Ingaruka zo kwirengagiza ibyifuzo by’umuturage mu igenamigambi ry’u Rwanda

  • NTAWITONDA JEAN CLAUDE
  • Ugushyingo 13, 2022
  • Hashize umwaka 1
Image

Ihuriro ry’Imiryango itari iya Leta iharanira uburenganzira bwa muntu mu Rwanda (CLADHO) yagaragaje impungenge ziba mu gihe umuturage agize uruhare mu kugaragaza ibyo yifuza byashingirwaho mu igenamigambi.

Hashize igihe kinini Abanyarwanda bagira uruhare mu gutegura ibizashingirwaho mu igenamigambi ry’umwaka ukurikira uwo barimo.

Mu byumweru bibiri bishize mu Karere ka Kicukiro mu Murenge wa Nyarugunga, abaturage basabye ibikorwa remezo birimo imihanda, kubakirwa ruhurura, amashuri ndetse n’amavuriro y’ingoboka (Postes de Santé).

Dr Emmanuel Safari, Umunyamabanga Nshingwabikorwa wa CLADHO, avuga ko umwaka ushize hari ibyifuzo abaturage basanze hari ibyari bibabaje babonaga ari iby’ingenzi kandi bishobora kubagirira akamaro bityo basaba ko byashyirwa mu igenamigambi ry’umwaka ukurikira.

Ati” “Byashoboraga kubagirira akamaro aho baherereye mu Mirenge cyangwa se mu Karere babishyira imbere. Turifuza rero ko uyu mwaka haza ibintu bishyashya biza bibisimbura kuko na bya bindi basabye ntibyakemutse”.

Ku rundi ruhande CLADHO igaragaza ko iyo umuturage asabye ibikorwa remezo ntibishyirwe mu bikorwa, kuri we ngo abona ibyifuzo bye byarateshejwe agaciro.

Dr Safari ati: “Habaho ingaruko iyo umuturage atanze icyifuzo cyangwa agatanga n’igitekerezo, akababwira ati turifuza ko dukorerwa umuhanda, twubakirwa ivuriro n’ibindi, noneho akabona ntabwo abihawe, icyo gihe ahita abona ko babitesheje agaciro”.

Mutamba Léonie utuye mu karere ka Gasabo avuga ko basabye ko umuhanda wa Nduba wakorwa kubera ibiraro byangiritse ariko ngo n’ubu ntibirakorwa.

Asobanura ko iyo umwaka urangiye mu nteko z’abaturage zigamije kumva ibyo bifuza byashyirwa mu igenamigambi ry’umwaka ukurikiyeho, bagaragaza ko bakeneye kubakirwa uyu muhanda ariko ngo ntibikorwa, ntibanabwirwa n’impamvu bitakozwe.

Ati: “Iyo dutanze ibitekerezo by’ibyo tubona twakorerwa twe tudashoboye nk’abaturage, noneho tukabona ntibishyizwe mu bikorwa, tubona ko ibyifuzo twatanze mbere bitahawe agaciro”.

Mulindwa Prospere, Umuyobozi Mukuru w’ishami ry’Igenamigambi n’Isuzumabikorwa muri Minisiteri y’Ubutegetsi bw’Igihugu (MINALOC), avuga ko kuzamura uruhare rw’umuturage mu igenamigambi mu ngengo y’imari, ari gahunda Minisiteri ihoramo.

Asobanura ko ibipimo bitazamuka ari Leta yonyine ibikoze ahubwo ko ifatanya n’imiryango itari iya Leta.

Ati: “Twemera ko hari aho tutaragera nkuko twabyifuzaga ariko tugashima ko uruhare rw’umuturage rugenda ruzamuka”.

Akomeza agira ati: “Ibyo batugiramo inama (CLADHO) turabyemera ahubwo tugenda tubishyira muri gahunda kandi tukazakomeza kugenda tubaha amakuru”.

Dr Safari Emmanuel Umunyamabanga Nshingwabikorwa wa CLADHO (Ibumoso), Ntalindwa Prosper, Umuyobozi Mukuru w’ishami ry’igenamigambi muri MINALOC (Hagati)

Agaragaza ko mu gihe umuturage ibyo yifuje atabihawe, nk’Inzego z’ibanze zigiye kujya zigaruka ku muturage zikamusobanurira impamvu y’ibitarakozwe, zishingiye kuri bya byifuzo bitashyizwe mu bikorwa.

Mu kwinjiza abaturage mu igenamigambi, MINALOC ngo ibanza kubaha amakuru ku bitekerezo bari baratanze mu gihe bakoraga igenamigambi umwaka ushize.

Mulindwa ati “Tubabwira ibyabonewe ingengo y’imari n’aho bigeze bishyirwa mu bikorwa ariko tukabagaragariza n’ibitarashoboye kubonerwa ingengo y’imari hanyuma tugasaba uburenganzira ko ari byo biherwaho mu ngengo y’imari y’umwaka utaha turimo gutegura”.

CLADHO ihamya ko icyorezo cya Covid19 cyagize ingaruka zikomeye, aho abaturage batagize umwanya wo gutanga ibitekerezo ku bizashingirwaho hagenwa igenamigambi rya 2021/2022.

  • NTAWITONDA JEAN CLAUDE
  • Ugushyingo 13, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE