Impamvu z’ipfunwe ryo gufatira mu ruhame imiti igabanya ubukana bwa VIH/ SIDA

  • NTAWITONDA JEAN CLAUDE
  • Ugushyingo 22, 2022
  • Hashize imyaka 2
Image

Bamwe mu bafata imiti igabanya ubukana bwa Virusi itera SIDA bari mu byiciro bitandukanye, ari abakuru ari n’abato ndetse n’abatwite ariko bafite ubwandu batanga ubuhamya ku mpamvu zituma hari abaterwa ipfunwe no gufatira mu ruhame imiti igabanya ubukana bwa VIH/SIDA.

Zimwe muri izo mpamvu ni ukutiyakira, kwanga guta agaciro n’icyubahiro, imyumvire ishingiye ku muco, ubumenyi buke, imyemerere n’ibindi.

Umwe mu bafata imiti igabanya ubwandu bwa Virusi itera SIDA wo mu Karere ka Karongi utarifuje ko amazina ye agaragazwa yavuze ko hakiri abantu baterwa ipfunwe no kujya gufatira mu ruhame imiti igabanya ubukana bwa VIH/SIDA.

Yagize ati: “Abantu bashakaga ibinini bigabanya ubukana, bajyaga i Kigali no ku bitaro bya Kabgayi, nyuma haza kubaho ubuvugizi ibitaro bya Kibuye bihabwa iyi serivise yo gutanga imiti, tunishimira uretse bake muri twe bagifite ipfunwe ryo gufatira imiti mu ruhame, gusa bari kugenda babyumva bakaza”.

Mukanyarwaya Beatrice umuforomo mu bitaro bya Kibuye, yatangarije Imvaho Nshya ko koko hari abaterwaga ipfune no kuza gufatira imiti mu ruhame, noneho bakaguma mu modoka hafi aho imbere y’ibitaro bya Kibuye bakayibashyirayo.

Yongeyeho ariko ko uko imyaka igenda ishira bahabwa inyigisho, hakorwa ubukangurambaga imyumvire igenda ihinduka ku buryo bigenda   bishira.

Ati: “Mu bo dukurikirana 890 abagifite ipfunwe bari munsi 10″.

Undi ufata imiti igabanya ubukana bwa VIH/SIDA yavuze ko bigora kwiyakira no kugaragara mu ruhame umuntu afata imiti, kuko bitesha umuntu agaciro n’icyubahiro. Muri rusange usanga bamutekerezaho ko yasambanye bakiyibagiza ko umuntu ashobora no kuba yayivukana.

Gusa yagarutse ku buryo iyo umuntu amenye uko ahagaze akiyakira, akagira ubumenyi ku myifatire n’imyitwarire agomba kugira, akanafata neza imiti bituma umuntu arama kandi akumva yifitiye icyizere.

Ku kibazo cy’umuco n’idini ho umuyoboke  umwe yatangarije Imvaho Nshya ko bitoroshye gufatira mu ruhame imiti igabanya ubukana bwa Virusi itera SIDA, kuko bagenzi bawe batangira kukwibazaho.

Yagize ati: “Njye nk’umukirisitu birangoye kugaragara mu ruhame mfata imiti igabanya ubukana bwa Virusi itera SIDA kuko batangira kunyibazaho, bakanshyira mu cyiciro cy’abasambanyi, bikaba byatuma usa n’ushyizwe mu kato”.

Abajijwe uko muri rusange sosiyete yafata umuntu mu gihe urugero umuntu yakora mu mufuka akagira ibyago hagahanukamo agakingirizo avuga ko byateza ikibazo, ko bamwitaza ndetse bakaba banavuga ko agiye gusambana, kuruta ko yaba ari ikaramu iguye cyangwa mushwari kuko bwo bamubwira.

Undi utwite we yashimye gahunda yo gutuma abana barindwa kwandura, ashishikariza buri muntu kwipimisha akamenya uko ahagaze kuko bifasha kubungabunga ubuzima, ari ubwe ku giti cye ndetse n’ubw’umuryango we muri rusange.

Gahunda y’u Rwanda ni uko Abanyarwanda bose n’abatuye u Rwanda mu 2030 bazaba batakirangwaho indwara ya SIDA, umuntu akazaba agifite ubwandu bwa Virusi itera SIDA ariko atarwaye SIDA.

Kwipimisha ni ubushake, gutanga ubuhamya mu ruhame ko umuntu yanduye  na byo ni ubushake. Naho gufata imiti igabanya ubukana bihita bitangira mu gihe umuntu yipimishije agasanganwa Virusi itera SIDA.

Ibi bikazafasha kwesa ibipimo mpuzamahanga bya 95% inshuro 3, aho nibura 95% bipimishije,  nibura 95% mu bazi uko bahagaze bakaba baranduye   bafata imiti kandi muri abo bafata imiti nibura 95% bakaba batakigaragaraho ubwandu bwa Virusi itera SIDA.

  • NTAWITONDA JEAN CLAUDE
  • Ugushyingo 22, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE