Imitungo y’ibigo by’imari mu Rwanda igeze kuri tiriyari 8,5 Frw

  • NTAWITONDA JEAN CLAUDE
  • Ugushyingo 16, 2022
  • Hashize umwaka 1
Image

Banki Nkuru y’u Rwanda (BNR) yatangaje ko urwego rw’imari mu Rwanda rwakomeje gutera imbere no mu bihe ubukungu bw’Isi budahagaze neza kuko imitungo y’ibigo by’imari yiyongereye ku kigero cya 18.8% kugeza muri Nzeri 2022, ugereranyije na Nzeri y’umwaka wa 2021.

Guverineri wa BNR John Rwangombwa, yavuze ko imitungo y’ibigo by’imari yari igeze ku gaciro k’amafaranga y’u Rwanda miliyari 8.577 (ni ukuvuga tiriyari 8 na miliyari 577 Frw) muri Nzeri y’uyu mwaka, kavuye kuri miliyari 7.2019 (tiriyari 7 na miliyari 219 Frw) ibyo bigo byari bitunze mu mwaka wa 2022.

Ubwo bwiyongereye mu bihe u Rwanda n’Isi yose bikomeje guhangana n’ihindagurika ry’ibiciro ku isoko ryatewe n’impamvu zitandukaye zirimo intambara ya Ukraine n’u Burusiya bifite isoko rinini ry’ibikomoka kuri peteroli , gazi, inyongeramusaruro, ibyuma, ibinyampeke n’ibindi bicuruzwa bitandukanye.

Kuba ibyo bihugu byafatwaga nk’iby’ingenzi mu ruhererekane rw’ubucuruzi ku isoko bihugiye mu ntambara, byongereye ubukana bw’ingaruka z’icyorezo cya COVID-19 ku bukungu bw’Isi, bituma ibiciro ku masoko byiyongera mu buryo budasanzwe.

Guverineri Rwangombwa yagize ati: “Izamuka ry’ibiciro ku masoko rizakomeza kurenza Igihe twateganyaga ko rizaba ryagabanyutse. Ibyo biraterwa cyane cyane n’ingorane z’ubukungu mpuzamahanga ibiciro bihanitse by’ibikenerwa mu buhinzi,ndetse n’igabanyuka ry’umusaruro w’ubuhinzi.”

BNR igaragaza ko mu gihembwe cya 3 cya 2022, igipimo cy’ubwiyongere bw’ibiciro cyageze kuri 16.4% kivuye kuri 12.1% mu gihembwe cya 2. Biteganyijwe ko uyu mwaka uzarangira iri zamuka riri ku rugero rwa 13.2% bikazaba byazamutseho 1.1% ku gipimo cyari giteganyijwe.

BNR ivuga ko ibiciro bizakomeza kuba hejuru kugera mu gice cya 1 cy’umwaka utaha wa 2023, ariko mu gice cya 2 bigende bimanyuka hashingiwe ku ngamba zinyuranye zirimo no kuzamura igipimo cy’inyungu fatizo ya BNR ku rugero rwa 6.5% bivuye kuri 6% cyari cyashyizweho mu kwezi kwa Kanama uyu mwaka.

Ati: “Kubera ibyo byagaragaye, Komite ya Politiki y’Ifaranga (MPC)yazamuye igipimo cy’inyungu fatizo yayo iva kuri 6.0% igera kuri 6.5%, mu kugabanya agahato abaguzi bashyirwaho n’ihindagurika ry’ibiciro ku masoko, n’ubushobozi bwabo bwo kugura bukomeze kubungabungwa.”

Guverineri Rwangombwa yavuze ko agaciro k’ibicuruzwa byoherejwe mu mahanga kiyongereyeho 39.9% mu gihembwe cya 3 cya 2022, ariko n’agaciro k’ibitumizwa nako kazamukaho 38.9%. Ibi byatumye icyuho hagati y’ibitumizwa n’ibyoherezwa kizamuka ku rugero rwa 38.3% nubwo hari icyizere ko ibyo bitazahungabanya agaciro k’ifaranga kubera ubwizigame buhari buhagije.

Nubwo hari ibibazo by’ubukungu binyuranye, ubukungu bw’u Rwanda buzakomeza kuzahuka, aho buteganyijwe kuzamuka ku rugero rwa 6.8% muri uyu mwaka mu gihe bwari buteganyijwe kuzamuka ku rugero rwa 6%.

  • NTAWITONDA JEAN CLAUDE
  • Ugushyingo 16, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE