Ikorwa ry’imihanda rizakemura ikibazo cy’umubyigano w’imodoka- MINALOC

  • Sedar Sagamba
  • Nyakanga 5, 2023
  • Hashize amezi 11
Image

Umuhanda Kigali- Muhanga ugendwamo n’imodoka nyinshi bigateza umubyigano w’imodoka, akenshi bikabangamira ingendo n’ubuhahirane, ariko hari icyizere cy’uko icyo kibazo gikemuka bitewe n’uko harimo gukorwa indi mihanda hirya no hino mu gihugu, imwe yatangiye gusanwa, indi izagurwa.

Ibi bigarukwaho n’abagenzi batandukanye bakoresha umuhanda Kigali- Muhanga, basigaye bakora urugendo rimwe na rimwe rukamara isaha n’iminota mirongo ine cyangwa amasaha abiri ndetse n’abikorera bawukoresha akenshi bajya i Kigali kurangura ibicuruzwa.

Minisitiri w’Ubutegetsi bw’Igihugu MINALOC, Musabyimana Jean Claude yatangaje ko ikorwa ry’imihanda itandukanye hirya no hino mu gihugu, by’umwihariko izerekeza mu Ntara y’Amajyepfo, umuhanda Kigali -Muhanga uzafasha gukemura ibibazo by’umubyigano w’imodoka bikemure ikibazo cy’ubuhahirane.

Yagize ati: “Hari gahunda yo gusana, kwagura umuhanda uza Muhanga ariko hari umushinga wo kwagura umuhanda kugera Bishenyi kuko umubyigano w’imodoka utangira hagati ya  Kigali kugera Bishenyi, kuko iyo zihageze izijya Runda zivamo zikagenda, […] 

Hari imishinga yindi izunganira iyi mihanda, hari umuhanda ujya Karongi numara kuzura umuntu wanyuraga ahandi bizamworohera, ariko n‘umuhanda unyura Nyanza uturutse Bugesera bizatuma uwanyuraga i Kigali  akaza kuzuza imihanda ahangaha atazahanyura, n’imodoka nini bashobora gukomeza zinyura Nyanza bakomeze Rusizi  akenshi abajya Huye ntibazakenera kunyura ahangaha”.

Minisitire w’Ubutegetsi bw’Igihugu Musabyimana Jean Claude yagaragaje uburyo ikibazo cy’umubyigano w’imodoka kirimo gukemurwa

Minisitiri Musabyimana yakomeje asobanura aho iyubakwa ry’imihanda rigeze, hagamijwe gutuma imihanda igendeka neza.

Ati: “Kubaka iyo mihanda byaratangiye imirimo yaratangiye  muri iyo mihanda yose uretse uwa Kigali- Bishenyi, uzatangira vuba ariko twakomeza gukurikirana hamwe n’Ikigo cy’Igihugu  gishinzwe   guteza imbere taransiporo RTDA, ni umushinga uhari. 

Umuhanda wa Karongi urimo gukorwa guhera ku Rufungo ugeze kure ndetse n’umuhanda uza Nyanza uva Bugesera nawo urimo gukorwa, ni imihanda izatuma imodoka ziba nyinshi zigabanyuka ubwo n’ibindi bikazakurikiraho, bashonje bahishiwe”.

Ibi yabigarutseho mu nama yagiranye n’abayobozi b’Intara y’Amajyepfo hagamijwe kureba ngo ni ibiki bizashyirwamo imbaraga umwaka utaha w’ingengo y’imari cyane cyane mu bijyanye n’imikorere igamije kunoza ubusugire bw’abaturage.

Perezida w’Urugaga rw’Abikorera mu Karere ka Muhanga, Kimonyo Juvenal yavuze ko ubuhahirane bukomwa mu nkokora bitewe n’umubyigano w’imodoka.

Yagize ati: “Uko imyaka igenda iza ibinyabiziga biriyongera murabizi, umuhanda Kigali-Muhanga hanyura amakamyo menshi, imodoka nyinshi ugasanga ya makamyo agenda buhoro, azitira imodoka zisanzwe kugira ngo zibe zakoresha umuvuduko wa ngombwa. 

Ibyo bintu usanga bidindiza abikorera rimwe na rimwe hari igihe uba uvuga uti ndajya i Kigali ndangure ngaruke nshuruze nibinashira mbenanasubirayo, ugasanga rero hari imbogamizi y’umubyigano w’imodoka. Ugasanga ya masaha abiri wagombaga gukoresha ugaruka ukayakoresha mu kugenda gusa”.

Yashimye ko Leta hari igisubizo gihari, hariho umurongo w’uburyo ikibazo cy’umubyigano w’imodoka kizakemuka.

  • Sedar Sagamba
  • Nyakanga 5, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE