Imishinga y’amamiliyari u Rwanda rwateguriye guhangana n’ibiza

  • NTAWITONDA JEAN CLAUDE
  • Nyakanga 6, 2023
  • Hashize amezi 11
Image

Guverinoma y’u Rwanda ikomeje gushaka ibisubizo birambye mu birebana no guhangana n’imihindagurikire y’ibihe iteza ibiza mu bice bitandukanye by’Igihugu bigatwara ubuzima bw’abantu ndetse bikangiza imitungo yabo n’ibikorwa remezo.

Ni muri urwo rwego, hari imishinga myinshi yatangiye gukorwa n’indi ikiri mu nzira ifite agaciro k’amamiliyari menshi, yose igamije guhindura icyerekezo cy’u Rwanda rukaba igihugu gifite ubwirinzi buhagije ku ngaruka z’imihindagurikire y’ibihe.

Minisitiri w’Intebe Dr. Ngirente Edouard, mu cyumweru gishize yatangaje imwe muri iyo mishinga myinshi yateguriwe guhangana n’ibibazo birebana n’imihindagurikire y’ibihe.

Umushinga wo kubaka ubudahangarwa bw’Intara y’Iburasirazuba (TREPA)

Umushinga wiswe “Transforming Eastern Province through adaptation” (TREPA) washowemo amafaranga y’u Rwanda asaga miliyari 50, ushyirwa mu bikorwa n’Ikigo Mpuzamahanga kubungabunga Ibidukikije (IUCN) gifayanyije na Guverinoma y’u Rwanda ibinyujije mu Kigo cy’Igihugu gishinzwe Amashyamba (RFA) n’Ikigo cy’Ababiligi cy’Iterambere, Enabel.

Ni umushinga witezweho kubungabunga ubuso bwa hegitari zirenga 60,000 z’ubutaka zikubaka ubushobozi bwo guhangana n’imihindagurikire y’ibihe binyuze mu gutera amashyamba, kubungabunga no gusazura ahari, ingamba zo kurwanya isuri mu Turere tw’Intara y’Iburasirazuba ari two Kirehe, Kayonza, Gatsibo, Ngoma ndetse n’aka Bugesera.

Uyu mushinga kandi wimakaza ikoreshwa ry’ingufu zitangiza ibidukikije hifashishwa ikoranabuhanga rigezweho mu ngo zisaga 100,000 zo mu Ntara y’Iburasirazuba.

Witezweho kandi kuzafasha kubaka amasoko afite ubudahangarwa ku mihindagurikire y’ibihe ndetse n’uruhererekane rw’ubucuruzi rwongerera ubushobozi ishoramari rikorwa mu mashyamba, kongera ubushobozi bw’abaturage mu gucunga no gufata neza amashyamba yabo no gushyigikira abahinzi bato n’abaciriritse mu gukora ubuhinzi bufite ubudahangarwa ku mihindagurikire y’ibihe.

Dr. Ngirente ati: “Uyu mushinga rero waratangiye umaze gutera ibiti bivangwa n’imyaka kuri hegitari zigera ku 40,000. Ibyo byose tuvuga bijyanye n’ibidukikije ni ibyo kugabanya nibura ubukana ibiza byatugiraho biramutse bije. Ibiza biterwa n’imihindagurikire y’ibihe ntabwo wabyirinda ijana ku ijana kuko biterwa rimwe na rimwe n’uko turi ku Isi, hari n’ibindi bikorwa bikorwa n’abandi bantu batari igihugu cyacu bitugiraho ingaruka.”

Uyu mushinga unitezweho gutera amashyamba ku buso bungana na hegitari 8000, ukaba unatanga ibigega byo gufata amazi y’imvura mu Ntara y’Iburasirazuba ukazageza mu 2027.

Umushinga COMBIO urwanya ingaruka z’imihindagurikire y’ibihe mu Burasirazuba

Uyu mushinga watangiye gushyirwa mu bikorwa guhera mu kwezi k’Ukuboza 2021 ukazamara imyaka itandatu kugera mu 2027, aho ushyize imbere ibikorwa byo guhangana n’ingaruka z’imihindagurikire y’ibihe mu Ntara y’Iburasirazuba.  

Ni umushinga uzagarura muri iyo Ntara ibihingwa bishya bitanga umusaruro ujyanye n’imiterere yayo ndetse n’ubwoko bushya bw’ibiti bihabereye mu kubungabunga urusobe rwose mu buryo burambye.

Uwo mushinga ukorera mu Turere 7 tugize Intara y’Iburasirazuba, ukaba ufite agaciro ka miliyari zirenga 8 z’amafaranga y’u Rwanda. Muri uyu mushinga hasazurwa ndetse hakabungabungwa urusobe rw’ibinyabuzima mu byanya bikomye n’amashyamba ya cyimeza, ndetse no guhanga ibindi byanya bishya bibumbatiye urusobe rw’ibinyabuzima.

Uzafasha n’abahinzi kubaka uruhererekane rw’ubuhinzi rushingiye ku byaremwe no gushinga ibigo bibungabunga ibidukikije, no gushyiraho uburyo bwo guhererekanya amafaranga bworoshya ihererekanywa ry’amafaranga ariko bunashyigikira kandi bugateza imbere amoko y’ibihingwa byera ku butaka bwabo.

Umushinga wo gukumira imyuzure mu gace k’Ibirunga

Umushinga wo gukumira imyuzure mu gace k’Ibirunga ukorwa mu byiciro binyuranye kubera ko umara igihe kinini. Ni yo mpamvu Leta yagiye igena ingengo y’imari yo gukumira imyuzure buri mwaka ku buryo ibimaze gukorwa byatumye amazi atakiva mu Birunga ngo agere mu Mujyi wa Musanze.

Minisitiri w’Intebe Dr Ngirente ati: “Ubundi hari igihe amazi yajyaga ava mu Birunga akaza agakubita n’Umujyi wa Musanze ndetse akarenga ariko bigenda bikumirwa kubera izo ziri gushyirwa muri uwo mushinga. Ubu rero harimo gutegurwa umushinga mugari uzageza kuri miliyari zigera kuri 400 z’amafaranga y’u Rwanda mu rwego rwo gukomeza gukumira imyuzure iterwa n’amazi aturuka muri Pariki y’Ibirunga.”

Yakomeje agaragaza ko izo miliyari zigera kuri 400 zizakora mu Turere twa Burera, Musanze, Nyabihu, Rubavu, ariko uzagenda ugere no muri Rutsiro, Gakenke na Muhanga.

Dr. Ngirente yavuze ko hamaze kuboneka miliyari zigera kuri 50 z’amafaranga y’u Rwanda azifashishwa mu gukora inyigo kugira ngo uwo mushinga wihutishwe.

Mu rwego rwo gukumira imyuzure mu gace k’Ibirunga, hubatswe ibyuzi byo gufata no kugabanya ubukana bw’amazi, ruhurura zitwara amazi, ibiraro ku mihanda yambuka izo ruhurura, n’ibindi bikorwa bitandukanye kubera uburemere bw’iki kibazo aho hari n’igihe amazi yicaga abantu nta n’imvura yaguye mu giturage.  

Umushinga wo kubungabunga umugezi wa Sebeya

Umugezi wa Sebeya umaze imyaka myinshi uteza ibiza bitwara n’ubuzima bw’abayituriye, aho by’umwihariko wagize uruhare mu guhitana abantu benshi mu biza byibasiye Akarere ka Rubavu mu ntangiriro za Gicurasi.

“[…] Muzi ko umugezi wa Sebeya uri mu byaduteje ibiza cyane cyane abantu bari batuye iruhande rwa Sebeya ni bo bahuye n’ibiza by’ejobundi ndetse bamwe babiburiramo ubuzima bwabo.”

Umugezi wa Sebeya asenye ibikorwa remezo mu Karere ka Rubavu

No mu bindi biza byo mu mwaka wa 2018, uyu mugezi waruzuye usenya ibikorwa remezo n’inzu z’abaturage kimwe n’amashuri yabaga hafi ya Sebeya.

Dr. Ngirente yakomeje agira ati: “Ni ahantu noneho turimo gushyiramo imbaraga nyinshi kubera yuko buri mwaka byisubiramo, tukaba turiga rero ngo tubarinde burundu ndetse n’ahatagomba guturwa mu nnkengero za Sebeya twatangiye kwimura abantu kugira ngo bahave ariko ahaturwa na ho tubarinde.”

Umushinga wa Green Gicumbi, wahinduye byinshi muri Gicumbi

Uyu mushinga w’imyaka itanu ushyirwa mu bikorwa na Minisiteri y’Ibidukikije ukaba ugamije guhangana n’imihindagurikire y’ibihe, aho ukora ibikorwa birimo gusazura no gutera amashyamba, guca amterasi, no gutuza abantu heza kandi neza mu Karere ka Gicumbi.

Ni umushinga ufite ingengo y’imari ingana na miliyoni hafi 31 z’amadolari y’Amerika, ni ukuvuga miliyari zirenga 32 z’amafaranga y’u Rwanda, mu gihe cy’imyaka itandatu.

Ukora ku Mirenge icyenda mu cyogogo cya Muvumba B kibarizwamo imidugudu 252, bikaba byitezwe ko uwo mushinga uzagera ku baturage 150 mu buryo butaziguye na 380 bazabona inyungu mu buryo buziguye.  Iyo Mirenge irimo uwa Rubaya, Cyumba, Kaniga, Mukarange, Rushaki, Shangasha, Manyagiro, Byumba, na Bwisige.

Dr. Ngirente yakomeje agaragaza ko hari n’indi mishanga myinshi igeze kure itegurwa nk’uwo kubungabunga ubutaka n’amasyamba mu Ntara y’Amajyepfo n’uwo kubungabunga ibice by’imisozi miremire y’Intara y’Uburengerazuba na yo irimo gutegurwa kandi igeze kure.

Yakomeje agia ati: “Imishinga rero ni byinshi cyane, ntabwo wenda nayivuga ngo nyirangize ariko nagira ngo mbabwire ko ukoze ‘mapping’ y’Igihugu cyacu neza, twagiye dukora ku buryo buri Karere dukurikije ahibasirwa cyane n’Ibiza hagira umushinga wo kurinda ibidukikije kugira ngo tugabanye ubukana ibiza bishobora kuza bigahitanaho abantu.”

Guverinoma y’u Rwanda ivuga ko iyo mishinga yose irimo gushyirwamo imbaraga nyinshi kugira ngo igihugu kitazongera guhomba ubuzima bw’abantu benshi. Gusa ngo hari n’uruhare rw’abaturage mu guharanira ko aho batuye n’amasambu yabo haba hujuje ibya ngombwa mu kurwanya imyuzure.

  • NTAWITONDA JEAN CLAUDE
  • Nyakanga 6, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE