Igikombe cy’Isi: Argentine yabonye itike ya 1/4 bigoranye imbere ya Misiri 

Ikipe y’Igihugu ya Argentine yageze muri 1/4 cy’Igikombe cy’Isi cya 2026, nyuma gutsinda iya Misiri iturutse inyuma ibitego 3-2 mu mukino wabereye kuri Mercedes-Benz Stadium, kuri uyu wa 7 Nyakanga 2026.

Ni umukino watangiye wegeranye cyane, amakipe yombi akinira mu kibuga hagati, bituma n’uburyo bwo kurema igitego buba buke. 

Ku munota wa 15, Misiri yafunguye amazamu ku gitego cyatsinzwe na myugariro Yasser Ibrahim n’umutwe, ku mupira Marwan Attia yahinduye imbere y’izamu. 

Nyuma yo gutsindwa igitego, Argentine yongereye imbaraga bidatinze ku munota wa 19 ibona Penaliti ku ikosa Nicolas Tagliafico yakorewe mu rubuga rw’amahina.

Iyi Penaliti yatewe na Lionel Messi ku mahirwe make ye, umupira ukurwamo neza n’umunyezamu Mostafa Shobeir. 

Ku munota wa 28, umunyezamu Mostafa Shobeir yatabaye Misiri akuramo umupira ukomeye watewe na Alexis Mac Allister n’umutwe. 

Ku munota wa 38, Mostafa Shobeir yongeye gutabara Misiri akuramo umupira wari utewe na rutahizamu Julian Alvarez, awushyira muri koruneri itagize icyo itanga. 

Igice cya mbere cyarangiye Misiri itsinze Argentine igitego 1-0.

Mu igice cya kabiri, Misiri yatangiranye impinduka Emam Ashour asimburwa na Hamdy Fathy.

Muri iki gice, Argentine yakomeje gusatira cyane ishaka igitego cyo kwishyura ariko ubwugarizi n’umunyezamu ba Misiri bakomeza kwihagararaho. 

Ku munota wa 58, Misiri yibwiraga ko yabonye igitego cya kabiri cyinjijwe na  Mostafa Ziko ku kazi gakomeye kakozwe na Haissem Hassan, ariko umusifuzi yifashishije VAR asanga myugariro wa Argentine Lisandro Martinez yakorewe ikosa mbere y’uko batanga umupira wavuyemo icyo gitego. 

Iyi kipe ntiyacitse intege kuko ku munota wa 67 Mostafa Ziko yatsinze igitego cya kabiri ku mupira wazamukanywe na Haissem Hassan, acenga ba myugariro, awumuhaye ahita awushyira mu izamu. 

Ku munota wa 79, myugariro Cristian Romero yatsindiye Argentine igitego cya mbere cyo kwishyura n’umutwe, ku mupira Lionel Messi yahinduye imbere y’izamu.

Nyuma y’iminota itanu gusa, Lionel Messi yatsinze igitego cya kabiri cyo kwishyura ku ishoti rikomeye yatereye mu rubuga rw’amahina, umupira ukubita igiti cy’izamu uhita winjira mu rushundura.

Byasabye gutegereza ku munota wa 90+2 kugira ngo Argentine ibone igitego cya gatatu cyo kuyobora umukino cyinjijwe na Enzo Fernandez n’umutwe ku mupira Lautaro Martinez yahinduye mu rubuga rw’amahina, awushyira mu izamu.

Umukino warangiye Argentine itsinze Misiri ibitego 3-2, ibona itike yo gukina muri 1/4 cy’Igikombe cy’Isi cya 2026 nta nkuru.

Igitego Lionel Messi yatsinze cyatumye yongera kuyobora abamaze gutsinda ibitego byinshi (8) aho arusha Kylian Mbappé na Erling Haaland banganya ibitego birindwi.

Lionel Messi kandi yabaye umukinnyi wa mbere mu mateka y’Igikombe cy’Isi watsinze igitego mu mikino icyenda yikurikiranya y’iri rushanwa.