Igitangaza!  Amarushanwa ya Formula 1 (F1) ashobora kuza mu Rwanda

  • NTAWITONDA JEAN CLAUDE
  • Ukwakira 3, 2022
  • Hashize imyaka 2
Image

Bamwe batangiye kubyumva nk’impuha mu bihe byashize mbere y’uko Perezida wa Repubulika y’u Rwanda Paul Kagame ahura n’Umuyobozi w’Ikigo Formula One Group Stefano Domenicali. 

Kuri bamwe ibyo babonaga nk’inzozi, kuba amarushanwa mpuzamahanga y’imodoka yamamaye kurusha ayandi ku Isi akorerwa mu rw’Imisozi 1000, batangiye kubona ko bishobora kuba impamo nyuma y’ibiganiro by’abo bayobozi bombi. 

Icyizere bagishingira cyane ku kuba abashoramari hafi ya bose Perezida Kagame ahura na bo birangira baje gushora imari yabo mu Rwanda, bitewe n’uko batabasha kwihanganira guhomba amahirwe y’ishoramari ari mu Rwanda  abagaragariza. 

Perezida Kagame yahuye na Stefano Domenicali ku Cyumweru taliki ya 02 Ukwakira 2022, bakaba barahuriye ahitwa Marina Bay Street Circuit muri Singapore. 

F1 ni amarushanwa y’imodoka afite inkomoko mu myaka ya 1920 na 1930 nubwo Formula One igezweho yatangiye mu mwaka wa 1946 itangijwe na Federasiyo Mpuzamahanga y’Amarushanwa y’Imodoka (FIA). 

Nubwo gutegura no gukora aya marushanwa ubwabyo bisaba gushoramo akayabo n’Ikigo Formula One Group n’abafatanyabikorwa, aya marushanwa aramutse atangiye gukorerwa mu Rwanda yagira uruhare rukomeye mu kumenyekanisha Igihugu no kwinjiza amadovize atubutse y’ava mu bihumbi by’abafana baturuka impande zose.

Amarushanwa y’uyu mwaka yabereye muri Singapore nk’igihugu kuyakira, yabaye mu gihe Perezida Kagame yari akiri mu ruzinduko yakoreye muri icyo Gihugu, akaba yegukanywe n’Icyamamare mu gutwara imodoka Sergio Perez. 

Perezida Kagame yasoje uruzinduko rw’iminsi itatu yatangiye ku wa Gatanu taliki ya 30 Ukuboza, rukaba  rwari rugambiriye kurushaho gushimangira umubano w’ibihugu byombi bimaze gutera intambwe ishimishije mu butwererane. 

Perezida Kagame kandi ku munsi w’ejo hashize yitabiriye ibirori byo gusangira iby’umugoroba byateguwe na Minisitiri w’Intebe wa Singapore Lee Hsien Loong mbere yo kujya kureba amasiganwa y’imodoka. 

Muri ayo marushanwa Sergio Perez yatsinze Charles Leclerc, akaba ari na yo nshuro ya mbere yegukanye iryo rushanwa. Abakurikiranye ayo masiganwa bagaragaje ko Perez yatwaye neza kandi yagaragaje ubuhanga budasanzwe muri uwo mukino. 

Undi mukinyi wakurikiyeho mu kugaragaza ubuhanga bwe ni Carlos Sainz na Max Verstappen waje ku mwanya 7. 

  • NTAWITONDA JEAN CLAUDE
  • Ukwakira 3, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE