Ikipe y’u Rwanda yegukanye igikombe cy’Isi cy’amarerero ya  PSG  

  • Imvaho Nshya
  • Gicurasi 24, 2022
  • Hashize imyaka 2
Image

Ikipe y’irerero rya PSG mu Rwanda « PSG Academy Rwanda » mu cyiciro cy’abatarengeje imyaka 13 yegukanye igikombe  cy’irushanwa rihuza amarerero y’iyi kipe ku rwego rw’Isi « PSG Academy World Cup 2022 ». Iyi mikino yabere i Paris mu Bufaransa  kuva taliki 20 kugeza 23 Gicurasi 2022.

Iyi kipe yitwaye neza itsinda ku mukino wa nyuma Brazil  igitego 1-0. Mu batarengeje imyaka 11, ikipe y’u Rwanda yatsinzwe na USA mu guhatanira umwanya wa 3.

Inzira ikipe y’u Rwanda yaciyemo

Mu cyiciro cy’abatarengeje imyaka 13, ikipe y’u Rwanda yari mu itsinda A hamwe na Qatar, USA, Koreya n’u Bufaransa. Ikipe y’abatarengeje imyaka 11 yari mu itsinda C hamwe na Misiri, Koreya na Qatar.

Ikipe y’abatarengeje imyaka 13 yatsinze Qatar ibitego 6-0, itsinda Koreya 4-0, itsinda USA ibitego 5-1 inatsinda  u Bufaransa ibitego 3-0. Muri ½ ikipe y’u Rwanda U-13 yatsinze Misiri ibitego 3-1 ihita igera ku mukino wa nyuma aho yatsinze Brazil igitego 1-0.

Ikipe yitwaye neza kuko mu mikino 6 yinjije ibitego 21, yinjizwa ibitego 3.

Mu cyiciro cy’abatarengeje imyaka 11, ikipe y’u Rwanda yatsinzwe na Qatar ibitego 4-2, itsindwa na USA ibitego 4-3 inganya na Misiri igitego 1-1 nyuma itsindwa na Koreya igitego 1-0. Muri ½ ,  ikipe y’u Rwanda yatsinzwe na Brazil ibitego 3-2.

Iri rushanwa ryitabiriwe n’amakipe 38 mu batarengeje imyaka 11 na 13 yaturutse mu bihugu 11 birimo u Rwanda, Misiri (Afurika), u Bufaransa, u Budage, USA, Brazil, Antilles, u Busuwisi, Turukiya, Qatar na Koreya.

Umutoza Nyinawumuntu Grace  usanzwe atoza muri iri rerero rya PSG  atangaza ko rushanwa nk’iri ari ingenzi  kuko abana bigiyemo byinshi kuko bwari ubwa mbere bitabiriye irushanwa mpuzamahanga. Akomeza avuga ko  ryatumye batinyuka ndetse banigirira icyizere.

Urutonde rw’abana bitabiriye iri rushanwa

Abatarengeje imyaka 11 : Shema Samuel, Ishimwe Benjamin, Ambahafi Shami Alia, Kanamugire Manzi Crispin, Gwaneza Abdoul Fatah, Sabato David Freeman, Uwiringiyimana Christian Bonheur, Tuyishime Prince, Kanamugire Kenzo Paris Godwin, Byoseniyo Samson na Ntakirutimana Derrick.

Abatarengeje imyaka 13 : Ujeneza Patrick, Masabo Byemayire Kent Collin, Nkurunziza Egide, Mugabo Arankunda Charmant, Umuhoza Nyssin, Munyaneza Zourara, Ganza Tabu Arlic, Byiringiro Bugingo Chance Salomon, Ishimwe Aime Thierry, Nshimiyimana Olivier na Shema Alan.

Abagiye baherekeje ikipe ni Rubanzi David, Murekatete Hamida, Nyirawemuntu Marie Grace na Ndanguza Theonas uyobora iri rerero « PSG Academy Rwanda ».

Irerero  ry’umupira w’amaguru ry’ikipe ya PSG ryafunguwe mu Rwanda ku mugaragaro  mu Gushyingo 2021 mu Karere ka Huye. Uyu mushinga w’irerero ry’umupira w’amaguru ni umwe mu mishinga  iri mu masezerano y’ubufatanye, u Rwanda rwagiranye n’ikipe ya PSG binyuze muri gahunda ya “Visit Rwanda “ mu Kuboza 2019.

  • Imvaho Nshya
  • Gicurasi 24, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE