Imfu z’abana bari munsi y’imyaka 5 zaragabanyutse mu Rwanda

  • NTAWITONDA JEAN CLAUDE
  • Kamena 20, 2023
  • Hashize amezi 11
Image

Ikigo cy’Igihugu cy’Ubuzima (RBC) cyatangaje ubushakashatsi bwakozwe ku burwayi bw’abana bukomatanyije bushobora guhitana ubuzima bw’abana bari munsi y’imyaka 5.

Sibomana Hassan, Umuyobozi w’agateganyo mu Ishami Rishinzwe ubuzima bw’umubyeyi n’umwana muri RBC, yavuze ko ubushakashatsi bwamurikiwe abayobozi b’ibitaro n’abafatanyabikorwa ba RBC.

Agaragaza ko hibanzwe ku buvuzi bukomatanije bw’indwara zifata abana cyane cyane ku bari munsi y’imyaka 5 (Integrated management of childhood Illness).

Buri myaka 5 hakorwa ubushakashatsi ku mibereho n’ubuzima by’abaturage (RDHS).  

Kuva mu mwaka wa 2015 kugeza mu 2020 imfu z’abana bari munsi y’imyaka 5 zaragabanyutse.

U Rwanda rwavuye ku bana 50 bapfaga ku bana 1000 bavutse ari bazima, mu mwaka wa 2020 baba 45.

RBC itangaza ko uwo mubare utagabanyutse ku kigero cyifuzwaga, bituma habaho kwisuzuma kugira ngo harebwe ikitarimo gukorwa neza ngo gikosorwe.

Sibomana yagize ati: “Ubushakashatsi bwatweretse ko hari ibikorwa neza ariko hari ahakiri intege nkeya kugira ngo twongeremo imbaraga turusheho no kugabanya imfu z’abana”.

Nubwo ngo hagabanyijwe imfu z’abana kugeza kuri 45 ku bana 1000 baba bavutse ari bazima ariko ibijyanye no kugabanya imfu z’abana, u Rwanda rwateye imbere.

Yagize ati; “Ibijyanye no kugabanya imfu z’abana mu Rwanda twateye imbere cyane iyo ugereranyije guhera mu mwaka wa 2020. 

Imfu zaragabanyutse cyane kuva mu mwaka 2000 kugera 2020, mu myaka 20 gusa twagerageje kugabanya ku kigereranyo kirenga 80%, kubera ko twavuye ku mfu zigera ku 196 ku bana 1000 bavutse ari bazima mu mwaka wa 2000, tugera kuri 45 ku bana 1000 bavuka ari bazima”.

Hifuzwa ko imfu z’abana bakivuka batararenza ukwezi kumwe zagabanyuka kurenzaho.

Ati: “Twagabanyijeho 1, mu 2015 bari abana 20 ku bana 1000 tugera kuri 19.

Hari imfu z’abana b’umwaka umwe twari twihaye ko zagabanyuka, nyuma tukaza kureba imfu z’abana bose bari munsi y’imyaka 5.

Icyo twari turimo dukora ni ukwisuzuma no kureba aho twagize imbaraga nke aho ari ho kugira ngo twongeremo imbara bityo tugabanye imfu z’abana”.

Kugira ngo izi mfu zigabanyuke, RBC itangaza ko hakwiye gukurikiranwa hakarebwa niba inkingo zose umwana uri munsi yimyaka 5 yarazibonye.

Icyagaragaye mu bushakashatsi ni uko hari aho abana bashobora kuba bakirwa bakavurwa ariko mu by’ukuri ngo inkingo ntizitabweho.

Ati: “Ibi bititaweho ku buryo udasubiye inyuma ngo umenye ese inkingo zose yarazibonye, iyo dusanze nta rukingo yabonye ni amahirwe kugira ngo tube twamukingira”.

Ababyeyi bashishikarizwa kwipimisha inda mu gihe batwite kugira ngo bigabanye imfu z’abana kuko iyo bititaweho bigira ingaruka ku buzima bw’umwana.

Ubushakashatsi bwakozwe mu mwaka wa 2021 ariko buza bukurikirana n’ubwari bwakozwe mu 2015, mu rwego rwo kureba intambwe igenda iterwa.

Ni no mu rwego rwo kurushaho gushyiramo imbaraga kubera ko hifuzwa ko imfu z’abana zarushaho kugabanyuka kugera kuri zero.

Ubushakashatsi bwakorewe mu mavuriro hafi ya yose mu gihugu, ibyabuvuyemo bikaba byerekana uko amavuriro ahagaze mu bijyanye no kwita ku buzima bw’umwana bukomatanyije.

  • NTAWITONDA JEAN CLAUDE
  • Kamena 20, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE