Imana izarinda u Rwanda kandi iruhe umugisha-Jeannette Kagame

  • NTAWITONDA JEAN CLAUDE
  • Kanama 22, 2022
  • Hashize imyaka 2
Image

Madamu Jeannette Kagame yibukije ko Imana izaha umugisha u Rwanda mu gihe abayobozi bazaba bashyize imbere gukorera abaturage yaremye ikabaha inshingano zo kubayobora mu nzira ijyanye n’umurongo uganisha ku kunga ubumwe no kongera gushimangira Ubunyarwanda nk’irangashingiro ryabo.

Yabigarutseho ku Cyumweru taliki ya 21 Kanama 2022, ubwo yifatanyaga n’abayobozi barenga 300 biganjemo urubyiruko mu masengesho yo gusabira igihugu azwi nka “Young Leaders Prayer Breakfast”.

Ni igikorwa cyabanjirijwe n’indirimbo ziramya Imana, kuyishima no kongera kuyiragiza u Rwanda n’Abanyarwanda yaremye.

Madamu Jeannette Kagame yasabye abayobozi bakiri bato kudatandukanya gukunda Imana n’indangagaciro yo gukunda Igihugu, agira ati: “Imana izarinda u Rwanda kandi iruhe umugisha, kubera ko mwe Abayobozi muzaba mwakoreye Abanyarwanda yaremye, igikwiye. “Uwifuza kuba mukuru muri mwe abe umugaragu wanyu”.

Nanone kandi mu ijambo rye yakomoje ku buryo Imana yahaye abantu ububasha bwo guhitamo, mu bubasha yamuhaye bwo kugenga Isi bujyana no gukunda Igihugu. Ati: “Nyamara ukwemera no gukunda Igihugu birajyana. Kuko Imana yahaye Muntu kugenga Isi. Abemera Imana rero bamwe bavuga ko bitabangikana kuko itegeko ry’Imana ridusaba kuba ari yo dukunda gusa kandi iby’Imana tubiha Imana tukabitandukanya n’ibya Kayizari.

Abandi na bo bati nyamara ukwemera no gukunda igihugu birajyana kuko Imana yahaye umuntu kugenga isi inamuha indangagaciro zo gukunda Imana, ari yo yizera ko uwo muntu azayoborana Isi ariko kandi ntiyobewe ko yanaduhaye amahitamo, bamwe bahitamo neza n’abandi bagahitamo nabi, bikagora kuyobora abo bantu ubwo murumva ko itayobewe ko tugira n’intege nke. Ubwo Imana ibatezemo mwebwe bayobozi bato bagira imyemerere nk’iyanyu ko muzadufasha gusakaza iyi ndangagaciro.”

Madamu Jeannette Kagame kandi yongeye kugaruka ku birirwa ku mbuga nkoranyambaga basebya u Rwanda, baruvuga uko rutari, maze asaba abaruzi, banarufiteho amakuru nyayo guhaguruka.

Ati: “Uko mubyitwaramo, mufasha mute abandi bemera Imana kumva, kubyumva no guhangana nabyo? Mufasha mute urundi rubyiruko, kumva neza urugamba turiho, no guharanira agaciro kacu?

Yanagarutse ku bijyanye n’uko umwana akwiye kurerwa, ababyeyi bakamurera banamuha urugero rwiza, asobanura ko umwana uvukiye mu muryango uhorana amakimbirane akurana ibikomere bimugiraho ingaruka zirimo amahane akabije, kumva adakunzwe na we ntakunde abandi, guhohotera no guhohoterwa ndetse n’ibindi, asanga abantu bakwiye guhagurukira bagahangana na byo.

Ku bijyanye n’abashakanye, Madamu Jeannette Kagame yasabye ko umugabo n’umugore bakumva neza igisobanuro cy’uburinganire, bakarangwa no kubahana mu nyungu rusange z’igihugu.

Yagize ati “Ni gute twafasha abagabo kwibohora kumva ko kugira ngo bubahwe bagomba kubishakisha, kandi bakabikora badakandamije abo bashatse, umuntu aherutse kumbwira umugore wamuganyiraga avuga ko umugabo we yamukubise, hanyuma uwo mugore ajya kubaza uwo mugabo, ati se uramuhora iki? undi ati ‘arampamagara ndi mu kabari, inshuro eshatu ndi kumwe na bagenzi banjye ako gasuzuguro sinshobora kukihanganira’ mwumve namwe ibyo bita kubaha. Ni gute rero namwe bagore twafasha kwisobanukirwa mukamenya kubaha ariko mukanasobanukirwa ko uburenganzira mufite bwo kubahwa no kuvuga ikibababaje aho kugumana agahinda kanyu mwenyine.”

Nyuma y’izi mpanuro, bamwe mu bitabiriye aya masengesho bavuga ko hari impamba ifatika batahanye kandi ko biyemeje kuba umusemburo w’impinduka nziza mu muryango nyarwanda.

  • NTAWITONDA JEAN CLAUDE
  • Kanama 22, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE