzu yatangiye kubakwa ibyari bigamijwe bitandukanye n’ibyo yakagombye gukora ngira ngo ni yo mpamvu habayeho gutinda gukoreshwa”.

Agaragaza ko hari ikibazo cy’amasanduka mu rwibutso rw’Akarere ka Kamonyi arimo gusaza kuko akozwe mu biti bya sipure ku buryo atabika imibiri mu gihe kirekire.

Meya w’Akarere ka Kamonyi Dr Nahayo Sylvere, yavuze ko Akarere kazita ku nzibutso no gushishikariza abaturage gutanga amakuru kugira ngo imibiri itarashyingurwa izashyingurwe mu cyubahiro.

Ubuyobozi bw’Akarere ka Kamonyi butangaza ko buzakomeza kurwanya ingengabitekerezo ya Jenoside kandi ko buzita ku mibereho y’abarokotse Jenoside yakorewe Abatutsi.

Minisitiri Dr Bizimana J. Damascene yavuze ko inyubako iri ku rwibutso rwa Jenoside rwa Kamonyi igiye kuvugururwa (Foto Internet)
  • NTAWITONDA JEAN CLAUDE
  • Gicurasi 15, 2023
  • Hashize amezi 9
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE