Karongi: Umurimo w’uburobyi uravugwaho umwihariko kuba wakwirakwiza VIH/SIDA

  • NTAWITONDA JEAN CLAUDE
  • Ukwakira 18, 2022
  • Hashize umwaka 1
Image

Imiterere y’umwuga w’uburobyi ituma ushobora kuba intandaro yo gukwirakwiza virusi itera Sida (VIH /SIDA) bitewe nuko ari umwuga ukorwa nijoro, kandi abawukora bakaba baba baturutse ahantu hatandukanye, no mu gihe cyo kuruhuka, abarobyi bakaruhukira ku bakiliya babo, akenshi batishyura ayo macumbi.

Umuyobozi wa PSF mu Karere ka Karongi, Ahimana Mathias yavuze ko hari umwihariko w’abarobyi bafite ishyirahamwe rirnini, bakunda kugaragara nijoro, bafite amato baroba, kandi baba baturutse hirya no hino, Urugaga rukaba rubakangurira kwirinda VIH/Sida binyuze mu bukangurambaga.

Byashimangiwe n’Umuyobozi wa gahunda y’ubuzima mu rugaga rw’abikorera, Leon Pierre Nsanganwa wavuze ko umwuga w’uburobyi ukorwa mu buryo bwihariye, aho ukorwa nijoro abagabo baroba, kumanywa bakaruhukira mu nzu z’abakiliya babo akenshi baba ari abagore.

Yagize ati: “Abarobyi bafite umwihariko. Umwihariko uri mu barobyi bitewe n’umurimo bakora, baryama kumanywa […] Mu bushakashatsi twakoze twasanze ku manywa baryama mu mazu y’abakiliya babo. Abarobyi ni abagabo ariko abagurisha umusaruro ni abagore. Uwo mwihariko mu bushakashatsi twagiye dukora twasanze abagabo bashobora gukora ingurane y’isambaza cyangwa se izindi fi n’igitsina”.

Yongeyeho ati: “Baryama ku manywa, bakaryama mu nzu zitari izabo rimwe na rimwe batanakodesheje, bivuze ko ibyago biri hejuru igihe abo bantu baba badafite amakuru ku buryo bwo kwirinda VIH/SIDA bikaba bishobora no kugusha hasi umusaruro  w’ikiyaga”.

Urugaga rw’abikorera (PSF) kimwe n’izindi Nzego z’ubuzima ntizatereye iyo, kuko abarobyi kimwe n’abandi Banyarwanda bahabwa ubumenyi n’amakuru mu buryo butandukanye bakangurirwa kwirinda virusi itera Sida.

Nsanganwa yagize ati: “Serivisi tubaha harimo amahugurwa tukabigisha ku bijyanye n’imibonano, kubasanga tukabapimira aho bakorera dupima nka 500 tugasangamo 10, tubasaba kujya gufata imiti, kandi tukabasaba kujya kwipimisha, gusa tubinyuza mu buyobozi bwabo, aho bakorera […], abasanze barwaye bafata imiti nta kibazo”.

Edouard Nkejuwimye, utuye mu Mudugudu wa Ruganda, Akagari ka Gasura, Umurenge wa Bwishyura ukunze kuba arimo gutunganya imitego yo kurobesha mu Kiyaga cya Kivu, umaze mu burobyi imyaka isaga 15, yavuze ko abarobyi bakangurirwa kwirinda Virusi itera Sida kuko haba hari n’udukingirizo, ariko ko abantu bose batabyumva kimwe kuko cyane cyane urubyiruko uba ubona harimo rurangara.

Edouard Nkejuwimye ukunze kuba arimo gutunganya imitego yo kurobesha mu Kiyaga cya Kivu

Yagize ati: “Abarobyi duhugurwa ku kwirinda VIH/SIDA, badukangurira kwipimisha, baza no kudusuzumira hano, bakatuzanira n’ibikarito by’udukingirizo umuntu akatwitwaza. Bazana udukingirizo hano, tukadufata.

Gusa tuva mu mazi tukaguma hano abandi bakajya mu ngo, ubwo nyuma turagenda noneho ugasanga buri wese anyuze aha, undi hirya, urubyiruko rwo rwirirwa rushayaya, wagira uwo ubwira uti gafate ntakumve, umubwira ko niyitwara nabi impanuka ikamubaho atazavuga ngo ntiyabwiye”.

Visi Perezida w’impuzamakoperative ICOPEVEKA ikorera mu Murenge wa Bwishyura, mu Kagari ka Gasura, Umudugudu wa Nyarusange umaze imyaka irenga 25 aroba, Mwizerimana Vincent, yatangarije Imvaho Nshya ko bishoboka koko ko hari abarobyi bashobora kuryamana, ariko ko hari uburyo bwo kwirinda.

Ati: “Hari abarobyi barenga 400, bari muri Koperative 4. Abarobyi bajya kurara mu nzu z’abagore noneho bakabaha isambaza abandi bakabakira bakiryamanira. Birashoboka cyane ariko ntibibujije ko hari abajya mu giturage bagahonga isambaza cyangwa amafaranga bagurishije, ariko ntibagenda nta gakingirizo. Kandi akenshi ni ba bagore baza kugura isambaza baziranye na bo ubwabo usanga bafite agakingirizo.”

Nsanganira Jean Leon yavuze ko hifuzwa ko Abanyarwanda bose n’abatuye u Rwanda mu 2030 bazaba batakirangwaho indwara ya SIDA, umutu azaba agifite ubwandu bwa virusi itera SIDA ariko atarwaye.

Umuyobozi wa PSF mu Karere ka Karongi, Ahimana Mathias (wicaye iburyo) n’Umuyobozi wa gahunda y’ubuzima mu rugaga rw’abikorera, Leon Pierre Nsanganwa (wicaye ibumoso) baganira n’itangazamakuru
  • NTAWITONDA JEAN CLAUDE
  • Ukwakira 18, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE