Inkingi y’Umutekano ikomeje guhiga izindi mu Rwanda

  • NTAWITONDA JEAN CLAUDE
  • Ukwakira 14, 2022
  • Hashize imyaka 2
Image

Kuri uyu wa Gatanu taliki ya 14 Ukwakira 2022, Urwego rw’Igihugu rw’Imiyoborere (RGB) rwongeye gushyira ku mugaragaro ku nshuro ya cyenda, ibyavuye mu bushakashatsi ku bipimo by’imiyoborere buzwi nka ‘Rwanda Governance Scorecard’ (RGS).

Iki cyegeranyo cyubakiye ku nkingi umunani ari zo: Iyubahirizwa ry’Amategeko, Uburenganzira mu bya Politiki n’Ubwisanzure bw’Abaturage, Imiyoborere Idaheza kandi Abaturage bagizemo uruhare, Umutekano n’umutuzo, Kuzamura imibereho myiza y’Abaturage, Imiyoborere mu bukungu n’ubucuruzi, ndetse hakaza Kurwanya Ruswa no Gukorera mu Mucyo.

Muri uyu mwaka inkingi ebyiri muri izo nkingi umunani zikorwaho ubushakashatsi zarengeje amanota 90%, mu gihe izindi eshatu zagize hejuru ya 85%, na ho izisigaye zikaba ziri hejuru ya 75%.

Mu bushakashatsi bw’uyu mwaka, inkingi iza ku isonga ni iy’Umutekano ifite amanota 95.53%, ikaba yongeye kwiharira uyu mwanya mu gihe mu mwaka ushize yari ku manota 95.47%. Aya manota akomeje kwiyongera kuko nko mu mwaka wa 2020 yavuye kuri 95,44 %.

Inkingi ya kabiri yabaye ijyanye n’Iyubahirizwa ry’Amategeko yagize amanota 90.81% mu gihe mu mwaka ushize yari ku manota 87.08%.

Hakurikiraho inkingi y’Uburenganzira mu bya Politiki n’Ubwisanzure bw’Abaturage ni yo ikurikiraho n’amanota 87.84%, mu gihe mu mwaka ushize yari kuri 83.80%. Hakurikiraho nanone iyo Kurwanya Ruswa no Gukorera mu Mucyo yagize amanota 87.31% ivuye kuri 86.76%.

Inkingi y’Imiyoborere Idaheza kandi Abaturage bagizemo uruhare yakurikiyeho n’amanota 87.19% mu gihe mu mwaka ushize yari ku manota 84.19%, hakurikiraho iy’ Imiyoborere mu bukungu n’ubucuruzi yagize amanota 77.85% ivuye kuri 74.65% yagize mu 2021.

Inkingi ikurikiraho ni ijyanye n’Ireme ry’Imitangire ya Serivisi yagize amanota 77.69%, ikaba yaracitse intege ugereranyije n’umwaka ushize aho yari ku manota 81.86%.

Inkingi iza inyuma y’izindi ni iyo Gushora Imari mu kuzamura Imibereho myiza y’Abaturage yagize amanota 75.23% ivuye kuri 75.23% yari ifite mu mwaka uhize.

Umuyobozi Mukuru wa RGB Dr. Usta Kaitesi, yashimiye inzego zose zatanze umusanzu wazo kugira ngo ubwo bushakashatsi bukorwe, aboneraho no gushimangira ko bufasha mu kugaragaza intambwe imaze guterwa mu nzego zinyuranye z’imiyoborere y’Igihugu.

Yakomoje kandi no ku buryo Leta y’u Rwanda ikomeje gutegura no gushyira mu bikorwa Politiki nshya zikemura ibibazo bitahozeho byugarije Isi ya none, birimo ibishingiye ku ikoranabuhanga. Imihindagurikire y’ikirere, guharanira uburenganzira bw’abafite ubumuga n’ibindi byiciro by’abanyantege nke.

  • NTAWITONDA JEAN CLAUDE
  • Ukwakira 14, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE