Igikombe cy’Isi: Côte d’Ivoire yatangiranye intsinzi, Tunisia iranyagirwa

Igitego cyinjijwe na Amad Diallo cyafashije Ikipe y’Igihugu ya Côte d’Ivoire kubona intsinzi ya mbere mu Gikombe cy’Isi cya 2026, nyuma yo gutsinda Equateur igitego 1-0.

Ni mu mukino wabaye kuri uyu wa Mbere, tariki ya 15 Kamena 2026, ubera ku kibuga cya Lincoln Financial Field kiri mu Mujyi wa Philadelphia, muri Leta Zunze Ubumwe za Amerika (USA). Muri uyu mukino Igice cya mbere cyarangiye amakipe yombi anganyije ubusa ku busa. 

Mu igice cya kabiri Côte d’Ivoire yagarukanye imbaraga nyinshi itangira gusatira ishaka igitego harimo uburyo bw’igitego bwabonywe na Elye Wahi ku munota wa 52 n’ubwa Yan Diomande ku wa 58 ntibwatanga umusaruro.

Umutoza wa Côte d’Ivoire, Emerse Faé, yakoze impinduka ashyira mu kibuga amaraso mashya, aho yakuyemo Elye Wahi, Bazoumana Touré, Nicolas Pépé, Seko Fofana na Guela Doué, ashyiramo Ange-Yoan Bonny, Amad Diallo, Christ Inao Oulai, Ibrahim Sangaré na Odilon Kossounou.

Ku munota wa 90 w’umukino, ni bwo Wilfried Singo yohereje umupira mu rubuga rw’amahina, usanga Amad Diallo ahagaze neze, ahita ashyiramo igitego kimwe rukumbi cyabonetse muri uyu mukino. Yan Diomande ukinira Côte d’Ivoire yabaye umukinnyi w’iyi kipe ukoze amateka yo kuyikinira mu Gikombe cy’Isi ari muto, kuko ari we ubikoze afite imyaka 19 gusa.

Mu y’indi mikino Ikipe y’Igihugu ya Suède yanyagiye Tunisia ibitego 5-1 mu Itsinda F ry’Igikombe cy’Isi cya 2026. Ni ibitego byatsinzwe na Yasin Ayari watsinze bibiri, Alexander Isak, Viktor Gyökeres na Mattias Svanberg.

Igitego rukumbi cya Tunisia cyabonetse muri uyu mukino cyinjijwe na Omar Rekik mbere y’uko igice cya mbere kirangira ari ibitego 2-1.

Undi mukino wabaye muri iri tsinda u Buholandi n’u Buyapani byanganyije ibitego 2-2 mu mukino wa mbere.