Ikibazo cyazonze Habyarimana Inkotanyi zitagize ku rugamba

  • NTAWITONDA JEAN CLAUDE
  • Ugushyingo 9, 2022
  • Hashize umwaka 1
Image

Yaba ingabo za Leta cyangwa inyeshyamba, igisirikare cyose gikomezwa n’ubwitange bw’abakigize, ibikoresho n’ubushobozi bikaza nk’inyunganizi; uko kwiyemeza cyangwa ubwitange ni ibyiyumvo, indangagaciro n’ibikorwa bibaranga bibasaba gutanga ubuzima bwabo.

Umuyobozi w’Urwego rw’Igihugu Ngishwanama rw’Inararibonye Tito Rutaremara, yagaragaje uburyo abanyamuryango ba RPF Inkotanyi bitangiye urugamba rwo kubohora u Rwanda ndetse bakaba umuti urambye w’ikibazo Leta yari iyobowe na Habyarimana Juvenal yahuraga na cyo mu kubona abafite ubushake bwo kwinjira mu ngabo biyumvamo kwitangira Igihugu.

Tito Rutaremara yavuze ko ababyeyi ubwabo ari bo barekaga abana babo bakajya ku rugamba, ndetse kenshi bakabashishikariza kujya ku rugamba cyangwa kwitangira urugamba bakaba Abakada (caders) bahoraho.

Ati: “Intambara igitangira iyo habaga abana bakomerekaga, baragarukaga ababyeyi bakabondora bakabashishikariza gusubira ku rugamba. Ibibazo Habyarimana yagiraga byo gushaka abasirikare, RPF yo ntiyigeze ibigira kubera ubwo bukangurambaga.”

Yavuze ko urubyiruko rwajyaga ku rugamba rwaherekezwaga n’Abakada, rukarara mu banyamuryango. Iyo bazaga ari benshi bakwirakwizwaga mu ngo z’abanyamuryango, aho baturukaga hose mu bihugu bitandukanye byaba iby’u Burayi, Amerika, abavuye muri Zaire, Tanzania, u Burundi, u Rwanda n’ahandi bakirwaga n’Abanyamuryango.

Abavaga mu Rwanda bazanwaga n’Abakada ba RPF Inkotanyi  bakabageza i Burundi, muri Tanzania cyangwa Zaire.

Mu butumwa yanyujije ku rubuga rwa Twitter, Tito yakomeje agira ati: “Abanyamuryango b’ibyo bihugu barabakiraga, bakabaraza, bakabashakira ibyangombwa byose by’inzira abavuye mu Burundi, Abakada bakabaherekeza bakabashyikiriza bagenzi babo ba Tanzania, na bo bakabaherekeza bakashyikiriza Abakada ba Uganda bakabageza ku rugamba.”

Abanyarwanda bambukiye i Bukavu, Abakada babagayo babagezaga i Goma, Abakada bo kuri Goma bakabageza muri Uganda, Abanyarwanda babaga muri Uganda bakabageza muri O1 (Zone ya RPF Inkotanyi).

Abanyamuryango ba RPF aho babaga bari hose babaga bitaye ku mutekano cyane, ni ukuvuga umutekano w’Abanyamuryango wabaga uri mu nshingano zabo kandi bumva ko  aho Umunyamuryango wa RPF ari hose agomba kurindwa no gufashwa.

Tito Rutaremara, Umuyobozi w’Urwego rw’Igihugu Ngishwanama rw’Inararibonye

Abarwayi bo ku rugamba n’uko bitabwagaho

Yavuze ko abasirikare bafite indwara zidakomeye  bavurizwaga mu matsinda (units) yabo, abandi bose bakajya mu  byumba by’abarwayi (sickbays), ahari abaganga, abaforomo (nurses), abarwaza, n’abagorora ingingo.

Ati: “Ababaga barwaye cyane bakeneye ibikoresho  tutari dufite, abanyamuryango bo hirya no hino barabakiraga bakabavuza. Dutangira iyi ntambara, iyi mikorere (system) yari itarubakwa kandi intambara itangira, abayobozi bacu bamaze gupfa, Kagame ataraza, twagize ingorane nyinshi cyane tugira inkomere nyinshi cyane.”

Yongeyeho ko abanyamuryango ari bo babakiraga bakabahisha, bakabavuza, bakabondora, bakira bakabohereza bagasubira ku rugamba.

Ati: “Hari n’igihe byageze dukora za sickbay za rwihishwa muri za zone z’abanyamuryango kugira ngo hashakwe abaganga baza kubavurira hamwe.Urugero ni nka sickbay ya Nyakivara, yagiyeho igihe twari tumerewe nabi cyane. Abanyamuryango ni bo babavuzaga, bakabarinda, bakabagaburira, bakabashakira abaganga n’abaforomo baza kubavura; umutekano w’iyo sickbay wari urinzwe n’abanyamurango.”

Yavuze n’uburyo mu nzego nkuru za Uganda bigeze kohereza ba maneko, Abanyamuryango babimenye bazana abagore n’abakecuru, bazana amasaka n’ibigori barahura baragosora  barimo biririmbira.

Ba maneko babajije ibyo barimo gukora barabasubiza bati: “Iyo ari igihe cyo gusarura dusarurira hamwe, tugahunikira hamwe, ubu ni byo turimo. Abandi bagira urujijo baragenda.”

Yakomeje ashimangira uburyo buri nkengero zose z’u Rwanda ku mipaka ya Uganda, Tanzania na Zaire mu ngo z’Abanyamuryango wahasangaga inkomere nyinshi, zivuzwa zirinzwe n’Abanyamuryango, zakomererwa cyane bakazohereza rwihishwa mu Mijyi aho zishobora kuvurwa neza.

“[…] Muzumva aho hose, aho abanyamuryango bari hose, ababyeyi bitwaga ba Mama Cyama; aba ni abagore cyangwa abakecuru bitangiraga abana bava cyangwa bajya ku rugamba, Abakada n’inkomere zirimo.”

Ubuhamya bwa Tito Rutaremara bushimangira ko urugamba rwo kubohora u Rwanda rutari umweru n’umukara gusa, ahubwo rwaranzwe n’ingorane ariko rugera ku nsinzi kubera abana b’u Rwanda banze gucika intege batarabona Igihugu cyunze ubumwe bari bafite mu nzozi zabo.

  • NTAWITONDA JEAN CLAUDE
  • Ugushyingo 9, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE