Ingorane za EAC itabaye RDC hatarimo Ingabo z’u Rwanda

  • NTAWITONDA JEAN CLAUDE
  • Ugushyingo 7, 2022
  • Hashize umwaka 1
Image

Mu ntangiriro z’ukwezi kwa Nyakanga uyu mwaka, Perezida wa Repubulika y’u Rwanda Paul Kagame  yatanze umucyo ku kuba Repubulika Iharanira Demokarasi ya Congo (RDC) yarikomye umusanzu w’Ingabo z’u Rwanda mu gutanga ubutabazi bwo kugarura umutekano urambye mu Burasirazuba bw’icyo Gihugu ahabarurwa imitwe yitwaje intwaro igera ku 130.

Yagize ati: “Ntawe twingingira kuba muri izi ngabo… Izi ngabo ziramutse zishoboye kugera ku ntego yazo ku buryo nta bitero, byaba iby’ingabo za Congo cyangwa FDLR byongera kugera mu Rwanda, ni iki cyatuma ntashyigikira uwo mugambi? Muri make biranshimishije kuba ibi bizakorwa tutabigizemo uruhare, kuko kuba muri uyu mutwe w’ingabo byari buzadutware n’ubundi bushobozi. Kuki nashora imari hari undi umbwira ati: oya, nishimiye kubigukorera? Nta kibazo na kimwe mbifiteho rwose!”

Impuguke mu bya Politiki zakomoje ku mpungenge ziri mu kuba Ingabo ziturutse mu bindi bihugu byo mu Karere zaremerewe gutanga umusanzu wazo iz’u Rwanda zikirengagizwa, hagaragazwa uburyo ibyo bifite ingaruka ku musaruro wo kugera ku ntego ndetse no gusigasira umubano w’ibihugu bihuriye mu Muryango w’Afurika y’Iburasirazuba (EAC).

Ikigo Mpuzamahanga cyiga ibijyanye n’Umutekano muri Afurika (Institute of Security Studies/ISS Afurika) cyagaragaje ugushidikanya ku musaruro w’ubutabazi burimo gutegurirwa RDC ku rwego rw’Akarere mu gihe u Rwanda rwaba rutabigizemo uruhare.

Impuguke za ISS zivuga ko EAC ikwiye kwigira ku bunararibonye bw’Ingabo z’Umuryango w’Afurika Yunze Ubumwe zoherejwe muri Somalia, Ingabo za SASD zoherejwe muri Mozambique ndetse n’iza G5 zoherejwe guhagana na Boko Haram muri Chad.

Koffi Sawyer, Umushakashatsi wa ISS ukorera i Pretoria muri Afurika y’Epfo, yagize ati: “Ayo masomo arimo kuba hakenewe imyiteguro ihagije mu guhuza ibikorwa, guha agaciro abafatanyabikorwa b’abaturanyi, inkunga yo kubaka amahoro arambye ndetse no kubona ibya ngombwa byose bikenewe.”

Yajomeje agira ati: “Mu gice gicanganye cyane nk’u Burasirazuba bwa RDC, ingorane EAC izahura na zo zishobora kuruta inyungu yiteze. Muri zo harimo kubona ubushobozi bw’amafaranga, ubuhanga na tekiniki, ndetse n’abakozi bashyigikira urugendo rwa Politiki rwinjira rukagera ku mpamvu muzi y’ibibazo bya RDC harimo ibibazo byimbitse by’imiyoborere n’iby’imikorere y’inzego.”

Impuguke zivuga kandi ko indi mbogamizi izaba iyo gukemura impungenge za bimwe mu bihugu nk’u Rwanda zirebana n’umutekano wabyo wangizwa n’imitwe yitwaje intwaro ituruka muri RDC, ndetse n’ibindi bibazo bishamikiyeho birimo ivanguramoko, kubuza bamwe uburenganzira kuri gakondo yabo, ndetse no kuba ubutabera budatangwa mu buryo butandukanye.

Bavuga ko kwishakamo ibisubizo guhereye hasi kwari gukwiye kujyana n’ubuhuza bukozwe ku rwego mpuzamahanga ndetse n‘ibikorwa byo kubaka amahoro arambye.

RDC ihangayikishijwe n’inyeshyamba za M23 mu gihe yikoreye ibibazo by’imitwe yitwaje intwaro ikabakaba 130

Sawyer yakomeje agira ati: “Inshingano ikomeye kurusha izindi ishobora kuzaba kubaka icyizere hagati y’ibihugu. Umubano hagati ya RDC, u Rwanda na Uganda urakennye kuko RDC ishinja abo baturanyi bayo gushyigikira M23. Hakenewe imbaraga za dipolomasi zikomeye kandi zimara Igihemu guhi ndura ibi bintu.”

Ibibazo by’u Rwanda na RDC byatumye Ambasaderi w’u Rwanda i Kinshasa yirukanwa ntaho bihuriye n’ikibazo nyir’izina kuko kunanirwa gukemura ikibazo nyamukuru ngo bishobora guteza ingorane zikomeye.

Igisubizo kirambye gikwiye kuzana n’uruhare rw’u Rwanda

Sawyer yavuze ko igisubizo kirambye gishobora kuboneka gusa mu gihe habayeho kureka inarijye, u Rwanda rugahabwa agaciro karwo nk’Umunyamuryango wa EAC, nubwo kuri ubu rwakuwe mu bihugu bigomba gutanga ingabo zo guhangana n’inyeshyamba.

Hari bamwe babonye iyo ntambwe nk’uwitwazo rwa RDC rwo gukomeza gukingira ikibaba umutwe w’iterabwoba wa FDLR na wo uri mu mitwe ikwiye kuba irandurwa burundu ariko kuri ubu wafunguriwe amarembo yo gukorana n’ingabo za Leta (FARDC).

Kohereza ingabo z’u Burundi n’iza Uganda mu Burasirazuba bwa RDC mu Gushyingo n’Ukuboza 2021 ngo zijye guhangana n’abanzi bazo byahawe umugisha mu masezerano ya Nairobi, ariko u Rwanda ntirwahawe ayo mahirwe yo kujya kwivuna umwanzi w’igihe kinini ari we FDLR ikomeje guhungabanya umutekano warwo.

Impuguke zivuga ko ingabo za EAC zikwiye kubanza zamenya icyo zigiye gukora muri RDC, ndetse zikanagaragaza byimbitse inshingano zazo, gushyiraho uburyo bw’imikorere n’imikoranire, gushyiraho uburyo bwo kugenzurwa ndetse no gukorana n’Ingabo z’Umuryango w’Abibumbye (MONUSCO).

Izo mpuguke zisanga kandi hakenewe kugaragaza mu buryo bweruye uburyo hakemurwa ikibazo cyo kuba ingabo za FARDC zishinjwa gukorana n’imwe mu mitwe y’inyeshyamba mu mugambi wo kurwanya inyeshyamba za M23 zishinjwa guterwa inkunga n’u Rwanda.

ISS isanga hatitawe ku kuba u Rwanda rwaba rushyigikiye M23 cyangwa rutayishyigikiye, kurukura mu ngabo zihuriweho bizarushaho kongera ibibazo aho kuba igisubizo, n’amahirwe yo kuba ibihugu byakwiyungira muri ibyo bikorwa akaba atakaye uko.

Impuguke kandi zivuga ko mbere yo kugaba ibitero ku mitwe yitwaje intwaro hagomba kubanza kugenzurwa ingaruka bizagira ku basivili, ariko zikanashimangira ko imyiteguro myiza ishobora gutuma izi ngabo ziba umusemburo w’amahoro no kugera ku byo ingabo za MONUSCO zananiwe kugeraho mu myaka irenga 20 ishize.  

  • NTAWITONDA JEAN CLAUDE
  • Ugushyingo 7, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE