Ibyo wamenya k’umuyobozi w’igihugu mubi n’ibiranga umwiza

  • KAYITARE JEAN PAUL
  • Gashyantare 22, 2024
  • Hashize amezi 2
Image

Tito Rutaremera, Umuyobozi w’Urwego Ngishwanama rw’Inararibonye z’u Rwanda, yasobanuye ibiranga umuyobozi mubi n’umwiza igihe cyose ayoboye igihugu.

Yabigarutseho mu butumwa yatambukije ku rubuga rwa X rwahoze ari urwa Twitter.   

Yavuze ko umuyobozi mubi arangwa no kugurisha igihugu cye, kugonganisha abo ayobora, kuzana mu bo ayobora amacakubiri, agakorera inyungu ze n’iza agatsiko basangira.

Ati: “Nta ndangagaciro agira, igihugu ayobora ntigishobora gutera imbere.”

Ku rundi ruhande, Rutaremara agaragaza ko umuyobozi mwiza ari udakora ikibi ariko ntaharanire gukora icyiza.

Ati: “Ntadindiza abakora neza ariko ntarwanya abangiza, yifuza ko igihugu cye kibaho neza ariko ntacyo akora ngo kirusheho kubaho neza.

Mu ndangagaciro afite harimo zimwe zifuzwa, igihugu cye kugira ngo gitere imbere ni hamana, ni amahirwe.”

Umuyobozi mwiza cyane yifuza ko igihugu cye gitera imbere kandi aranabiharanira.

Ati: “Ni umuhanga, akora gihanga kandi akamenya gukoresha abandi neza, akunda igihugu cye n’abaturage bagituye.

Igihugu ayoboye gishobora gutera imbere kandi agira indangagaciro zose.”

Umuyobozi w’ikirenga (A great leader) akora neza, akamenya no gukoresha neza abandi kandi agakunda abaturage n’igihugu cye.

Agira ati: “Ni umuhanga akora gihanga, afite indagagaciro zose, arusha abandi kureba kure kandi azi guhindura inzozi zikaba ibikorwa bifatika.”

Ku rundi ruhande, inzozi azihinduramo icyerekezo kandi akagikuramo ingamba na politike.

Afite ubushobozi bwo kubisobanurira abo akorana nabo, arakurikira cyane kandi akamenya ko bumvise ndetse babishyize mu bikorwa bityo agashaka ibisubizo.

Ati: “Akoresha ibikorwa abandi badashobora gukora ndetse no gutekereza, ahindura ibintu abandi badashobora guhindura.

Igihugu cye ni ngombwa ngo cyihute mu iterambere, iyo umufite uramugundira”.

Yakomoje ku bayobozi b’u Rwanda azi

Rutaremara avuga ko Kayibanda Grégoire yazanye amacakubiri mu Rwanda bityo ko yabaye umuyobozi mubi.

Habyarimana Juvenal yazanye Jenoside mu Rwanda, uwo na we ngo yabaye umuyobozi mubi.

Ni mu gihe yavuze ko Perezida wa Repubulika Paul Kagame yayoboye igihugu, ahagarika Jenosideyakorewe Abatutsi.

Yagize ati: “…Yubaka ubumwe bw’Abanyarwanda, yubaka ubukungu bw’igihugu, ahesha umunyarwanda agaciro. Ni umuyobozi w’Ikirenga ureba kure.”

  • KAYITARE JEAN PAUL
  • Gashyantare 22, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE