Ibyo wamenya kuri Ambasaderi mushya w’u Bwongereza mu Rwanda

  • NTAWITONDA JEAN CLAUDE
  • Gashyantare 13, 2024
  • Hashize ibyumweru 3
Image

Ku munsi w’ejo ni bwo Guverinoma y’u Bwongereza yemeje ko Madamu Alison Heather Thorpe yagizwe Ambasaderi mushya w’Ubwami bw’u Bwongereza mu Rwanda, asimbuye Amb. Omar Daair OBE uhagarariye inyungu z’icyo gihugu guhera muri Mutarama 2021.

Biteganyijwe ko Amb. Alison Thorpe azagera mu Rwanda muri Nzeri 2024, mu gihe Amb. Omar Daair azoherezwa mu zindhi nshingano za dipolomasi

Uyu Mudamu afite ubunararibonye bw’imyaka 27 mu bya dipolomasi na Polisiki muri rusange, akaba afite n’impamyabumenyi y’icyiciro cya gatatu cya Kaminuza (Masters) mu masomo ya Dipolomasi yakuye muri Kaminuza ya Westminster mu Bwongereza.

Guhera mu mwaka wa 1997 kugeza mu 1998, ni bwo yatangiye gukorera Guverinoma y’u Bwongereza akaba yari ashinzwe kwakira abantu muri Ambasade y’u Bwongereza i Geneva mu Busuwisi.

Guhera mu 1998 kugeza mu 2001 yari Umunyamabanga wa Gatatu mu bya Politiki i Beirut muri Lebanon. Kuva muri Mutarama kugeza mu Ukuboza 2002, yabaye Umunyamabanga Bwite w’Umuyobozi ushinzwe Politiki muri Ambasade ya UK i Lebanon.

Mu Mwaka wa 2003 kugeza mu 2004 yabaye Umunyamabanga Bwite wungirije wa Minisitiri ushinzwe Uburasirazuba bwo Hagati muri Minisiteri y’Ububanyi n’Amahanga na Minisitiri w’Ubucuruzi.

Muri Mutarama kugeza muri Nzeri 2005, Thorpe yabaye Umuyobozi w’Ishami rya Minisiteri y’U ubanyi n’Amahanga rishinzwe gukumira ibikorwa by’iterabwoba na Al Qaeda, mu Burasirazuba bwo Hagati no muri Afurika.

Nyuma y’aho yatangiye ikiruhuko cy’umubyeyi hagati y’umwaka wa 2005 n’uwa 2006, ariko kugeza mu 2009 yari Ambasaderi wungirije i Skopje muri Macedonie.

Kuva mu mwaka wa 2010 kugeza mu 2014, Madamu Alison Thorpe yabaye Ambasaderi wungirije w’ u Bwongereza i Stockholm muri Sweden.

Yavuye muri Sweden aza ku mugabane w’Afurika muri Nzeri 2014, akomereza mu nshingano zo kuba Umuyobozi ushinzwe gahunda z’u Bwongereza no kwimakaza imikoranire kugeza mu 2018.

Mata 2018 yagizwe Umuyobozi wa Guverinoma igamije gukemura ibibazo bitandukanye muri Afurika, kugeza muri Nzeri 2019.

Muri Nzeri 2019 kugeza muri Kamena 2020, Thorpe yabaye Umuyobozi wungirije w’Ikigega Mpuzamahanga cya Guverinoma y’u Bwongereza gishinzwe gushyigikira ishoramari n’ubucuruzi (Prosperity Fund Global Trade and Business Environment Programme).

Muva muri Mata kugeza muri Kanama 2022, Alison Thorpe yabaye Umuyobozi ushinzwe impinduka mu biro bya Guverinoma y’u Bwongereza bishinzwe ububanyi n’amahanga, Umuryango wea Commonwealth n’iterambere, mu Biro bishinzwe Ububanyi n’Amahanga (FCDO).

Kuva muri Kanama 2022 kugeza uyu munsi, ni Intumwa yihariye y’u Bwongereza mu Karere k’Ibiyaga Bigari, akaba anashinzwe Ububanyi n’Amahanga n’Afurika y’Amajyepfo.

Mu gihe u Bwongereza n’u Rwanda bikomeje gutegura ishyirwa mu bikorwa ry’amasezerano arebana no kohereza abimukira i Kigali, Ambasaderi Thorpe yitezweho gukomereza aho Daair yari agejeje mu gutanga umusanzu we nk’uhagarariye Guverinoma y’u Bwongereza.

  • NTAWITONDA JEAN CLAUDE
  • Gashyantare 13, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE